ވިލާ ކޮލެޖްގެ ސްޓުޑެންޓް އެސޯސިއޭޝަން (ވީ.ސީ.އެސް.އޭ)ގެ ފަރާތުން އިންތިޒާމުކޮށްގެން ބާއްވާ ޓްރިޕަލް ތްރެޓް ބާސްކެޓްބޯލް ޓޯނަމެންޓް 2022 (ޓީ.ޓީ.ބީ.ޓީ)ގެ ތްރީ އޮން ތްރީގެ ސެމީ ފައިނަލުން ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ ދެ ޓީމު ވެސް ޖާގަ ހޯދައިފިއެވެ.
ސެމީގެ ޖާގަ ދެ ޓީމުން ކަށަވަރުކުރީ އަންގާރަ ދުވަހުގެ ރޭ ކުޅުނު މެޗުތަކަށް ފަހުއެވެ. އަންހެން ޓީމު ވަނީ ހަތަރު މެޗު ކުޅެފައެވެ. އޭގެ ތެރެއިން އެއް މެޗުން ބަލިވިއިރު، އަނެއް ތިން މެޗުން ވަނީ މޮޅުވެފައެވެ. އަންހެން ޓީމު ވަނީ ވިލާ ކޮލެޖާ ދެކޮޅަށް ކުޅުނު މެޗު 4-0 ން، މެޕްސް ކޮލެޖާ ދެކޮޅަށް ކުޅުނު މެޗު 13-1 ން އަދި އަޙުމަދިއްޔާ އިންޓަރނޭޝަނަލް ސްކޫލާ ދެކޮޅަށް ކުޅުނު މެޗު 6-2 ން ކާމިޔާބުކޮށްފައެވެ. އަންހެން ޓީމު ބަލިވީ ސެންޓަ ފޯރ ހަޔަރ ސެކަންޑްރީ އެޑިއުކޭޝަން (ސީ.އެޗް.އެސް.އީ) އަތުން 3-6 ންނެވެ.
ފިރިހެން ޓީމު ކުޅެފައިވަނީ ތިން މެޗެވެ. ފުރަތަމަ މެޗުގައި މެޕްސް ކޮލެޖު އަތުން މޮޅުވީ 10-6 ންނެވެ. ދެ ވަނަ މެޗުގައި ސީ.އެޗް.އެސް.އީ އަތުން 16-6 ން މޮޅުވިއިރު، ފަހު މެޗުގައި ވިލާ ކޮލެޖު އަތުން ބަލިވީ 9-10 ގެ ކުޑަ ތަފާތަކުންނެވެ.
މުބާރާތުގެ ސެމީގެ މެޗުތަކާއި ފައިނަލް މެޗުތައް ކުރިއަށް ދާނީ މިރޭއެވެ. ފިރިހެން ސެމީ ފައިނަލްގައި މިރޭ 19:15 ގައި ނިކުންނާނީ ސީ.އެޗް.އެސް.އީއާ ދެކޮޅަށެވެ. އަންހެން ސެމީ ފައިނަލްގައި މިރޭ 19:45 ގައި ނިކުންނާނީ ވިލާ ކޮލެޖާ ދެކޮޅަށެވެ.
