ތަށި އަނބުރާ އެމް.އެން.ޔޫ.ބީ.އެސް އަށް

އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގެ އަންހެން ޑިވިޝަނުގެ ޗެމްޕިއަންކަން އެމް.އެން.ޔޫ ބިޒްނަސް ސްކޫލުން (އެމް.އެން.ޔޫ.ބީ.އެސް) ހޯދައިފިއެވެ.

ބުރާސްފަތިދުވަހު ހަވީރު ކުޅުނު ފައިނަލް މެޗު އެމް.އެން.ޔޫ.ބީ.އެސް އިން ސްކޫލް އޮފް ނާރސިންގ (އެސް.އެން) އާއި ވާދަކޮށް ކާމިޔާބުކުރީ 3 ސެޓު، 1 ސެޓުންނެވެ. މި މެޗުގެ ފުރަތަމަ ސެޓު އެމް.އެން.ޔޫ.ބީ.އެސް އިން ގެންދިޔައީ 25-19ގެ ނަތީޖާއަކުންނެވެ. ދެވަނަ ސެޓުގައި އެސް.އެން އިން ކުޅުން ރަނގަޅުކޮށް 25-16ގެ ނަތީޖާއަކުން ސެޓު ކާމިޔާބުކުރިއެވެ. ނަމަވެސް މެޗުގައި ދެން ކުޅެވުނު 2 ސެޓުވެސް 25-23ން ކާމިޔާބުކޮށް މުބާރާތުގެ ޗެމްޕިއަންކަން 3 ވަނަ ފަހަރަށް އެމް.އެން.ޔޫ.ބީ.އެސް އިން ވަނީ ހޯދައިފައެވެ.

ފައިނަލު މެޗުގެ އެންމެ މޮޅު ކުޅުންތެރިއަކަށް ހޮވިފައިވަނީ އެމް.އެން.ޔޫ.ބީ.އެސްގެ ޖާރޒީ ނަންބަރ 08 ފާޠިމަތު ސަމްހާ އެވެ. މުބާރާތުގެ ނިންމުމުގެ ރަސްމިއްޔާތުގައި މި އެވޯޑު ހަވާލުކޮށްދެއްވާފައިވަނީ އެމް.އެން.ޔޫ.އެސް.ޔޫގެ ނައިބު ރައީސް (އިތުރު ޙަރަކާތް) މާޒިން މުޙައްމަދެވެ.

ނިންމުމުގެ ރަސްމިއްޔާތުގައި މުބާރާތުގައި ބައިވެރިވި ޓީމުތަކަށް ހަނދާނީ ލިޔުން ޙަވާލުކޮށްފައިވެއެވެ. ދަރިވަރުންގެ ޔޫނިއަންގެ ރައީސް ޢަބްދުﷲ ޝަހުނީޒް މި ލިޔުންތައް ޙަވާލުކޮށްދެއްވިއިރު މި މުބާރާތުގެ އަންހެން ޑިވިޝަނުގައި ވާދަކޮށްފައިވަނީ ފެކަލްޓީ އޮފް އެޑިއުކޭޝަން، އެމް.އެން.ޔޫ ގަން ކެމްޕަސް، އެމް.އެން.ޔޫ ބިޒްނަސް ސްކޫލް، ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް، ފެކަލްޓީ އޮފް ޝަރީޢާ އެންޑް ލޯ، ސްކޫލް އޮފް ނާރސިންގ، ސެންޓަރ ފޯ ފައުންޑޭޝަން ސްޓަޑީޒް އަދި ފެކަލްޓީ އޮފް ހެލްތު ސައިންސަސް އެވެ.

މީގެ އިތުރުން މުބާރާތުގެ ރެފްރީންނަށްވެސް ވަނީ ހަނދާނީ ލިޔުން ހަވާލުކޮށްދެއްވާފައެވެ. މުބާރާތުގައި ރެފްރީންގެ ގޮތުގައި މަސައްކަތްކޮށްދެއްވި އެމް.އެން.ޔޫ ވޮލީ ޓީމުގެ ހެޑްކޯޗު އަލްފާޟިލް ޚާލިދު މުޙައްމަދާއި، އެމް.އެން.ޔޫ ފިރިހެން ވޮލީ ޓީމުގެ ކެޕްޓަން ޙަސަން މޫސާއަށް ލިޔުން ޙަވާލުކޮށްދެއްވީ ދަރިވަރުންގެ ޔޫނިއަންގެ ނައިބު ރައީސް (ގޮފިތައް) ޙުސައިން ޒައިދެވެ.
މުބާރާތުގެ އަންހެން ޑިވިޝަނުގައި އެންމެ ރަނގަޅު ސަޕޯޓަރުންގެ ގޮތުގައި ހޮވުނު ސްކޫލް އޮފް ނާރސިންގ އަށް ޓްރޮފީ ޙަވާލުކޮށްދެއްވީ ދަރިވަރުންގެ ޔޫނިއަންގެ ކުރީގެ ނައިބު ރައީސް (އިތުރު ޙަރަކާތް) ޙަސަން ޝާހެވެ.

އަންހެން ޑިވިޝަނުގެ އެންމެ އުއްމީދީ ކުޅުންތެރިއަކަށް ހޮވިފައިވަނީ ސީ.އެފް.އެސްގެ ޖާރޒީ ނަންބަރ 03 ޢާއިޝަތު ލައިސާ މަޖީދެވެ. މި އެވޯޑު ޙަވާލުކޮށްދެއްވީ ފެކަލްޓީ އޮފް އާރޓްސްގެ ޑީން އަލްފާޟިލް އާސިމް ޢަބްދުއްސައްތާރެވެ.

އަންހެން ޑިވިޝަނުގެ ”ޓޮޕް 6“ ޕްލޭޔަރުންގެ ގޮތުގައި ހޮވިފައިވަނީ:

1. އެފް.އެޗް.އެސްގެ ޖާރޒީ ނަންބަރ 16 އާމިނަތު އަފާފް،
2. އެސް.އެންގެ ޖާރޒީ ނަންބަރ 21 އާމިނަތު ފިރުޝާ،
3. އެފް.އީގެ ޖާރޒީ ނަންބަރ 9 ފާތިމަތު މަޒީނާ،
4. އެމް.އެން.ޔޫ.ބީ.އެސްގެ ޖާރޒީ ނަންބަރ 05 ޝަމްހާ ރިޔާޒް،
5. އެސް.އެންގެ ޖާރޒީ ނަންބަރ 10 ޢާއިޝަތު ޒުނީތާގެ އިތުރުން
6. އެމް.އެން.ޔޫ.ބީ.އެސްގެ ޖާރޒީ ނަންބަރ 11 ފިރުޝާނާ ނަޞީރެވެ.

މި ފަރާތްތަކަށް އެވޯޑު ޙަވާލުކޮށްދެއްވީ އެމް.އެން.ޔޫ ދަރިވަރުންގެ އަމީދު އަލްފާޟިލާ އާޝިޔާ ލީލާ އަހްމަދެވެ.

މުބާރާތުގެ އަންހެން ޑިވިޝަނުގެ އެންމެ މޮޅު ކޯޗު އެމް.އެން.ޔޫ.ބީ.އެސްގެ ކޯޗު ޞަފްވާން އަޙްމަދަށް އެވޯޑު ޙަވާލުކޮށްދެއްވީ ވީ.އޭ.އެމްގެ ޓެކްނިކަލް ޑިވެލޮޕްމެންޓް ކޮމިޝަން މެންބަރު އަދި ޕޮލިސް ކްލަބްގެ ނައިބު ރައީސް އަލްފާޟިލް ފަތުހުﷲ ވަޙީދެވެ.

މުބާރާތުގެ އަންހެން ޑިވިޝަނުގެ އެންމެ މޮޅު ކުޅުންތެރިޔަކަށް ހޮވިފައިވަނީ އެމް.އެން.ޔޫ.ބީ.އެސްގެ ޖާރޒީ ނަންބަރ 08 ފާޠިމަތު ސަމްޙާ އެވެ. މި އެވޯޑު ޙަވާލުކޮށްދެއްވާފައިވަނީ އެމް.އެން.ޔޫ.އެސް.ޔޫގެ ކުރީގެ ރައީސް އަލްފާޟިލް ޢަލީ ޝަމްޢޫނެވެ.

މުބާރާތުގެ އަންހެން ޑިވިޝަންގެ ރަނަރއަޕް ޓީމް ސްކޫލް އޮފް ނާރސިންގ އަށް ޓްރޮފީ އާއި މެޑަލް ޙަވާލުކޮށްދެއްވީ އެމް.އެން.ޔޫ ޑެޕިއުޓީ ވައިސް ޗާންސެލަރ އަލްފާޟިލް ޙުސައިން ޙަލީމެވެ.

އަދި ޗެމްޕިއަން ޓީމް އެމް.އެން.ޔޫ.ބީ.އެސް އަށް ޓްރޮފީ އާއި މެޑަލް ޙަވާލުކޮށްދެއްވީ އެމް.އެން.ޔޫ ވައިސް ޗާންސެލަރ ޑރ. މުޙައްމަދު ޝަރީފެވެ.

އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީޚީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.