ހޭންޑްބޯޅަ ފިރިހެން ޓީމުން ހިތްވަރާއެކު ކުޅުނު ނަމަވެސް ފުރަތަމަ މެޗު ކާމިޔާބުކުރެވޭ ގޮތެއްނުވި!

ސްޓޫޑެންޓް ޔޫނިއަން އޮފް އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް.އެސް.ޔޫ) އާއި ހޭންޑްބޯލް އެސޯސިއޭޝަން އޮފް ދަ މޯލްޑިވްސްއާ ގުޅިގެން ބާއްވާ އައި.ޔޫ.އެމް.އެސް.ޔޫ ހޭންޑްބޯލް ފިއެސްޓާ 2023 ގެ ފިރިހެން ޑިވިޝަނުގައި ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އިން ކުޅުނު ފުރަތަމަ މެޗު މެޕްސް ކޮލެޖުން ކާމިޔާބުކޮށްފިއެވެ.

އޮގަސްޓް 26 ވީ ހޮނިހިރު ދުވަހު ހަވީރު 04:15ގައި ފެށި ނޭޝަނަލް ހޭންޑްބޯލް ކޯޓުގައި ކުޅުނު މި މެޗު މެޕްސް ކޮލެޖުން ކާމިޔާބުކުރީ 12 – 7ގެ ނަތީޖާއަކުންނެވެ. މެޗުން ބަލިވި ނަމަވެސް، މި މެޗުގައި އެމް.އެން.ޔޫ ޓީމުން ވަނީ ހިތްވަރާއެކު ކުޅެފައެވެ.

މި މުބާރާތުގައި އެމް.އެން.ޔޫގެ އަންހެން ޓީމު ކުޅުނު ފުރަތަމަ މެޗުވަނީ ކާމިޔާބުކޮށްފައެވެ. އަންހެން ޓީމުގެ ދެވަނަ މެޗު ކުޅުމަށް ހަމަޖެހިފައިވަނީ އާދީއްތަދުވަހުގެ ހަވީރުކަމަށްވާއިރު ހަމަ އެދުވަހުގެރޭ ފިރިހެން ޓީމުގެ ދެވަނަ މެޗު ކުޅުމަށްވަނީ ހަމަޖެހިފައެވެ.

އައި.ޔޫ.އެމް.އެސް.ޔޫ ހޭންޑްބޯލް ފިއެސްޓާ 2023 ގެ އަންހެން އަދި ފިރިހެން ޑިވިޝަނުގައި އެމް.އެން.ޔޫ އިން ވަނީ ބައިވެރިވެފައެވެ. މި މުބާރާތުގެ މިދިޔަ އަހަރުގެ އަންހެން ޗެމްޕިއަނަކީ އެމް.އެން.ޔޫ އެވެ.