=
މައިނާ އެމް.އެން.ޔޫ.އެސް.ޔޫ އިންޓަރ-ފެކަލްޓީ ވޮލީބޯޅަ މުބާރާތް 2025ގެ ފިރިހެން ޑިވިޜަނުގެ ފައިނަލަށް ފެކަލްޓީ އޮފް އެޑިއުކޭޝަން (އެފް.އީ) އާއި ސްކޫލް އޮފް ނާސިންގ (އެސް.އެން) ދަތުރުކޮށްފިއެވެ.
ރޭ އެމް.އެން.ޔޫގެ ޕީއީ ހޯލުގައި ކުޅުނު ސެމީ ފައިނަލްގެ ފުރަތަމަ މެޗުގައި ބައްދަލުކޮށްފައިވަނީ އެސް.އެން އާއި ފެކަލްޓީ އޮފް އެންޖިނިއަރިންގ، ސައިންސް އެންޑް ޓެކްނޮލޮޖީ (ފެސްޓް)އެވެ. މި މެޗު 3-0 ސެޓުން އެސް.އެން ކާމިޔާބުކޮށްފައިވާއިރު، އެ ޓީމުގެ އަލީ އާނިމް ޝާހިދު ވަނީ އެންމެ މޮޅު ކުޅުންތެރިޔާގެ މަޤާމު ހޯދާފައެވެ.
ސެމީ ފައިނަލުގެ ދެވަނަ މެޗުގައި އެފް.އީ އާއި އެމް.އެން.ޔޫ ބިޒްނަސް ސްކޫލް ބައްދަލުކުރި މެޗު 3-0 ސެޓުން ކާމިޔާބުކޮށްފައިވަނީ އެފް.އީ އެވެ. މި މެޗުގެ އެންމެ މޮޅު ކުޅުންތެރިއަކަށް އެފް.އީގެ އަރުޝަދު އަޝްރަފް ވަނީ ހޮވިފައެވެ.
މިރޭ ކުޅުނު އަންހެން ޑިވިޜަނުގެ ގްރޫޕް ސްޓޭޖްގެ ފަހު މެޗުގައި ފެސްޓާއި ސްކޫލް އޮފް މެޑިސިން ބައްދަލުކޮށްފައިވާއިރު، މި މެޗު 2-0 ސެޓުން ކާމިޔާބުކޮށްފައިވަނީ ފެސްޓުންނެވެ. މި މެޗުގެ އެންމެ މޮޅު ކުޅުންތެރިއަކަށްވެސް ހޮވިފައިވަނީ ފެސްޓުގެ ޙައްވާ މުޒުނާއެވެ.
މި މުބާރާތުގެ އަންހެން ޑިވިޜަނުގެ ސެމީ ފައިނަލް މެޗުތައް މިރޭ އެމް.އެން.ޔޫ ޕީއީ ހޯލުގައި ކުޅުމަށް ހަމަޖެހިފައިވާއިރު، ފުރަތަމަ ސެމީގައި ބައްދަލުކުރާނީ އެސް.އެން އާއި އެފް.އީ އެވެ. ދެވަނަ މެޗުގައި އެމް.އެން.ޔޫ ބިޒްނަސް ސްކޫލާއި ސެންޓަރ ފޯރ ފައުންޑޭޝަން ސްޓަޑީޒް އެވެ.
މި އަހަރުގެ މުބާރާތުގެ މެއިން ސްޕޮންސަރަކީ މައިނާ އެވެ. މީގެ އިތުރުން ސްޕޮންސަރުންގެ ގޮތުގައި ވުޑިކޯ، އޭޕެކްސް، އޮބިއޮން އަދި ދިރާގު ހިމެނެ އެވެ. މީގެ އިތުރުން މި ފަހަރުގެ މުބާރާތުގެ މީޑިއާ ޕާޓްނަރަކީ ހުލާސާ އެވެ.
