ވީ.ސީ.އެސް.އޭ ބާސްކެޓްބޯޅަ މުބާރާތުން އެމް.އެން.ޔޫއަށް ރަން މެޑައްޔަކާއި ރިހި މެޑައްޔެއް!

ވިލާކޮލެޖް ސްޓޫޑެންޓް އެސޯސިއޭޝަން (ވީ.ސީ.އެސް.އޭ) އާއި މޯލްޑިވްސް ބާސްކެޓްބޯލް އެސޯސިއޭޝަން (އެމް.ބީ.އޭ) ގުޅިގެން ކުރިއަށް ގެންދިޔަ ޓްރިޕްލް ތްރެޓް ބާސްކެޓްބޯލް ޓޯނަމެންޓް (ޓީ.ޓީ.ބީ.ޓީ)ގައި ދިވެހިރާއްޖޭގެ ޤައުމީ ޔުނިވަރސިޓީން 1 ރަން މެޑަލް އަދި 1 ރިހި މެޑަލް ޙާޞިލްކޮށްފިއެވެ.

މި މުބާރާތުގައި އެމް.އެން.ޔޫ އަށް ރަން މެޑަލް ޙާޞިލްކޮށްދީފައިވަނީ 5 އޮން 5 ކެޓަގަރީން އެމް.އެން.ޔޫގެ ފިރިހެން ޓީމެވެ. މި ކެޓަގަރީގައި ފިރިހެން ޓީމު ކުޅުނު ހުރިހާ މެޗެއް ވަނީ ކާމިޔާބުކޮށްފައެވެ. އަދި ކެޓަގަރީގެ ފައިނަލް މެޗުގައި ބައްދަލުކޮށްފައިވަނީ ވިލާ ކޮލެޖާއެވެ. މި ކެޓަގަރީގައި އެމް.އެން.ޔޫގެ އަންހެން ޓީމު މުބާރާތުން ކެޓީ ސެމީ ފައިނަލުގައި އަޙްމަދިއްޔާ އިންޓަރނޭޝަނަލް ސްކޫލް (އޭ.އައި.އެސް)އާ ބައްދަލުކޮށް ކުޅުނު މެޗުން ބަލިވުމުންނެވެ.

އެމް.އެން.ޔޫ އަށް ރިހި މެޑަލް ޙާޞިލްކޮށްދީފައިވަނީ 3 އޮން 3 ކެޓަގަރީން އެމް.އެން.ޔޫގެ އަންހެން ޓީމެވެ. މި ކެޓަގަރީގައި އަންހެން ޓީމު ބަލިވެފައިވަނީ މި ކެޓަގަރީގެ ޗެމްޕިއަން ޓީމު ސެންޓަރ ފޯ ހަޔަރ ސެކަންޑަރީ އެޑިއުކޭޝަން (ސީ.އެޗް.އެސް.އީ) އަތުން އެކަންޏެވެ. މި ކެޓަގަރީގައި އެމް.އެން.ޔޫގެ ފިރިހެން ޓީމު މުބާރާތުން ކެޓީ ސެމީ ފައިނަލުގައި ސީ.އެޗް.އެސް.އީއާ އެކު ކުޅުނު މެޗުން ބަލިވުމުންނެވެ.

ވީ.ސީ.އެސް.އޭ ޓީ.ޓީ.ބީ.ޓީ ކުރިއަށް ދިޔައީ ޖޫން 30 ވަނަ ދުވަހުން ފެށިގެން ޖުލައި 6 ވަނަ ދުވަހުގެ ނިޔަލަށެވެ. މުބާރާތުގެ މެޗުތައް ކުޅެފައިވަނީ އެކުވެނި އައުޓްޑޯ ބާސްކެޓްބޯޅަ ކޯޓުގައެވެ.