ބީ.އެމް.އެލް އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2024 ފަށައިފިއެވެ.
އޮކްޓޫބަރ 24 ވަނަ ދުވަހުގެ ރޭ ހުޅުމާލެ ރެހެނދި ދަނޑުގައި ބޭއްވި މި މުބާރާތް ފެށުމުގެ ރަސްމިއްޔާތު ޝަރަފުވެރިކޮށްދެއްވީ ދިވެހިރާއްޖޭގެ ހަޔާ އެޑިއުކޭޝަން މިނިސްޓަރ ޑރ. މަރިޔަމް މާރިޔާ އެވެ. މީގެ އިތުރުން އެމް.އެން.ޔޫގެ އިސްވެރިންނާއި އެހެނިހެން ކޮލެޖް ޔުނިވަރސިޓީގެ އިސްބޭފުޅުން ވަނީ ބައިވެރިވެ ވަޑައިގަންނަވާފައެވެ.
މި މަހުގެ 24 ވަނަ ދުވަހުން ފެށިގެން ނޮވެމްބަރ މަހުގެ 08 ވަނަ ދުވަހުގެ ނިޔަލަށް ކުރިއަށްގެންދިޔުމަށް ހަމަޖެހިފައިވާ މި މުބާރާތުގައި ޖުމުލަ 30 ވަނީ ބައިވެރިވެފައެވެ. އެއީ އަންހެން ޑިވިޝަނުގެ 12 ޓީމާއި ފިރިހެން ޑިވިޝަނުގެ 18 ޓީމެވެ. މި މުބާރާތުގެ ހުރިހާ މެޗެއްވެސް ކުޅުމަށް ހަމަޖެހިފައިވަނީ ހުޅުމާލެ ޓާފު ދަނޑުގައެވެ.
ޗެމްޕިއަން ޓީމަށް 10،000.00ރ އަދި ރަނަރަޕް ޓީމަށް 5،000.00ރ ގެ ފައިސާގެ އިނާމެއް ހުށައަޅާފައިވާ މި މުބާރާތް ފެށުމުގެ ގޮތުން މުޅިން އަލަށް ތައާރަފްކުރެވުނު ވިކްޓްރީ ޝީލްޑް މެޗެއް ކުޅެވިގެންދާނެއެވެ. މި މެޗުގައި ބައްދަލުކުރާނީ 2023 ވަނަ އަހަރުގެ ޗެމްޕިއަން ޓީމް އެމް.އެން.ޔޫ ބިޒްނަސް ސްކޫލާއި 2022 ވަނަ އަހަރުގެ ޗެމްޕިއަނުން ކަމުގައިވާ މެޕްސް ކޮލެޖެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ މަތީ ތަޢުލީމު ދާއިރާގައި ބޭއްވިގެންދާ އެންމެ ބޮޑު ކުޅިވަރު މުބާރާތެވެ. އަދި އެމް.އެން.ޔޫ.އެސް.ޔޫގެ އެންމެ ބޮޑު އަދި އެންމެ ޝަރަފުވެރި ހަރަކާތްވެސްމެއެވެ. މިއަހަރު ބޭއްވިގެން މިދަނީ ސިލްސިލާގޮތެއްގައި ބާއްވަމުންދާ މި މުބާރާތުގެ 10 ވަނަ މުބާރާތެވެ.
