އެފް.އެސް.އެލް ސެމީއަށް ދަތުރުކުރިއިރު، އެސް.އެމް އަދި އެފް.އޭ އަށް އިތުރު މޮޅެއް!

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ އެމް.އެން.ޔޫ.އެސް.ޔޫ ބަހުސް މުބާރާތް 2024ގެ ހަތަރުވަނަ ރޭގެ ފުރަތަމަ ބަހުސް ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އިން ކާމިޔާބުކޮށް ސެމީއަށް ދަތުރުކުރިއިރު، އެރޭ ސްކޫލް އޮފް މެޑިސިންގ (އެސް.އެމް) އަދި ފެކަލްޓީ އޮފް އާރޓްސް އިން ކުރި ބަހުސްތަކުން މޮޅުވެއްޖެއެވެ.

20 މެއި ވީ ހޯމަ ދުވަހުގެ ރޭ އެމް.އެން.ޔޫ ސެންޓްރަލް އެޑްމިނިސްޓްރޭޝަން އޮޑިޓޯރިއަމްގައި ކުރިއަށްދިޔަ މި ބަހުސްތަކުގެ ތެރެއިން ފުރަތަމަ ބަހުސްގައި އެފް.އެސް.އެލްގެ ޓީމުން ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް)ގެ މައްޗަށް ކުރި ހޯދާ ސެމީި ފައިނަލުން ޖާގަ ކަށްވަރުކޮށްފައިވަނީ 778 – 722 ގެ ނަތީޖާއަކުންނެވެ. މި ބަހުސްގެ މައުޟޫއަކީ ”މަސްތުވާތަކެތީގެ މައްސަލަ ހައްލުކުރުމަށް އެންމެ މުހިންމީ ޤާނޫނުތައް ހަރުކަށިކުރިމެވެ.“ މި މައުޟޫއާއި ދެކޮޅަށް ބަހުސްކޮށް އެންމެ މޮޅު ބަހުސްކުރުންތެރިޔާގެ މަޤާމު ހާސިލްކޮށްފައިވަނީ އެފް.އެސް.އެލްގެ މުޙައްމަދު އައިޝް މުސްތަފާއެވެ.

ދެވަނަ ބަހުސްގައި ބައްދަލުކުރީ އެސް.އެމް އާއި އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް)އެވެ. މި ބަހުސް އެސް.އެމް އިން ކާމިޔާބު ކޮށްފައިވަނީ 863 – 548ގެ ނަތީޖާއަކުން އައި.ޔޫ.އެމްގެ މައްޗަށް ކުރިހޯދައިގެންނެވެ. ”ތިމާވެށި ހިމާޔަތްކުރުމަށް އެންމެ މުހިންމީ ޤާނޫނުތައް ތަންފީޒު ކުރުމެވެ.“ މި މައުޟޫއަށް ކުރި ބަހުސްގައި އެސް.އެމް އިން ބަހުސްކޮށްފައިވަނީ މައުޟޫއާ އެއްކޮޅަށެވެ. މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެސް.އެމްގެ އަނޫފް އަބުދުﷲ އެވެ.

އެރޭގެ ފަހު ބަހުސް އެފް.އޭ އިން ކާމިޔާބު ކުރީ އެމް.އެން.ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް) މައްޗަށް ކުރިހޯދައިގެންނެވެ. ”ދިވެހިރާއްޖޭގެ ވަރި ގިނަވުމުގެ އަސްލަކީ ބޯހިޔާވަހިކަމުގެ ދަތިކަމެވެ.“މި މައުޟޫއާއި ދެކޮޅަށް ވަކާލާތުކޮށް އެފް.އޭ އިން ބަހުސް ކާމިޔާބު ކުރީ 678 – 538ގެ ނަތީޖާއަކުންނެވެ. މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެފް.އޭގެ އަޙްމަދު ބާސިޤް މުހައްމަދުއެވެ.

މިބަހުސް މުބާރާތުގެ ގްރޫޕް ސްޓޭޖްގެ އެންމެ ފަހު ބަހުސްތައް މާދަމާ 21 މެއި ވާ އަންގާރަ ދުވަހުގެ ރޭ ހަމަ އެމް.އެން.ޔޫ ސެންޓްރަލް އެޑްމިނިސްޓްރޭޝަން އޮޑިޓޯރިއަމްގައި އޮންނާނެއެވެ. އަދި މާދަމާގެ ބަހުސްތަކަށްފަހު ސެމީ ފައިނަލުގައި ވާދަކުރާނެ ޓީމުތަކުގެ މައުޟޫ ގުރުނެގުމަށްވަނީ ހަމަޖެހިފައެވެ.

އެމް.އެން.ޔޫ.އެސް.ޔޫ ބަހުސް މުބާރާތަކީ ދަރިވަރުންގެ ޔޫނިއަންގެ ފަރާތުން ބާއްވާ އެއްމެ ބޮޑު އެއް އިލްމީ ހަރަކާތެވެ. މިއަހަރު މި ބޭއްވެނީ 2013 ވަނަ އަހަރުން ފަށައިގެން ސިލްސިލާގޮތެއްގައި މެދުކެނޑުމެއްނެތި ބާއްވަމުން އަންނަ މި މުބާރާތުގެ 11 ވަނަ މުބާރާތެވެ.