ތަރަހައިގެ ނައިބު ރައީސުންގެ މަޤާމަށް މާސާ އަދި ނާއިލް އިންތިޚާބުވެއްޖެ

ފެބުރުވަރީ 17ވީ ބުރާސްފަތިދުވަހު ކުރިއަށް ދިޔަ، އެމް.އެން.ޔޫ.އެސް.ޔޫ ގޮފިތަކުގެ ހިންގާ ކޮމިޓީ އިންތިޚާބުގެ ވަގުތީ ނަތީޖާ ދައްކާގޮތުން ތަރަހައިގެ ނައިބު ރައީސް (ޢިލްމީ)ގެ މަޤާމަށް ކ. މާލޭ ހ. ދޭހަނދުވަރު މުޙައްމަދު ނާއިލް ހަފީޡް އަދި ނައިބު ރައީސް (އިތުރު ޙަރަކާތް)ގެ މަޤާމަށް ގދ. ވާދޫ ފިނިވާގޭ ފާޠިމަތު މާސާ ސަޢީދު އިންތިޚާބުވެއްޖެއެވެ.

ތަރަހައިގެ ނައިބު ރައީސް (ޢިލްމީ)ގެ މަޤާމަށް ކުރިމަތިލާފައިވަނީ ކެންޑިޑޭޓު ނަންބަރު 1 މުޙައްމަދު ނާއިލް ހަފީޡްގެ އިތުރުން ކެންޑިޑޭޓު ނަންބަރު 2 އާމިނަތު އިރަމް ސަލީމެވެ. ނާއިލް އިންތިޚާބު ކާމިޔާބުކުރީ ޖުމްލަ 77 ވޯޓާއެކު %76.24 އިންސައްތަ ވޯޓު ކާމިޔާބުކޮށްގެންނެވެ. އިރަމް އަށް ލިބުނީ 24 ވޯޓެވެ.

ތަރަހައިގެ ނައިބު ރައީސް (އިތުރު ޙަރަކާތް)ގެ މަޤާމަށް ކުރިމަތިލާފައިވަނީ ކެންޑިޑޭޓު ނަންބަރު 1 ފާޠިމަތު މާސާ ސަޢީދުގެ އިތުރުން ކެންޑިޑޭޓު ނަންބަރު 2 ޝައިހާން ޒަރީރެވެ. މާސާ އިންތިޚާބު ކާމިޔާބުކުރީ ޖުމްލަ 82 ވޯޓާއެކު %79.61 އިންސައްތަ ވޯޓު ކާމިޔާބުކޮށްގެންނެވެ. ޝައިޙާން އަށް ލިބުނީ 21 ވޯޓެވެ.

ވޯޓުލުމަށް ބެހެއްޓުނު 2 ފޮށި ވެސް ބެހެއްޓިފައިވަނީ އޭ ބްލޮކް ކުރިމައްޗަށްވާ ގޮތަށް އޮންނަ ސަރަޙައްދުގައެވެ.

އެމް.އެން.ޔޫ.އެސް.ޔޫގެ މާލޭ ކެމްޕަހުގެ ގޮފިތަކުގެ ހިންގާ ކޮމިޓީ އިފްތިތާހު ކުރުން ތާވަލުކުރެވިފައިވަނީ ފެބުރުވަރީ 19ވާ ހޮނިހިރުދުވަހުގެ ރެޔަށެވެ.