ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ އެމް.އެން.ޔޫ.އެސް.ޔޫ ބަހުސް މުބާރާތް 2022ގެ ދެވަނަ ދުވަހުގެ ފުރަތަމަ ބަހުސް ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އިން ދޫކޮށްލުމުގެ ސަބަބުން ފެކަލްޓީ އޮފް އެޑިއުކޭޝަން މޮޅުވިއިރު، އެރޭގެ ދެވަނަ ބަހުސްގައި ފެކަލްޓީ އޮފް ހެލްތު ސައިންސަސް (އެފް.އެޗް.އެސް) ބަލިކޮށް ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އިން މުބާރާތުގެ ދެވަނަ މޮޅު ހޯދައިފިއެވެ.
12 ސެޕްޓެންބަރު ވީ ހޯމަދުވަހުގެރޭ އެމް.އެން.ޔޫ ސެންޓްރަލް އެޑްމިނިސްޓްރޭޝަން އޮޑިޓޯރިއަމްގައި ކުރިއަށްދިޔަ މި ބަހުސްތަކުގެ ތެރެއިން ފުރަތަމަ ބަހުސް ސީ.އެފް.އެސް އިން ދޫކޮށްލާފައިވަނީ ބަހުސަށް މެންބަރުން ހަމަ ނުވުމުގެ ސަބަބުންނެވެ.
އެރޭގެ ދެވަނަ ބަހުސް އެފް.އެސް.އެލް އިން ކާމިޔާބު ކޮށްފައިވަނީ 834 – 626ގެ ނަތީޖާއަކުންނެވެ. ”ދެމެހެއްޓެނިވި އިޤްތިޞާދެއް ބިނާކުރުމަށް ފަތުރުވެރިކަމަށް ބަރޯސާވުން ހުއްޓާލަން ޖެހޭ“ކަމަށް ވަކާލާތު ކުރަމުން އެފް.އެސް.އެލް ބަހުސް ކުރިއިރު، މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެފް.އެސް.އެލްގެ އިސްމާޢީލް ރަޒީން ޢިމްރާނެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ދިވެހި ބަސް ދިރުވައި އާލާކޮށް، ބަހުގެ ހަމަތަކާ އެއްގޮތަށް ދިވެހިބަސް ބޭނުން ކުރަން ބާރުއެޅުމަށާއި ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ ސިލްސިލާކޮށް ބޭއްވޭ މި މުބާރާތުގެ 9 ވަނަ މުބާރާތެވެ.
