ދިވެހިރާއްޖޭގެ ޤައުމީ ޔުނިވާސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އާއި ސްޓޫޑެންޓްސް އިނީޝިއޭޓިވް އޮފް އާރޓްސް (ސިއާ) ގުޅިގެން ބޭއްވި އެމް.އެން.ޔޫ.އެސް.ޔޫ ސިއާ 6 ވަނަ މަދަޙަ މުބާރާތް 1445ގެ ގްރޫޕް މަދަޙައިގެ އެއްވަނަ މިފަހަރުވެސް ފެކަލްޓީ އޮފް އެޑިއުކޭޝަންގެ ގްރޫޕް 1 ހޯދިއިރު ވަކިވަކި މަދަޙައިގެ ބައިން 1 ވަނަ ފެކަލްޓީ އޮފް ހެލްތް ސައިންސަސްގެ ދަރިވަރު މަރިޔަމް ޒިމާ މޫސާ ހޯދައިފިއެވެ.
އެމް.އެން.ޔޫ ސީއޭ އޮޑިޓޯރިއަމްގައި މި މަހު 25 އިން 27 އަށް ކުރިއަށް ދިޔަ މި މުބާރާތުގައި ވަކިވަކި ދަރިވަރުންގެ ބައިގައި ޖުމްލަ 56 ދަރިވަރުންވަނީ މަދަޙަ ހުށައަޅާފައެވެ. މިބައިން ގަދަ ފަހެއް ހޮވާފައިވާއިރު ފަސްވަނަ ލިބިފައިވަނީ ސްކޫލް އޮފް ނާސިންގެ ދަރިވަރު ފާތިމަތު މަފާޒާއެވެ. ހަތަރުވަނަ ފެކަލްޓީ އޮފް އެޑިއުކޭޝަންގެ ދަރިވަރު ފާތިމަތު އަހްލަމް ހޯދިއިރު ތިން ވަނަ ހޯދައިފައިވަނީ ފެކަލްޓީ އޮފް އާޓްސްގެ ދަރިވަރު މަރިޔަމް ރިފްގާއެވެ. ދެވަނަ ލިބިފައިވަނީ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒްގެ ދަރިވަރު ނާއިޝް މުހައްމަދު ޝާހިދުއެވެ. ފަޚުރުވެރި އެއްވަނަ ހޯދީ އެފް.އެޗް.އެސްގެ ދަރިވަރު މަރިޔަމް ޒިމާއެވެ. ގަދަ ފަހަކަށް ހޮވުނު ދަރިވަރުންނަށް ހަނދާނީ ލިޔުމާއި ޓްރޮފީ ހަވާލުކޮށްފައިވަނީ މިރޭ އޮތް މަދަޙަ މުބާރާތުގެ ނިންމުމުގެ ރަސްމިޔާތުގައި އެމް.އެން.ޔޫ.އެސް.ޔޫ.އެސް.ޔޫގެ މީޑިއާ ކޯރޑިނޭޓަރ ހަސްނާ ވިޝާމްއެވެ.
މުބާރާތުގެ ގްރޫޕް މަދަޙައިގެ ބައިގައި 9 ފެކަލްޓީ އިން 14 ގްރޫޕް ބައިވެރިވިއިރު މި ބައިން ތިން ވަނަ ދެ ގްރޫޕަކުން ވަނީ ހޯދައިފައެވެ. އެއީ ސްކޫލް އޮފް މެޑިސިންގެ ގްރޫޕް 1އާއި ސްކޫލް އޮފް ނާސިންގެ ގްރޫޕް 2އެވެ. ދެ ވަނަ އަށް ހޮވިފައިވަނީ ފެކަލްޓީ އޮފް ހޮސްޕިޓަލިޓީ އެންޑް ޓޫރިޒަމް ސްޓަޑީޒްގެ ގްރޫޕް 1އެވެ. އެއްވަނަ ހޯދައިފައިވަނީ 1444 ވަނަ އަހަރުގެ މަދަޙަ މުބާރާތުގެ ގްރޫޕް މަދަޙައިގެ ބައިން އެއްވަނަ ހޯދި ފެކަލްޓީ އޮފް އެޑިއުކޭޝަންގެ ގްރޫޕް 1އެވެ. މިބައިން ވަނަތަކަށް ދިޔަ ފަރާތްތަކަށް ހަނދާނީ ލިޔުމާއި ޓްރޮފީ ދީފައިވަނީ އެމް.އެން.ޔޫ.އެސް.ޔޫގެ ނައިބު ރައީސް (ޢިލްމީ) މުޙައްމަދު ނާބިތު އަޙްމަދުއެވެ.
މަދަޙަ މުބާރާތުގެ އެންމެ މޮޅު ތިން ފެކަލްޓީވެސް ވަނީ ހޮވާފައެވެ. ތިން ވަނަ ފެކަލްޓީ އަށް ހޮވިފައިވަނީ ފެކަލްޓީ އޮފް ޝަރީޢާ އެންޑް ލޯއެވެ. ދެވަނަ އަށް ގޮސްފައިވަނީ ސްކޫލް އޮފް ނާސިންއެވެ. އެއްވަނަ ލިބިފައިވަނީ ސްކޫލް އޮފް މެޑިސިންއެވެ. އެމް.އެން.ޔޫ.އެސް.ޔޫގެ ނައިބު ރައީސް (ގޮފިތައް) ސައިފުﷲ މުސްލިމް ވަނީ މި ފެކަލްޓީތަކަށް ހަނދާނީ ލިޔުމާ ޓްރޮފީ ހަވާލުކޮށްފައެވެ.
މި މުބާރާތް ކާމިޔާބުކަމާއެކު ނިންމާލުމަށް ގިނަ ފަރާތްތަކެއްގެ އެހީތެރިކަން ލިބިފައިވާކަން ފާހަގަ ކުރަށްވާ، މިމުބާރާތުގެ ހިންގާ ކޮމެޓީގެ ނައިބު ރައީސް އާދަމް ޝާއިއު ދެއްކި ވާހާކަ ފުޅުގައިވަނީ އެކި ގޮތްގޮތުން އެހީތެރިކަން ފޯރުކޮށްދެއްވި ފަރާތްތަކަށް ޝުކުރުއަދާކުރަށްވާފައެވެ. އަދި މުބާރާތުގެ ފެންވަރު ރަގަޅުކުރުމަށް ގިނަ މަސައްކަތްތަކެއް ކުރެވޭއިރު، ކާމިޔާބު މުބާރާތެއް ނިންމާލުމުގައި ގޮފިތަކުގެ މެމްބަރުންނާއި، އިސްވާރުންނާއި، ޔޫނިއަން އަދި މުބާރާތުގެ ހިންގާކޮމެޓީގެ މެމްބަރުންގެ ބުރަ މަސައްކަތް ޝާއިއު ފާހަގަކުރެއވިއެވެ.
މީގެއިތުރުން މި މުބާރާތައް ޅެންވެރިންގެ ޖަމިއްޔާގެ ފަރާތުން ދެއްވާ އެއްބާރުލުމާއި އެހީތެރިކަން ފާހަގަ ކުރައްވާ ދަރިވަރުންގެ ޔޫނިއަންގެ ފަރާތުން ޅެންވެރިންގެ ޖަމިއްޔާއަށް ވަނީ ހަދާނީ ފިލައެއް އަރުވާފައެވެ.
އަހަރަކަށްވުރެ އަހަރެއް މިމުބާރާތުގެ ވާދަވެރިކަން އަިތުރުވަމުން އަންނަ އިރު ޖުމުލަ ގޮތެއްގައި ހުރިހާ ބައިވެރިންގެ ހުނަރުވެރިކަމާއި، މަދަހަ ކިޔުމުގެ ފެންވަރު ރަގަޅުކަން ޖަޖުންވަނީ ފާހަގަ ކުރައްވާފައެވެ.
މިމުބާރާތުގެ މައިގަނޑު އެއް އަމަޒަކީވެސް މަދަހަ ކިޔުމަށް މޮޅު ފަންނުވެރިނަތަކެއް އުފެއްދުމެވެ.
