ވެސްޓްރޭޑް އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގައި އާދިއްތަ ދުވަހުގެރޭ ކުޅެވުނު އަންހެން ޑިވިޜަނުގެ މެޗުތައް ސްކޫލް އޮފް ނާސިންގ (އެސް.އެން)، ފެކަލްޓީ އޮފް ހެލްތު ސައިންސަސް (އެފް.އެޗް.އެސް)، އެމް.އެން.ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް) އަދި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އިން ކާމިޔާބު ކޮށްފިއެވެ.
ރޭ އަންހެން ޑިވިޜަނުގެ ޖުމުލަ ހަތަރު މެޗެއް ކުޅެފައިވާއިރު، ފުރަތަމަ މެޗުގައި ބައްދަލުކުރީ އެސް.އެން އަދި ސީ.އެފް.އެސް އެވެ. މިމެޗު ސީދާ ދެސެޓުން ކާމިޔާބު ކޮށްފައިވަނީ އެސް.އެން އިންނެވެ. ސެޓުތަށް ގެންގޮސްފައިވަނީ 25-16 އަދި 25-10 އަކުންނެވެ. ދެވަނަ މެޗުގައި އެފް.އެޗް.އެސް އަދި އެފް.އެޗް.ޓީ.އެސް ބައްދަލުކޮށްފައިވާއިރު، މިމެޗުވެސް ދެސެޓުން ކާމިޔާބުކޮށްފައިވަނީ އެފް.އެޗް.އެސް އިންނެވެ. ސެޓުތައް ކާމިޔާބުކޮށްފައިވަނީ 25-9 އަދި 25-6 އަކުންނެވެ.
އަންހެން ޑިވިޜަނުގެ ގްރޫޕް ބީގައި ވެސް ރޭވަނީ ދެމެޗެއް ކުޅެވިފައެވެ. އެގޮތުން އެފް.އީ އަދި އެމް.އެން.ޔޫ.ބީ.އެސްގެ މެޗު ފެނިގެން ދިޔައީ ވަރަށް ފޯރިގަދަ މެޗެއްގެ ގޮތުގައެވެ. ދެ ސެޓު އެއް ސެޓުން އެމް.އެން.ޔޫ.ބީ.އެސް އިން މިމެޗު ކާމިޔާބުކޮށް، ގްރޫޕުގެ އެއްވަނަ ވަނީ އެޓީމުން ކަށަވަރުކޮށްފައެވެ. މެޗުގެ ފުރަތަމަ ސެޓު 25-18 އިން އެފް.އީ އިން ގެންދިޔައިރު، ދެންހުރި ސެޓުތައް އެމް.އެން.ޔޫ.ބީ.އެސް އިން ކާމިޔާބުކޮށްފައިވަނީ 25-22 އަދި 15-10 އަކުންނެވެ. އަންހެން ޑިވިޜަނުގެ ފަހު މެޗުގައި އެފް.އެސް.އެލް އަދި އެސް.އެމް ބައްދަލުކުރި އިރު، ސީދާ ދެ ސެޓުން މިމެޗު ކާމިޔާބު ކޮށްފައިވަނީ އެފް.އެސް.އެލް އިންނެވެ. ސެޓުތައް ހޯދާފައިވަނީ 25-9 އަދި 25-13 އިންނެވެ.
މީގެ އިތުރުން ރޭވަނީ ފިރިހެން ޑިވިޜަނުގެ ގްރޫޕް އޭގެ މެޗެއްވެސް ކުޅެފައެވެ. އެފް.އެސް.އެލް އަދި އެފް.އެޗް.ޓީ.އެސް ވާދަ ކުރި މި މެޗު، ފޯރިގަދަ ކުޅުމަކަށްފަހު ކާމިޔާބުކޮށްފައިވަނީ އެފް.އެޗް.ޓީ.އެސް އިންނެވެ. މެޗުގެ ފުރަތަމަ ސެޓު 30-28 އިން އެފް.އެސް.އެލް ކާމިޔާބު ކުރި ނަމަވެސް، ބާކީ ދެސެޓު 25-14 އަދި 15-10 އަކުން ކާމިޔާބުކުރީ އެފް.އެޗް.ޓީ.އެސް އިންނެވެ.
މުބާރާތުގެ ސެމީ ފައިނަލުގެ މެޗުތައް މާދަމާ ހަވީރު ފެށުމަށް ހަމަޖެހިފައިވާއިރު، މުބާރާތުގެ ފައިނަލް މެޗުތައް ކުޅެން ހަމަޖެހިފައިވަނީ އެޕްރީލް 2 ވަނަ ދުވަހުގެ ހަވީރު އަދި ރޭގަނޑެވެ.
