ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންޓަރ ފެކަލްޓީ ވޮލީބޯޅަ މުބާރާތުގެ އަންހެން ޑިވިޝަން ފައިނަލުގެ ފަހު ޖާގަ ސްކޫލް އޮފް ނާސިންގގެ ވޮލީ ޓީމު ކަށަވަރު ކޮށްފިއެވެ.
އަންގާރަދުވަހުގެރޭ ކުޅުނު ސެމީ ފައިނަލުގެ ދެވަނަ މެޗުގައި ފެކަލްޓީ އޮފް އެޑިއުކޭޝަން (އެފް.އީ) އާއި ބައްދަލުކޮށް އެސް.އެން މެޗު ކާމިޔާބުކުރީ ސީދާ 3 ސެޓުންނެވެ. ފުރަތަމަ ސެޓު ފަސޭހަކަމާއެކު 25-9 އިން ގެންދިޔައިރު ދެވަނަ ސެޓާއި ތިންވަނަ ސެޓުގައި ވެސް އެސް.އެންގެ ފަރާތުން މޮޅު ކުޅުމެއް ފެނިގެންދިޔައެވެ. ދެވަނަ ސެޓު އެސް.އެން އިން ކާމިޔާބުކުރީ 25-06 ގެ ބޮޑު ތަފާތަކުންނެވެ. އަދި ތިންވަނަ ސެޓު ކާމިޔާބުކުރީ 25-14 އިންނެވެ. މެޗުގެ މޮޅު ކުޅުންތެރިޔަކަށް ހޮވިފައިވަނީ އެސް.އެންގެ ޖާރޒީ ނަންބަރު 21 އާމިނަތު ފިރުޝާއެވެ.
ބުރާސްފަތި ދުވަހުގެ ހަވީރު 16:00 ކުޅެން ހަމަޖެހިފައިވާ އަންހެން ޑިވިޝަންގެ ފައިނަލުގައި ބައްދަލުކުރާނީ ސެމީގެ ފުރަތަމަ މެޗު ކާމިޔާބުކޮށް ފައިނަލުން ޖާގަ ހޯދި އެމް.އެން.ޔޫ.ބީއެސް އާއި ސެމީގެ ދެވަނަ މެޗު ކާމިޔާބުކޮށް ފައިނަލަށް ދަތުރުކުރި، އެސް.އެން އެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީޚީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.
