ދިރާގު އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2025 ގައި ހޮނިހިރު ދުވަހު ކުޅުނު ފިރިހެން ޑިވިޝަނުގެ ގްރޫޕް ބީގެ މެޗުތައް ފެކަލްޓީ އޮފް އެޑިއުކޭޝަން (އެފް.އީ) އަދި ފެކަލްޓީ އޮފް އަރޓްސް (އެފް.އޭ) އިން ކާމިޔާބުކޮށްފިއެވެ.
ގްރައުންޑް 1 ގައި ކުޅުނު މެޗު ކްލިކް ކޮލެޖާ ވާދަކޮށް އެފް.އީ އިން ކާމިޔާބު ކުރީ 7 – 0 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ އެފް.އީގެ ޖަރޒީ ނަންބަރު 10 ރައުހާން ރިފްއަތެވެ. މި މޮޅާއެކު އެފް.އީ އިން ވަނީ ކުއާޓާގެ ޖާގައެއް ޔަގީންކޮށްފައެވެ. ޖުމްލަ ހަ ޕޮއިންޓާއެކު އެފް.އީ އޮތީ ގްރޫޕް ތާވަލުގެ އެއްވަނައިގައެވެ.
ގްރައުންޑް 2 ގައި ކުޅުނު މެޗު ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް)އާ ވާދަކޮށް އެފް.އޭ އިން ކާމިޔާބުކުރީ 12 – 1 ގެ ތަފާތު ބޮޑު ނަތީޖާއަކުންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ އެފް.އޭގެ ޖަރޒީ ނަންބަރު 99 މިދުހަތު ފާއިޒެވެ. މި މޮޅާއެކު އެފް.އޭ ވަނީ ތިން ޕޮއިންޓާއެކު ގްރޫޕް ތާވަލުގެ ދެވަނަ އަށް ޖެހިލާފައެވެ. ހަމަ މިއަދަދަށް ޕޮއިންޓް ހޯދައިގެން ތިންވަނައިގައި އޮތީ ކްލިކް ކޮލެޖެވެ. ކުޅުނު ދެ މެޗުން ބަލިވި އެފް.އެސް.އެލް އޮތީ ގްރޫޕްގެ ހަތަރުވަނައިގައެވެ.
މި މަހުގެ 15 އިން 30ގެ ނިޔަލަށް ކުރިއަށްގެންދިޔުމަށްހަމަޖެހިފައިވާ މި މުބާރާތުގައި ޖުމުލަ 27 ޓީމު ވަނީ ބައިވެރިވެފައެވެ. މި މުބާރާތުގެ ހުރިހާ މެޗެއްވެސް ކުޅުމަށް ހަމަޖެހިފައިވަނީ ހުޅުމާލެ ރެހެންދި ދަނޑުގައެވެ.
މިއަހަރުގެ މުބާރާތުގެ ޓައިޓްލް ސްޕޮންސަރަކީ ދިރާގެވެ. ކޯ-ސްޕޮންސަރަކީ ލިއެން ޝުއޭ ޝިން ނޫޑްލް ރެސްޓޯރެންޓެވެ. މުބާރާތުގެ ބޭންކިން ޕާޓްނަރަކީ ބޭންކް އޮފް މޯލްޑިވްސް (ބީ.އެމް.އެލް) އެވެ. މުބާރާތުގެ ކިޓް ޕާޓްނަރަކީ މެނީ މޯލްޑިވްސް އެވެ. އަދި މީޑިއާ ޕާޓްނަރަކީ ވޮއިސް ސްޕޯޓްސް އެވެ. މުބާރާތުގެ ސްޕޮންސަރުންގެ ތެރޭގައި ކުޅިވަރާއި ހަށިހެޔޮކަމާ ބެހޭ ވުޒާރާ އާއި ސްޓޭޓް ޓްރޭޑިން އޯގަނައިޒޭޝަން (އެސް.ޓީ.އޯ) އަދި އެލައިޑް އިންޝުއަރެންސް ހިމެނޭއިރު، މުބާރާތުގެ ޕާޓްނަރުންގެ ތެރޭގައި ގޯލްޑަން ފުޓްސަލް އެސޯސިއޭޝަން، ޔުނިވިޔަ، މާލެ ސިޓީ ކައުންސިލް އަދި އޮބިއޮން ހިމެނެއެވެ.
