”އެމް.އެން.ޔޫ.އެސް.ޔޫ ބަހުސް މުބާރާތް 2023″ގެ ތިންވަނަ ރޭގެ ބަހުސްތަކުން ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އަދި ފެކަލްޓީ އޮފް އެޑިއުކޭޝަން (އެފް.އީ) މޮޅުވެއްޖެއެވެ.
މެއި 9 ވީ އަންގާރަދުވަހުގެރޭ ކުރި ފުރަތަމަ ބަހުސްގައި ބައްދަލުކުރީ އެފް.އެސް.އެލް އަދި ސްކޫލް އޮފް ނާރސިންގ (އެސް.އެން) އެވެ. މި ބަހުސް 600-354ގެ ނަތީޖާއަކުން ކާމިޔާބުކުރީ އެފް.އެސް.އެލް އެވެ. މި ބަހުސްގެ މައުޟޫ އަކީ ”ދިވެހި ޤައުމިއްޔަތު ދިރުވުމަށް އެންމެ މުހިންމީ ޤައުމިއްޔަތުގެ އަސާސްތައް އަމިއްލަ މާދަރީ ބަހުން ކިޔަވައިދިނުމެވެ.“ ކަމަށްވާއިރު މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވުނީ އެފް.އެސް.އެލްގެ މުޙައްމަދު އައިޝް މުޞްޠަފާ އެވެ. މި ބަހުސްގައި އެފް.އެސް.އެލް އިން ބަހުސްކުރީ މައުޟޫއާ ދެކޮޅަށެވެ.
އެރޭގެ ދެވަނަ ބަހުސްގައި ބައްދަލުކުރީ އެފް.އީ އަދި ފެކަލްޓީ އޮފް ހެލްތު ސައިންސަސް (އެފް.އެޗް.އެސް) އެވެ. މި ބަހުސް އެފް.އީ އިން ކާމިޔާބުކުރީ 579-399ގެ ނަތީޖާއަކުންނެވެ. މި ބަހުސްގެ އެންމެ މޮޅު ބަހުސްކުރުންތެރިޔަކީ އެފް.އީގެ ފާޠިމަތު އަހްލާ މޫސާ އެވެ. މި ބަހުސްގެ މައުޟޫ އަކީ ”އުފެއްދުންތެރިކަން އިތުރުކުރުމަށް އެންމެ މުހިންމީ ކުމެވިތައް ފުޅާ ކުރުމެވެ.“ ކަމަށްވާއިރު، މި ބަހުސްގައި އެފް.އީ އިން ބަހުސްކުރީ މައުޟޫއާ އެއްކޮޅަށެވެ.
މި ނަތީޖާއާއެކު އެފް.އީ އިން ވަނީ ގްރޫޕް ސްޓޭޖުގެ ހުރިހާ ބަހުސަކުން މޮޅުވެ، ގްރޫޕްގެ އެއްވަނައިގައި ސެމީ ފައިނަލަށް ދަތުރުކޮށްފައެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ދިވެހި ބަސް ދިރުވައި އާލާކޮށް، ބަހުގެ ހަމަތަކާ އެއްގޮތަށް ދިވެހިބަސް ބޭނުން ކުރަން ބާރުއެޅުމަށާއި ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ ސިލްސިލާކޮށް ބޭއްވޭ މި މުބާރާތުގެ 10 ވަނަ މުބާރާތެވެ.
