ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ އެމް.އެން.ޔޫ.އެސް.ޔޫ ބަހުސް މުބާރާތް 2022ގެ ދެވަނަ ރޭގެ ތިންވަނަ ބަހުސް އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް) އިން ކާމިޔާބު ކުރިއިރު، އެރޭގެ ހަތަރުވަނަ ބަހުސް ފެކަލްޓީ އޮފް އާރޓްސް (އެފް.އޭ) އިން ކާމިޔާބުކޮށްފިއެވެ.
12 ސެޕްޓެންބަރު ވީ ހޯމަދުވަހުގެރޭ އެމް.އެން.ޔޫ ސެންޓްރަލް އެޑްމިނިސްޓްރޭޝަން އޮޑިޓޯރިއަމްގައި ކުރިއަށްދިޔަ މި ބަހުސްތަކުގެ ތެރެއިން އެރޭގެ ތިންވަނަ ބަހުސް އައި.ޔޫ.އެމް އިން ކާމިޔާބު ކޮށްފައިވަނީ 920 – 617ގެ ނަތީޖާއަކުން އެމް.އެން.ޔޫ ބިޒްނަސް ސްކޫލްގެ މައްޗަށް ކުރިހޯދައިގެންނެވެ. ”މަތީ ތަޢުލީމުގެ މަރުހަލާގައި އޮންލައިންކޮށް ކިޔަވައިދިނުމުގެ ފައިދާއަށް ވުރެން ގެއްލުން ބޮޑެވެ.“ މި މައުޟޫއަށް ކުރި ބަހުސްގައި އައި.ޔޫ.އެމް އިން ބަހުސްކޮށްފައިވަނީ މައުޟޫއާ ދެކޮޅަށެވެ. މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އައި.ޔޫ.އެމްގެ އަލީ އަހްނަފެވެ.
އެރޭގެ ހަތަރުވަނަ ބަހުސް އެފް.އޭ އިން ކާމިޔާބު ކުރީ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް (އެފް.އެޗް.ޓީ.އެސް)ގެ މައްޗަށް ކުރިހޯދައިގެންނެވެ. ”މާލޭގެ ޓްރެފިކް ތޮއްޖެހުން ކުޑަކުރުމަށްޓަކައި ވެހިކަލް ކޯޓާ ކަނޑައަޅަން ޖެހޭ“ކަމަށް ވަކާލާތު ކުރަމުން އައި.ޔޫ.އެމް އިން ބަހުސް ކާމިޔާބު ކުރީ 620 – 522ގެ ނަތީޖާއަކުންނެވެ. މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެފް.އޭގެ ޢާލިމް ޢަބްދުއް ލަތީފެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ދިވެހި ބަސް ދިރުވައި އާލާކޮށް، ބަހުގެ ހަމަތަކާ އެއްގޮތަށް ދިވެހިބަސް ބޭނުން ކުރަން ބާރުއެޅުމަށާއި ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ ސިލްސިލާކޮށް ބޭއްވޭ މި މުބާރާތުގެ 9 ވަނަ މުބާރާތެވެ.
