އެއް އަހަރުގެ މެދުކެނޑުމަކަށްފަހު ބާއްވަން ހަމަޖެހިފައިވާ ”އެމް.އެން.ޔޫ.އެސް.ޔޫ ބަހުސް މުބާރާތް 2021″ގެ ގުރުއަތުލުމުގެ ރަސްމިއްޔާތު ބާއްވައިފިއެވެ.
އޮކްޓޯބަރު 23 ވީ ހޮނިހިރު ދުވަހުގެރޭ އެމް.އެން.ޔޫ B1-X ކުލާސްރޫމުގައި ބޭއްވުނު މި ގުރުއަތުލުމުގައި، މުބާރާތުގައި ބައިވެރިވި 9 ޓީމުގެ މެނޭޖަރުންނާއި، އެމް.އެން.ޔޫ.އެސް.ޔޫގެ ހިންގާ ކޮމިޓީގެ ބައެއް މެންބަރުންވެސް ބައިވެރިވެފައިވެއެވެ.
މުބާރާތުގައި އެމް.އެން.ޔޫގެ 7 ފެކަލްޓީއަކުން ވަނީ ބައިވެރިވެފައެވެ. އެގޮތުން ފެކަލްޓީ އޮފް ޝަރީއާ އެންޑް ލޯ (އެފް.އެސް.އެލް)، ފެކަލްޓީ އޮފް އެޑިއުކޭޝަން (އެފް.އޭ)، ސެންޓަރ ފޮރ ފައުންޑޭޝަން ސްޓަޑީސް (ސީ.އެފް.އެސް)، އެމް.އެން.ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް)، ފެކަލްޓީ އޮފް ހޮސްޕިޓަލިޓީ އެންޑް ޓުއަރިޒަމް ސްޓަޑީސް (އެފް.އެޗް.ޓީ.އެސް) އަދި ސްކޫލް އޮފް ނާސިންގ (އެސް.އެން) ހިމެނެއެވެ.
މުބާރާތުގެ ޤަވާއިދާއި ތާވަލު މި ވެބްސައިޓްގެ ޑައުންލޯޑްސް ސެކްޝަނުން ލިބިވަޑައިގަންނަވާނެއެވެ.
މި އަހަރުގެ މުބާރާތުގައި އެމް.އެން.ޔޫ އިން ބޭރު ދެ ޓީމުކަމަށްވާ އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް) އާއި ވިލާ ކޮލެޖް (ވީ.ސީ) ވަނީ ބައިވެރިވެފައެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ދިވެހި ބަސް ދިރުވައި އާލާކޮށް، ބަހުގެ ހަމަތަކާ އެއްގޮތަށް ދިވެހިބަސް ބޭނުން ކުރަން ބާރުއެޅުމަށާއި ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ ސިލްސިލާކޮށް ބޭއްވޭ މި މުބާރާތުގެ 8 ވަނަ މުބާރާތެވެ.
