އުންމު އައިމަން

އަސްލު ނަންފުޅާއި ވަނަވަރު:

މިކަމަނާގެ އަސްލު ނަންފުޅަކީ ބަރަކާ ބިންތް ޘަޢްލަބާއެވެ. މިއީ ހަބަޝްކަރައަށް ނިސްބަތްވާ ބޭކަނބަލެކެވެ. ނަބިއްޔާގެ ސީރަތުގައި މިކަމަނާގެ ނަން އައިސްފައިވަނީ ރަސޫލާ ބަލާ ބޮޑުކުރެއްވެވި އަދި ދެވަނަ މަންމައެއްގެ މަޤާމުގައިވާ ފަރާތެއްގެ ގޮތުގައެވެ. އުންމު އައިމަންއަކީ ރަސޫލާގެ ބައްޕާފުޅު ޢަބްދުﷲ  އެކަލޭގެފާނުގެ މަންމާފުޅަށް ހަދިޔާއަކަށް ދެއްވެވި އަޅެކެވެ. ރަސޫލާ ޞައްލަﷲ ޢަލައިހި ވަސައްލަމް ދުނިޔޭގެ އަލިކަން ދެކެވަޑައިގަތީ އެކަމަނާގެ އަތްޕުޅު މައްޗަށެވެ. އަދި ރަސޫލާ ސުވަރުގެ ވަޑައިގެންނެވުމާއި ހަމައަށްވެސް އެކަމަނާ ރަސޫލާގެ ޚިދުމަތުގައި ދެމިހުންނެވިއެވެ.

ރަސޫލާގެ ތުއްޕުޅު އަދި ޒުވާން ދުވަސްވަރު:

ބުނެވޭގޮތުގައި އުންމު އައިމަން ރަސޫލާ ޞައްލަﷲ ޢަލައިހި ވަސައްލަމް އަށްވުރެ 13 އަހަރު ދޮށްޓެވެ. އެހެންނަމަވެސް އެކަމަނާ އަބަދުވެސް ރަސޫލާއާއި ދޭތެރޭ ކަންތައްބެހެއްޓެވީ އަމިއްލަ ދަރިއެއް ފަދައިންނެވެ. އެގޮތުން އާމިނަތުގެފާނު އަވަހާރަވުމާއެކު ރަސޫލާގެ ބެލެނިވެރިކަމާއި ތަރުބިއްޔަތުކުރެއްވުމާއި ރަސްމީކޮށް ޙަވާލުވެވަޑައިގެންނެވިއެވެ. އަދި އެކަލޭގެފާނު ޚަދީޖަތުގެފާނާއި ކައިވެނި ބައްލަވައިގަންނަވަންދެން އެކަމަނާ ހުންނެވީ ހުސްހަށިބަޔަށެވެ. ރަސޫލާ ޞައްލަﷲ ޢަލައިހި ވަސައްލަމް އުންމު އައިމަން އަށް އަބަދުވެސް މުޚާތަބުކުރައްވަނީ މަންމަގެ ނަމުންނެވެ. އަދި އެކަލޭގެފާނު އެހެންމީހުންނަށް އުންމު އައިމަން ތަޢާރަފްކޮށްދެއްވަނީ ”ތިމަންކަލޭގެފާނުގެ މަންމާފުޅަށްފަހު މަންމާފުޅު“ގެ ގޮތުގައެވެ.

ކައިވެނިފުޅުތަކާއި ދަރިދަރިކަލުން:

އުންމު އައިމަން އެންމެ ފުރަތަމަ ކައިވެނި ބައްލަވަގަތީ ޚަޒްރަޖް ވަންހައިގެ ބޭކަލެއްކަމަށްވާ ޢުބައިދް ބުން ޒައިދް އާއިއެވެ. އެބޭފުޅާގެ އަރިހުން އައިމަން ލިބިވަޑައިގެންނެވިއެވެ. ޢުބައިދް ރަޟިޔަﷲ ޢަންހު ޚައިބަރް ހަނގުރާމައިގައި ޝަހީދުވެވަޑައިގެންނެވުމުން އެކަމަނާ ދެން ކައިވެނި ބައްލަވައިގަތީ ޒައިދް ބިން ޙާރިޘާއެވެ. އަދި އެކަމަނާއަށް އުސާމާ ބިން ޒައިދު ލިބިވަޑައިގެންނެވިއެވެ. ޒައިދްގެފާނުވެސް ފަހުން މުއްތާ ހަނގުރާމައިގައި ޝަހީދުވެވަޑައިގެންނެވީއެވެ. އަދި ދޮށީ ދަރިކަލުން އައިމަން، ހުނައިން ހަނގުރާމައިގައި ޝަހީދުވެވަޑައިގެންނެވިއެވެ. ހަގު ދަރިކަލުން އުސާމާ ވެގެން ދިޔައީ މުސްލިމު ލަޝަކަރުގެ އިސް ކޮމާންޑަރަކަށެވެ. އަދި ރޯމަނުން ބަލިކުރެއްވި ފުރަތަމަ މުސްލިމް ލީޑަރަށް ވެވަޑައިގެންނެވިއެވެ.

ނަބީކަމާއި އިސްލާމްވުން:

ރަސޫލާއަށް ދީނަށް ގޮވާލެއްވުމަށް އަމުރުފުޅު ލިބިވަޑައިގެންނެވުމުން އެންމެ ފުރަތަމަވެސް ފެއްޓެވީ އެކަލޭގެފާނުގެ އަމިއްލަ ގެކޮޅުންނެވެ. އެގޮތުން މި ދަޢުވަތު ލިބިވަޑައިގެންނެވި އެންމެ ފުރަތަމަ މީހުންގެ ތެރޭގައި އުންމު އައިމަންވެސް ހިމެނިވަޑައިގަންނަވައެވެ. އަދި އެކަމަނާއަކީ ޚަދީޖަތުގެފާނު ފަދައިން އެއްވެސް ފަސްޖެހުމެއްނެތި އިސްލާމްވެޑައިގެންނެވި ބޭކަނބަލެކެވެ.

ނަބީކަމުގެ ފުރަތަމަ ދުވަސްވަރު މުސްލިމުންނަށް ކުރިމަތިވި ހުރިހާ ދަތިތަކަކާއި އަނިޔާއެއް އުންމު އައިމަންވެސް ތަހައްމަލްކުރެއްވިއެވެ. އަދި މީގެ އިތުރުން އެކަމަނާއަކީ ޙަބަޝްކަރައިގެ ކަޅު ނަސްލަށް ނިސްބަތްވާ ބޭކަނބަލަކަށް ވުމާއެކު މުޝްރިކުން ކުރިމަތީގައި އެކަމަނާގެ ޤަދަރާއި މަޤާމު އިތުރަށް ނިކަމެތިވެގެންދިއައެވެ. ނަމަވެސް އެކަމަނާ އަބަދުވެސް ހުންނެވީ އަމިއްލަ ދަރިއެއްފަދައިން ބަލާބޮޑުކުރެއްވުވި މުޙައްމަދުގެފާނުގެ އަރިހުގައި ސާބިތުކަމާއެކުގައެވެ.

މަދީނާއަށް ހިޖްރަކުރުމުގެ ހުއްދަ މުސްލިމުންނަށް ލިބުމާއެކު، އެކަމަނާ ހިޖްރަކުރެއްވެވިއެވެ. އަދި އުމުރުގެ ބާކީ ބައި ހޭދަކުރެއްވީ މަދީނާގައެވެ.

ސިފަފުޅުތަކާއި ޝަޚްސިއްޔަތު:

ކުރިންވެސް ބުނެވުނު ފަދައިން އެކަމަނާގެ އަސްލު އުފަން ރަށަކީ ޙަބަޝްކަރައެވެ. އެހެންކަމުން އެކަމާނާގެ މާދިރީ ބަހަކީ ޢަރަބި ބަހެއް ނޫނެވެ. މީގެ ސަބަބުން ޢަރަބި ބަހުން ވާހަކަދެއްކުވުމުގައްޔާއި ބައެއް އަކުރުތައް ވިދާޅުވުމުގައި އެކަމަނާއަށް ދަތިކަމެއް ހުއްޓެވެ.

ޢާންމުންގެ ތެރޭގައި އުންމު އައިމަން އަކީ މަޑުމައިތިރި ބޭކަނބަލެކެވެ. ނަމަވެސް ރަސޫލާގެ އަރިހުގައި އެކަމަނާއަކީ ގިނަގިނައިން ސަމާސާ ކުރައްވާ ބޭކަނބަލެކެވެ. އަދި ރަސޫލާ ޞައްލަﷲ ޢަލައިހި ވަސައްލަމް ވެސް އެކަމަނާގެ އަރިހުގައި އަބަދުވެސް ހިނިވަރުނަކުރައްވާ ސަމާސާ ކުރައްވަވައެވެ.

ބުނެވޭގޮތުގައި އެކަމަނާއަކީ ވަރަށް މައިވަންތަ، ރަސޫލާއާއި މެދު އިންތިހާއަށް އާޅާލެއްވެވި ބޭކަނބަލެކެވެ. ރަސޫލާ ޞައްލަﷲ ޢަލައިހި ވަސައްލަމް އެއްޗެއް ފަރީއްނުކުޅުއްވާ ހުންނަވާނަމަ އެކަމަނާ ގަދަކަމުންވެސް އެކަލޭގެފާނަށް ކާއެއްޗެހި އަރުވައެވެ. އަދި ރަސޫލާ ބައިވެރިވެޑައިގެންނެވި ބައެއް ހަނގުރާމަތަކުގައި އެކަމަނާ ބައިވެރިވެވަޑައިގެން، އެންމެ ނުރައްކާތެރި ހިނދުވަޅުތަކުގައި އެކަލޭގެފާނުގެ ދިފާޢުގައި ހަނގުރާމަކުރެއްވެވިއެވެ.

ރަސޫލު ޞައްލަﷲ ޢަލައިހި ވަސައްލަމްގެ އެކި އެކި ޞަޙާބީން އުންމު އައިމަންގެ ހަނގުރާމަ މަތީގެ ވާހަކަތައް ރިވާކުރައްވާފަވެއެވެ. އޭގެ ތެރެއިން އެއް ރިވާޔަތެއްގައިވާ ގޮތުން، ހަނގުރާމަތަކުގައި އުންމު އައިމަންގެ ނަޒަރު އަބަދުވެސް ހުންނަވަނީ ރަސޫލާގެ ޙަރަކާތްތަކަށެވެ. މަންމައަކު ދަރިއަކަށް ފާރަލާފަދައިންނެވެ.

އުންމު އައިމަން ވެގެން ދިޔައީ ދުނިޔޭގައި ހުންނަވަނިކޮށް ސުވަރުގެ ވަދެވަޑައިގެންނެވޭނެ ކަމުގެ އުފާވެރި ޚަބަރު ލިބިވަޑައިގެން މަދު ބޭކަނބަލުންގެ ތެރެއިން ބޭކަނބަލަކަށެވެ. ހިޖްރައިގެ ދިގު ދަތުރު ނިންމަވާފައި މަންޒިލަށް ވާޞިލްވެވަޑައިގެންނެވުމުން ރަސޫލާ ޞައްލަﷲ ޢަލައިހި ވަސައްލަމް އެކަމަނާ އަށް ހަދީޘް ކުރެއްވިއެވެ.“އޭ އުންމު އައިމަން އެވެ. އޭ މަންމާފުޅާ އެވެ. ހަމަކަށަވަރުން ސުވަރުގޭގައި ކަމަނާއަށް ޚާއްސަ މަޤާމެއް ވެއެވެ.“ އަދި އެހެން ފަހަރަކު ހަދީޘް ކުރެއްވިއެވެ. ”ތިޔަބައިމީހުންގެ ތެރެއިން ސުވަރުގޭގެ އަންހެން ކަނބަލަކާ ކައިވެނި ކުރައްވަން އެދޭ މީހަކު ވާނަމަ، ފަހެ އެމީހަކު އުންމު އައިމަން އާއި ކައިވެނި ކުރައްވާށެވެ.“

އެކަމަނާއަކީ ރަސޫލާއަށް އަދި އިސްލާމްދީނަށް ޓަކައި އެތައް ޤުރްބާނީއެއް ވެވަޑައިގެންނެވި ބޭކަނބަލެކެވެ. އެއްދުވަހަކު ރަސޫލާ ޞައްލަﷲ ޢަލައިހި ވަސައްލަމް އެކަމަނާއަށް ޒިޔާރަތް ކުރެއްވުމަށްފަހު އެކަމަނާ ގާތުން ހާލުކޮޅު އެއްސެވިއެވެ. ޖަވާބުގައި ދެންނެވިއެވެ. ”އިސްލާމްދީން ހެޔޮ ހާލުގައި ވާހާ ހިނދަކު ތިމަން ކަމަނާ ވަނީ ހެޔޮ ހާލުކޮޅުގައެވެ.“

ރަސޫލާ ޞައްލަﷲ ޢަލައިހި ވަސައްލަމްގެ މުޅި ޙަޔާތްކޮޅުގައިވެސް އުންމު އައިމަން އަށް ޒިޔާރަތް ނުކުރައްވަވާ އެންމެ ދުވަހެއްވެސް ނުދެއެވެ. އަދި އެކަލޭގެފާނު ސުވަރުގެ ވަޑައިގެންނެވުމާއެކު އަބޫބަކުރުގެފާނާއި ޢުމަރުގެފާނުވެސް އެކަމަނާއަށް ޒިޔާރަތް ކުރެއްވަވައެވެ. މިދެބޭކަލުން ޒިޔާރަތް ކުރެއްވެވި އެންމެ ފުރަތަމަ ދުވަހު އެކަމަނާ ކީރިތި ކުރެއްވެވިއެވެ. އަދި ދެންނެވިއެވެ. “ ރަސޫލާ ޞައްލަﷲ ޢަލައިހި ވަސައްލަމް ސުވަރުގެ ވަޑައިގަންނަވާނެކަން ތިމަންކަމަނާއަށް އިނގިލެއްވައެވެ. ނަމަވެސް ތިމަންކަމަނާ މި ކީރިތިކުރައްވަނީ އުޑުން ވަޙީ ބާއްވާލެއްވުން ހުއްޓުމުންނެވެ.“

އަވަހާރަވުން:

ރަސޫލާ ދުނިޔެ ދޫކުރެއްވުމަށް ފަހުގައިވެސް އުންމު އައިމަން ވަރަށް ގިނަ އަހަރުތަކެއް ދުނިޔޭގައި ހޭދަ ކުރެއްވެވިއެވެ. އަބޫބަކުރުގެފާނާއި ޢުމަރުގެފާނުގެ ޚިލާފަތުގައިވެސް އެކަމަނާ ދުނިޔޭގައި އިންނެވިއެވެ. ގިނަ ރިވާޔަޔްތަޢް ދައްކާ ގޮތުން އެކަމަނާ ދުނިޔެ ދޫކުރެއްވީ ޢުޘްމާންގެފާނުގެ ޚިލާފަތުގައެވެ.

މަޢުލޫމާތު ނެގި ލިންކްތައް:

ލިޔުނީ: ފާޠިމަތު މުޙައްމަދު އަޙްމަދު، މީޑިއާ ކޯރޑިނޭޓަރ، ސިއާ