ކޮވިޑް-19ގެ ހާލަތާއެކު 2 އަހަރުގެ މެދުކެނޑުމަކަށްފަހު ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ އެންމެ ބޮޑު ހަރަކާތް ’އެމް.އެން.ޔޫ.އެސް.ޔޫ ފުޓްސަލް ފިއެސްޓާ‘ މިއަހަރު އޮކްޓޯބަރު މަހު ބޭއްވުމަށް ވަނީ ތާވަލު ކުރެވިފައެވެ. މި މުބާރާތަކީ 2013 އިން ފަށައިގެން 2019 ވަނަ އަހަރާއި ހަމައަށް މެދުކެނޑުމެއް ނެތި ކުރިޔަށް ގެންދިޔަ ހަރަކާތެކެވެ.
2013 ވަނަ އަހަރު މި މުބާރާތް ބޭއްވުނީ ޓައިޓްލް ސްޕޮންސަރަކާ ނުލައެވެ. އެ އަހަރު އެންމެ ބޮޑު އެއްބާރުލުމަކާއި އެހީތެރިކަމެއް ދެއްވީ މިހާރުވެސް އެމް.އެން.ޔޫ.އެސް.ޔޫގެ ހުރިހާ ހަރަކާތެއްގައިވެސް އެންމެ ކައިރިން މަސައްކަތް ކުރާ އެއް ފަރާތް ކަމަށްވާ ”ރެޑްބުލް މޯލްޑިވްސް“އިންނެވެ. އޭރު މި މުބާރާތުގައި އޮންނަނީ ފިރިހެން ޑިވިޝަން އެކަންޏެވެ. މުބާރާތް ހުޅުވާލެވިފައި އޮންނަނީ އެމް.އެން.ޔޫގެ ފެކަލްޓީ/ސެންޓަރތަކަށާއި، އެހެނިހެން ކޮލެޖު/ޔުނިވަރސިޓީތަކުގެ އިތުރުން ހައި ސްކޫލްތަކަށެވެ. ކޮންމެ ބަޔަކުވެސް އެއްޓީމު ބައިވެރިކުރާ ގޮތަށެވެ. މުބާރާތުގެ ފުރަތަމަ ތަށި އުފުލާލީ ފެކަލްޓީ އޮފް މެނޭޖްމަންޓް އެންޑް ކޮމްޕިއުޓިންގ (އެފް.އެމް.ސީ)، މިހާރުގެ އެމް.އެން.ޔޫ ބިޒްނަސް ސްކޫލުންނެވެ.
2018ވަނަ އަހަރަކީ މުބާރާތަށް މުޅީން އަލަށް އަންހެން ޑިވިޝަން ތަޢާރަފު ކުރެވުނު އަހަރެވެ. މި މުބާރާތުގެ ޓައިޓްލް ސްޕޮންސަރަކީ ދިރާގު ކަމަށްވާއިރު، މިއީ ދިރާގުން މި މުބާރާތުގެ ޓައިޓްލް ސްޕޮންސަރކަން ކުރި 2 ވަނަ ފަހަރެވެ. މި މުބާރާތުގައި ފިރިހެން ޑިވިޝަނުން ޖުމްލަ 18 ޓީމު އަދި އަންހެން ޑިވިޝަނުން ޖުމްލަ 12 ޓީމާއެކު، މުޅި ޖުމްލަ 30 ޓީމު ބައިވެރިވިއިރު، މިއީ މި މުބާރާތުގެ ތާރީޚުގައި އެންމެ ގިނަ ޓީމު ބައިވެރިވި ފަހަރެވެ. ދިރާގު އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2018ގެ އަންހެން ޑިވިޝަނުގެ ފައިނަލުގައި ވާދަކުރީ އެވިޑް ކޮލެޖް އަދި ކްލިކް ކޮލެޖެވެ. އެވިޑް ކޮލެޖް ބަލިކޮށް މުބާރާތުގެ އަންހެން ޑިވިޝަނުގެ ތާރީޚީ ފުރަތަމަ ތަށި އުފުލާލީ ކްލިކް ކޮލެޖުންނެވެ.
2019 ވަނަ އަހަރުގެ މުބާރާތުގެ ޓައިޓްލް ސްޕޮންސަރ އަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ) އެވެ. އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގައި ފިރިހެން ޑިވިޝަނުން 15 ޓީމު އަދި އަންހެން ޑިވިޝަނުން 12 ޓީމު ވާދަކުރިއެވެ. އެފަހަރު މުބާރާތުގައި ފެނުނު އެންމެ ބޮޑު އެއް ބަދަލަކީ މުބާރާތުގެ ކުރީގެ ޗެމްޕިއަނުންގެ ޖާޒީން ފެނުނު ބެޖެވެ. މި ބެޖުން އެ ޓީމަކީ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޗެމްޕިއަންކަން ހޯދާފައިވާ ޓީމެއްކަމާއި، ޗެމްޕިއަންކަން ހޯދީ ކިތައް ފަހަރުކަން އެނގޭނެއެވެ. 2019 ވަނަ އަހަރުގެ ފިރިހެން ތަށި އުފުލާލީ އެވިޑް ކޮލެޖުން ކަމަށްވާއިރު، އަންހެން ތަށި އުފުލާލާފައިވަނީ އެމް.އައި ކޮލެޖުންނެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. 2013 އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖު/ޔުނިވަރސިޓީތަކާއި މަތީ ތަޢުލީމު ފޯރުކޮށްދޭ އެކިއެކި މުއައްސަސާތަކުގެ އިތުރުން ހައި ސްކޫލްތަކަށެވެ.
