އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގެ އަންހެން ޑިވިޝަން ފައިނަލުގެ ފުރަތަމަ ޖާގަ އެމް.އެން.ޔޫ ބިޒްނަސް ސްކޫލުން ކަށަވަރުކޮށްފިއެވެ.
އަންގާރަދުވަހުގެރޭ ކުޅުނު ސެމީ ފައިނަލުގެ ފުރަތަމަ މެޗުގައި ފެކަލްޓީ އޮފް ހެލްތު ސައިންސަސް (އެފް.އެޗް.އެސް) އާއި ބައްދަލުކޮށް އެމް.އެން.ޔޫ ބިޒްނަސް ސްކޫލުން މެޗު ކާމިޔާބުކުރީ ސީދާ 3 ސެޓުންނެވެ. ފުރަތަމަ ސެޓު ފަސޭހަކަމާއެކު 25-13ން ގެންދިޔައިރު ދެވަނަ ސެޓާއި ތިންވަނަ ސެޓުގައި އެފް.އެޗް.އެސްގެ ފަރާތުންވެސް މޮޅު ކުޅުމެއް ފެނިގެން ގޮސްފައިވެއެވެ. މި ސެޓުތައް ނިމުނީ 25-23 އަދި 20-25ގެ ނަތީޖާތަކަކުންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ އެމް.އެން.ޔޫ ބިޒްނަސް ސްކޫލުގެ ޖާރޒީ ނަންބަރު 08 ފާޠިމަތު ސަމްހާ އެވެ.
އަންހެން ޑިވިޝަންގެ ދެވަނަ ސެމީ ފައިނަލުގައި ބައްދަލުކުރާނީ ގްރޫޕް ބީގެ އެއްވަނަ، ސްކޫލް އޮފް ނާރސިންގ އާއި ގްރޫޕް އޭގެ ދެވަނަ، ފެކަލްޓީ އޮފް އެޑިއުކޭޝަނެވެ. މި މެޗުވެސް ކުޅުމަށް ހަމަޖެހިފައިވަނީ އަންގާރަދުވަހުގެރެޔެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީޚީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.
