8 ވަނަ އެމް.އެން.ޔޫ.އެސްޔޫ އިންޓަރ ފެކަލްޓީ ވޮލީބޯޅަ މުބާރާތުގައި ބައިވެރިވުމުގެ ފުރުޞަތު ހުޅުވާލައިފި

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން   ބާއްވާ 8 ވަނަ އިންޓަރ ފެކަލްޓީ ވޮލީބޯޅަ މުބާރާތުގައި ބައިވެރިވުމަށް ހުޅުވާލައިފިއެވެ.

މި މުބާރާތުގައި ބައިވެރިވުމުގެ ފުރުޞަތު ހުޅުވާލާފައިވަނީ ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ/ސެންޓަރުތަކަށެވެ. މި މުބާރާތުގައި ބައިވެރިވުމަށް އެދި ފޯމު ހުށަހެޅުމުގެ ފަހު ދުވަހަކީ 2 މާރިޗު 2022 އެވެ. އަދި ޓީމުތަކުން ޓީމު ލިސްޓު ހުށަހެޅުމުގެ ފަހު ދުވަހަކީ 08 މާރިޗު 2022 އެވެ. ފޯމު ހުށަހަޅާނީ އެ ފެކަލްޓީ/ސެންޓަރެއްގައި ޤާއިމުކޮށްފައިވާ އެމް.އެން.ޔޫ.އެސް.ޔޫގެ ގޮފީގެ ފަރާތުންނެވެ. ފިރިހެން އަދި އަންހެން ޑިވިޝަން ހިމެނޭ މި މުބާރާތުގައި ބައިވެރިވުމަށް އެދޭ ފޯމާއި ޓީމު ލިސްޓު ހުށަހަޅާ ފޯމު އެމް.އެން.ޔޫ.އެސް.ޔޫ ވެބްސައިޓް އިން ޑައުންލޯޑް ކުރެވޭނެއެވެ.

މުބާރާތް ކުރިއަށް ގެންދިއުމަށް ތާވަލު ކުރެވިފައިވަނީ މާރިޗު 11 ން 19 އަށެވެ.

ސިލްސިލާ ގޮތެއްގައި ބާއްވަމުންދާ މި މުބާރާތަކީ އެމް.އެން.ޔޫ.އެސް.ޔޫގެ 2 ވަނަ އަށް އެންމެ ބޮޑު ޙަރަކާތެވެ. މިއަހަރު ބޭއްވުމަށް ހަމަޖެހިފައިވަނީ މީގެ 8 ވަނަ މުބާރާތެވެ. ވޭތުވެދިޔަ އަހަރު ފިރިހެން ޑިވިޝަނުގެ ފައިނަލުގައި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒްގެ މައްޗަށް ކުރިހޯދައި ޗެމްޕިއަންކަން ހޯދާފައިވަނީ ސެންޓަރ ފޯ ފައުންޑޭޝަން ސްޓަޑީޒް އެވެ. އަދި ސްކޫލް އޮފް ނާރސިންގ ބަލިކޮށް އަންހެން ޑިވިޝަނުގެ ތަށި އުފުލާލީ އެމް.އެން.ޔޫ ބިޒްނަސް ސްކޫލުންނެވެ.