މިވަގުތު ކުރިޔަށްދާ އެމް.އެން.ޔޫ.އެސް.ޔޫ 13 ވަނަ ބަހުސް މުބާރާތް 2026ގެ ބައެއްގެ ގޮތުގައި މުޅިން އަލަށް ވާހަކަދެއްކުމުގެ ކެޓަގަރީއެއް ތަޢާރަފުކޮށްފިއެވެ.
މުބާރާތުގެ ވާހަކަދެއްކުމުގެ ކެޓަގަރީގެ ހުށަހެޅުންތައް ކުރިޔަށް ގެންގޮސްފައިވަނީ މިދިޔަ ބުރާސްފަތި ދުވަހުގެ ރޭ، އެމް.އެން.ޔޫ ސެންޓްރަލް އޮޑިޓޯރިއަމްގައެވެ. ގައުމީ ޔުނިވާސިޓީގެ ހުރިހާ ފެކަލްޓީތަކަށް ހުޅުވާލެވިގެން ކުރިޔަށް ގެންދިޔަ މިކެޓަގަރީގައި ޖުމްލަ 5 ބައިވެރިޔަކު ވަނީ ވާދަކޮށްފައެވެ. އެކި ދާއިރާތަކުން ގުރުއަތުން ހޮވާލެވުނު މައުޟޫޢުތަކަކަށް ބައިވެރިންގެ ތަގުރީރުތައް ހުށަހަޅާދީފައިވާއިރު، މިކެޓަގަރީ ކުރިޔަށް ގެންގޮސްފައިވަނީ ޤައުމީ ވާހަކަދެއްކުމުގެ މުބާރާތުގެ ޤަވާއިދާ އެއްގޮތަށެވެ.
އެމް.އެން.ޔޫ.އެސް.ޔޫ އިން ބަހުސް މުބާރާތުގެ ތެރެޔަށް މިކެޓަގަރީ ތަޢާރަފުކުރުމުގެ މަޤްޞަދަކީ، ބަހުސް މުބާރާތުގެ ވެސް މައިގަނޑު މަޤްޞަދު ކަމަށްވާ، ދިވެހި ބަސް ދިރުވައި އާލާކޮށް، ބަހުގެ ހަމަތަކާ އެއްގޮތަށް ދިވެހި ބަސް ބޭނުން ކުރަން ބާރުއެޅުމެވެ. އަދި ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ޔޫނިއަނުން ކުރިޔަށް ގެންދާ ހަރަކާތްތަކުގެ ތެރެއިން، އެންމެ ޝަރަފުވެރި އަދި އެންމެ ގިނަދުވަސްވީ އެއް މުބާރާތެވެ. މިމުބާރާތުގެ ޒަރިއްޔާއިން ވާހަކަދެއްކުންތެރިކަމުގެ ފަންނުގައި ހުނަރުވެރި އަދި ރާއްޖޭގައި ފާހަގަކޮށްލެވޭ ފަދަ ގިނަ ޒުވާނުންތަކެއް ވަނީ މުޖުތަމަޢުގެ ތެރެޔަށް ނެރެދީފައެވެ. ޔޫނިއަންގެ އަމާޒަކީ ކުރިޔަށް އޮތް ތަނުގައި މިމުބާރާތް މިހާރަށް ވުރެ ފުޅާކޮށް އިތުރަށް ފުރިހަމަކުރުމެވެ.
