ދިރާގު އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2025 ގެ އަންހެން ޑިވިޝަނުގައި ބުދަދުވަހު ކުޅުނު ގްރޫޕް ބީގެ މެޗު ފެކަލްޓީ އޮފް ހެލްތު ސައިންސަސް (އެފް.އެޗް.އެސް) އިން ކާމިޔާބު ކުރިއިރު، ގްރޫޕް ސީގެ މެޗުން ވިލާ ކޮލެޖު މޮޅުވެއްޖެއެވެ.
ގްރައުންޑް 1 ގައި ކުޅުނު އެފް.އެޗް.އެސް އާއި ސްކޫލް އޮފް ނާރސިންގ (އެސް.އެން)ގެ މެޗު އެފް.އެޗް.އެސް އިން ކާމިޔާބު ކުރީ 1 – 0ގެ ނަތީޖާއަކުންނެވެ. މި މެޗުގައި ޖެހި ހަމައެކަނި ގޯލު ޖެހީ މެޗުގެ މޮޅު ކުޅުންތެރިޔާ އެފް.އެޗް.އެސްގެ ޖަރޒީ ނަންބަރު 12 އާމިނަތު ޝަފާނާ ޢަލީއެވެ.
ގްރައުންޑް 2 ގައި ކުޅުނު މެޗުން ވިލާ ކޮލެޖު މޮޅުވީ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް)އާ ވާދަކޮށް 7 – 0 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިޔާ ވިލާ ކޮލެޖުގެ ޖަރޒީ ނަންބަރު 3 ފާޠިމަތު ނިހާމާ ތިން ގޯލު ޖަހާފައިވާއިރު، ޖަރޒީ ނަންބަރު 11 މުޒްނާ ޢަލީ މުޙައްމަދު ވަނީ ދެ ގޯލު ޖަހާފައެވެ. އަދި އެ ޓީމުގެ ޖަރޒީ ނަންބަރު 22 ޢާއިޝަތު ހަނާން ޝަރީފް އާއި ޖަރޒީ ނަންބަރު 17 ޝާނީ ރަޝީދުވެސް ވަނީ މި މެޗުގައި ގޯލު ޖަހާފައެވެ.
މި ނަތީޖާތަކާއެކު އަންހެން ޑިވިޝަނުގެ ގްރޫޕް ބީގެ އެއްވަނަ ޓީމުގެ ގޮތުގައި އެފް.އެޗް.އެސް ވަނީ ކުއާޓާ ފައިނަލުން ޖާގަ ހޯދާފައެވެ. އަދި ގްރޫޕް ސީގެ ތިންވަނަ ޓީމަކީ އެފް.އެޗް.ޓީ.އެސްކަން ޔަގީންވެފައިވާއިރު އެ ޓީމުން ދެން ޖެހޭނީ ޕްލޭއޮފް މެޗު ކުޅޭށެވެ.
މި މަހުގެ 15 އިން 30ގެ ނިޔަލަށް ކުރިއަށްގެންދިޔުމަށްހަމަޖެހިފައިވާ މި މުބާރާތުގައި ޖުމުލަ 27 ޓީމު ވަނީ ބައިވެރިވެފައެވެ. މި މުބާރާތުގެ ހުރިހާ މެޗެއްވެސް ކުޅުމަށް ހަމަޖެހިފައިވަނީ ހުޅުމާލެ ރެހެންދި ދަނޑުގައެވެ.
މިއަހަރުގެ މުބާރާތުގެ ޓައިޓްލް ސްޕޮންސަރަކީ ދިރާގެވެ. ކޯ-ސްޕޮންސަރަކީ ލިއެން ޝުއޭ ޝިން ނޫޑްލް ރެސްޓޯރެންޓެވެ. މުބާރާތުގެ ބޭންކިން ޕާޓްނަރަކީ ބޭންކް އޮފް މޯލްޑިވްސް (ބީ.އެމް.އެލް) އެވެ. މުބާރާތުގެ ކިޓް ޕާޓްނަރަކީ މެނީ މޯލްޑިވްސް އެވެ. އަދި މީޑިއާ ޕާޓްނަރަކީ ވޮއިސް ސްޕޯޓްސް އެވެ. މުބާރާތުގެ ސްޕޮންސަރުންގެ ތެރޭގައި ކުޅިވަރާއި ހަށިހެޔޮކަމާ ބެހޭ ވުޒާރާ އާއި ސްޓޭޓް ޓްރޭޑިން އޯގަނައިޒޭޝަން (އެސް.ޓީ.އޯ) އަދި އެލައިޑް އިންޝުއަރެންސް ހިމެނޭއިރު، މުބާރާތުގެ ޕާޓްނަރުންގެ ތެރޭގައި ގޯލްޑަން ފުޓްސަލް އެސޯސިއޭޝަން، ޔުނިވިޔަ، މާލެ ސިޓީ ކައުންސިލް އަދި އޮބިއޮން ހިމެނެއެވެ.
