ދަރިވަރުންގެ ޔޫނިއަންގެ ގޮފިތަކުގެ ތެރެއިން 2025 ވަނަ އަހަރު އެންމެ ހަރަކާތްތެރި ގޮތްޕަކަށް އެމް.އެން.ޔޫ ބިޒްނަސް ސްކޫލްގެ ގޮފި ބިޒްނަސް ސްކޫލް ސްޓޫޑަންޓް އެސޯސިއޭޝަން (ބީ.އެސް.އެސް.އޭ) އަދި އަތޮޅުތެރޭގެ އެންމެ ހަރަކާތްތެރި ގޮތްޕަކަށް ކުޅުދުއްފުށި ކެންޕަހުގެ ގޮފި ގުރުޒު، އަދި ތިނަދޫ ކެމްޕަހުގެ ގޮފި ނޭކަ ހޮވިއްޖެއެވެ.
ގޮފިތަކުގެ ވަނަތައް އިޢުލާން ކުރެވިފައިވަނީ ދަރިވަރުންގެ ޔޫނިއަންގެ 14 ވަނަ ދައުރުގެ ހިންގާ ކޮމިޓި އިފްތިތާހް ކުރުމަށާއި، ޔޫނިއަންގެ އެކިއެކި އެވޯޑްތައް ދިނުމަށް ރޭ ބޭއްވުނު ޚާއްސަ ރަސްމިއްޔާތުގައެވެ. މިރަސްމިއްޔާތުގައި ގޮފިތަކުގެ ތެރެއިން އެއްވަނަ، ދެވަނަ އަދި ތިންވަނަޔަށް އެންމެ ހަރަކާތްތެރި ގޮތްޕާއި، އަތޮޅުތެރޭގެ އެންމެ ހަރަކާތްތެރި ގޮތްޕާއި، އަހަރުގެ ތެރޭގައި އެންމެ ބޮޑު ކުރިއެރުމެއް ހޯދި ގޮތްޕާއި، އެންމެ ގިނަ ކާމިޔާބީތައް ހޯދި ފެކަލްޓީއަށް ވަނީ އެވޯޑް ދެވިފައެވެ.
ރޭގެ ހަފްލާގައި އެންމެ ބޮޑު ކުރިއެރުމެއް ހޯދި ގޮފީގެ މަގާމް ވަނީ ދެގޮތްޕަކުން ހާސިލު ކޮށްފައެވެ. އެއީ ފެކަލްޓީ އޮފް ހެލްތު ސައިންސަސްގެ ގޮފި ހީލަރސް، އަދި ފެކަލްޓީ އޮފް އިންޖިއަރިން ސައިންސް އެންޑް ޓެކްނޮލޮޖީގެ ގޮފި އިންޖިނިއަރިންގ ސައިންސް އެންޑް ޓެކްނޮލޮޖީ އެސޯސިއޭޝަން (އެސްޓާ) އެވެ. ހަމަ އެފަދައިން ތިންވަނައަށް އެންމެ ހަރަކާތްތެރި ގޮފީގެ މަގާމުވެސް ވަނީ ދެގޮތްޕަކުން ހޯދާފައެވެ. އެއީ ސްކޫލް އޮފް މެޑިސިންގެ ގޮފި، ކޮންސޯޓިއަމް އޮފް މެޑިކަލް ސްޓޫޑަންޓްސް (މެޑިކޯސް) އަދި ފެކަލްޓީ އޮފް ޝަރީޢާ އިން ލޯގެ ގޮފި ސޮސައިޓީ އޮފް ޝަރީޢާ އެންޑް ލޯ (އެސް.އެސް.އެލް) އެވެ. މީގެ އިތުރުން ފެކަލްޓީ އޮފް އެޑިއުކޭޝަން ގެ ގޮފި ފެކަލްޓީ އޮފް އެޑިއުކޭޝަން ސްޓޫޑަންޓް އެސޯސިއޭޝަން (ފެސާ) އިން ވަނީ ދެވަނަ އަށް އެންމެ ހަރަކާތްތެރި ގޮފީގެ މަގާމު ހޯދާފައެވެ. މީގެ އިތުރުން ފެކަލްޓީ އޮފް އެޑިއުކޭޝަނުން ވަނީ މިއަހަރުގެ ގިނަ މުބާރާތްތަކެއްގައި ބޮޑެތި ކާމިޔާބީތަކެއް ހޯދާ، އެންމެ ކާމިޔާބު ފެކަލްޓީގެ މަގާމު ހާސިލުކޮށްފައެވެ.
ހިނގަމުންމިދާ 2025 ވަނަ އަހަރަކީވެސް ގޮފިތަކުގެ ގިނަ އަދި ކާމިޔާބު ހަރަކާތްތަކެއް ކުރިޔަށް ގެންދިޔަ އަހަރެކެވެ. ގޮފިތަކުން އިސްނަގައިގެން ވަނީ ޔުނިވާސިޓިގެ ދަރިވަރުންނަށް އަމާޒުކޮށްގެން އަދި ޔުނިވާސިޓިގެ ބޭރުން އެކިއެކި ފަރާތްތަކާ ގުޅިގެންވެސް ގިނަ ހަރަކާތްތަކެއް ކުރިޔަށް ގެންގޮސްފައެވެ. ދަރިވަރުންގެ ޔޫނިއަންގެ އެންމެ ހަރަކާތްތެރި ގޮފީގެ އެވޯޑަކީ ޔޫނިއަންގެ 4 ވަނަ ދައުރުގައި 2016 ވަނަ އަހަރު ދޭން ފަށާފައިވާ އެވޯޑެކެވެ.
