އެމް.އެން.ޔޫ.އެސް.ޔޫ ބަހުސް މުބާރާތުގެ ފުރަތަމަ ބުރުގެ ފަހު މެޗުގައި ފެކަލްޓީ އޮފް އެޑިއުކޭޝަންގެ ކައިރިން ކުރި ހޯދާ ވިލާ ކޮލެޖް ސެމީ ފައިނަލަށް ދަތުރުކޮށްފިއެވެ.
1 ނޮވެންބަރު ވީ ހޯމަ ދުވަހު ބޭއްވުނު ބަހުސް މުބާރާތުގެ އެންމެ ފަހު މެޗުގައި އެފްއީ އަދި ވިލާ ކޮލެޖް ބައްދަލުކޮށް 857 – 760 ގެ ނަތީޖާ އަކުން ވިލާ ކޮލެޖް ވަނީ ކުރިހޯދާފައެވެ. މި ބަހުސްގެ މައުޟޫ އަކީ ”އިޖްތިމާއީ މައްސަލަތައް ހައްލުކުރެވޭނީ ބޯހިޔާވެހިކަމުގެ ތެރެއިންނެވެ“ ކަމަށްވާއިރު އެފްއީ ބަހުސްކުރީ މައުޟޫއާ އެއްކޮޅަށެވެ. އަދި ވިލާ ކޮލެޖް ބަހުސްކުރީ މައުޟޫއާ ދެކޮޅަށެވެ. މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ ވިލާ ކޮލެޖްގެ ޝާމާ ޝުޢައިބު އެވެ. މި ނަތީޖާއާއެކު ވިލާ ކޮލެޖް ވަނީ ސެމީ ފައިނަލަށް ދަތުރުކޮށްފައެވެ.
މި މުބާރާތުގެ ސެމީ ފައިނަލްގެ ފުރަތަމަ މެޗުގައި ބައްދަލުކުރާނީ ސެންޓަރ ފޯރ ފައުންޑޭޝަން ސްޓަދީސް އަދި އެމްއެންޔޫ ބިޒްނަސް ސްކޫލް އެވެ. 3 ނޮވެންބަރު ވާ ބުދަ ދުވަހުގެ ހަވީރު 4:30 ގައި ފަށާ މި ބަހުސްގެ މައުޟޫ އަކީ ”ދިވެހި އިޤްތިޞާދަށް މިވަގުތު އެންމެ މުހިންމު ކަމަކީ އެންމެ ކުޑަ އުޖޫރަ ކަނޑައެޅުމެވެ.“ ސެމީ ފައިނަލްގެ ދެވަނަ މެޗުގައި ބައްދަލުކުރާނީ ފެކަލްޓީ އޮފް ޝަރީޢާ އެންޑް ލޯ އަދި ވިލާ ކޮލެޖެވެ. ހަމަ އެދުވަހުގެ ރޭގަނޑު 8:30 ގައި ފަށަން ހަމަޖެހިފައިވާ މި ބަހުސްގެ މައުޟޫ އަކީ ”ކްރިޕްޓޯ ކަރަންސީ ރާއްޖޭގެ ލީގަލްޓެންޑަރގެ ގޮތުގައި ހިމެނުމުން ލިބޭނީ ފައިދާއެވެ“.
މި އަހަރުގެ މުބާރާތުގައި އެމް.އެން.ޔޫ އިން ބޭރު ދެ ޓީމު ކަމަށްވާ އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް) އަދި ވިލާ ކޮލެޖް (ވީ.ސީ) ވަނީ ބައިވެރިވެފައެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ދިވެހި ބަސް ދިރުވައި އާލާކޮށް، ބަހުގެ ހަމަތަކާ އެއްގޮތަށް ދިވެހިބަސް ބޭނުން ކުރަން ބާރުއެޅުމަށާއި ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ ސިލްސިލާކޮށް ބޭއްވޭ މި މުބާރާތުގެ 8 ވަނަ މުބާރާތެވެ.
