އަސްލު ނަންފުޅާއި ވަނަވަރު:
ސުމައްޔާ ބިންތް ޚައްޔާޠް (ބައެއް ރިވާޔަތްތަކުގައި ވާގޮތުންނަމަ ސުމައްޔާ ބިންތް ޚައްބާޠް) އަކީ އެފްރިކާ ނަސްލަށް ނިސްބަތްވާ ބޭކަނބަލެކެވެ. ތާރީޚް ދިރާސާކުރައްވާ ގިނަ ބޭފުޅުން ބުރަވެލައްވަނީ އެކަމަނާ ނިސްބަތްވަނީ ޙަބަޝްކަރައަށް ކަމަށެވެ. ސުމައްޔާގެފާނު މައްކާގެ މުޖްތަމަޢުގައި މަޝްހޫރުވެފައިވަނީ އުންމު ޢައްމާރުގެ ނަމުންނެވެ. މިއީ އެކަމަނާގެ ދަރިކަލުން ޢައްމާރްއަށް ނިސްބަތްކޮށް ދެވިފައިވާ ކުއްނިއްޔަ ލަޤަބެކެވެ. ސުމައްޔާގެފާނަކީ ފެންވަރު މަތީ ޢާއިލާއަކުން ވަޑައިގެންނެވި ބޭކަނބަލެއްނޫނެވެ. ހަޤީޤަތުގައި އެކަމަނާ ހިމެނެނީ މައްކާގެ އެންމެ ދަށް ފަންތި ކަމަށްވާ އަޅުންގެ ފަންތީގައެވެ. އެއީ، ޢުމުރުގު ކުރީކޮޅު އަޅު އަންހެނެއްގެ ގޮތުގައި ހޭދަކުރެއްވުމުން ޤައުމުގެ އެއްވެސް ޤަބީލާއަކަށް ނިސްބަތް ނުވާތީއެވެ. އިސްލާމްދީނުގައި ސުމައްޔާގެފާނު އެންމެ ބޮޑަށް ފާހަގަވަނީ މިއުންމަތުގެ އެންމެ ފުރަތަމަ ޝަހީދުގެ ގޮތުގައެވެ.
ޢާއިލާ:
ބުނެވުނުފަދައިން ސުމައްޔާގެފާނު އެންމެ ފުރަތަމަ ބޮޑުފުޅުވެ ދިރިއުޅުއްވީ އަޅެއްގެ ގޮތުގައެވެ. އެކަމަނާގެ ސާހިބާ އަބޫ ޙުޛައިފާއަކީ ވަރަށް ވެސް ހިތް ހެޔޮ ދީލަތި މީހެކެވެ. އެހެންކަމުން އޭނާ އެކަމަނާ މިނިވަން ކޮށްދީ ޔާސިރް ބިން ޢާމިރް އާއި ކައިވެނި ކޮށްދިނެވެ. އަދި މިދެމަފިރިންނަށް ޢައްމާރް ބިން ޔާސިރް ލިބުނެވެ.
އިސްލާމްވުން:
ރަސޫލާ ޞައްލަﷲ ޢަލައިހި ވަސައްލަމް އެންމެ ފުރަތަމަ އިސްލާމްދީނަށް ގޮވާލައްވަން ފެއްޓެވިއިރު، އެ ދަޢުވަތަށް އެންމެ ފުރަތަމަ އިޖާބަދިން ގިނަ މީހުންނަކީ އަޅުންނާއި މިސްކީނުންނާއި ނިކަމެތިންނެވެ. އެއީ، އިސްލާމްދީނަކީ ހަމަހަމަކަމާއި އިންސާފަށް ގޮވާލާ އަދި ހުރިހާ އިންސާނުންނަކީވެސް އެއް ފެންވަރެއްގެ ބައެއް ކަމަށް ކަނޑައަޅި ދީނެއް ކަމުގައި ވާތީއެވެ. މިހެންކަމުން، މި ދަޢުވަތު އެންމެ ފުރަތަމަ ފެށިގެން އައިއިރު އެންމެ ބޮޑަށް ޢަދާވަތްތެރިކަން ދެއްކި ބަޔަކީ ޤައުމުގެ ބޮޑުންނެވެ. އަދި މިދެންނެވުނު ބޮޑުންގެ ރަޙުމްކުޑަ އަނިޔާތަކުގެ އެންމެ ފުރަތަމަ އަމާޒަކަށްވީ އަޅުންނާއި ނިކަމެތިންނެވެ. އޭގެ ތެރޭގައި ސުމައްޔާގެފާނާއި އެކަމަނާގެ ޢާއިލާވެސް ހިމެނިވަޑައިގަންނަވައެވެ. އެކަމަނާއަކީ މިދީނަށް ހަތްވަނަ ވަދެވަޑައިގެން އިސްލާމަކަން ޤަބޫލުކުރެއްވި ފަރާތެވެ.
ޝަހީދުވެވަޑައިގަތުން:
ސުމައްޔާގެފާނާއި އެކަމަނާގެ ފިރިކަލުން ޔާސިރާއި އަދި ދަރިކަލުން ޢައްމާރް ވެގެން ދިޔައީ އެންމެ ފުރަތަމަ އަނިޔާއާއި ކުރިމަތިލާން ޖެހިވަޑައިގެން އެއް ޢާއިލާއަށެވެ. އެގޮތުން މައްކާގެ ހޫނުގައި ކޮންމެ ދުވަހަކު އަވީގައި އެތައް އިރަކު އަނިޔާކޮށް ރަސޫލާ ޞައްލަﷲ ޢަލައިހި ވަސައްލަމަށާއި އިސްލާމްދީނަށް ކާފަރުވުމަށް އަންގާ އަމުރުކޮށް ހެދިއެވެ. ނަމަވެސް މިއިން އެއްވެސް ކަމެއް ކާމިޔާބުވާގޮތެއް ނުވިއެވެ.
އެމީހުންނަށް ކުރިމަތިވަމުންދާ އަނިޔާތައް ފެނި ރަސޫލާ ޞައްލަﷲ ޢަލައިހި ވަސައްލަމް ހިތްދަތިވެ ކީރިތި ކުރެއްވިއެވެ. އެހެންނަމަވެސް، ރަސޫލާ ޞައްލަﷲ ޢަލައިހި ވަސައްލަމް ވެސް ހުންނެވީ އެމީހުންނަށް އެހީތެރިވެވަޑައި ގެންނެވޭފަދަ ޙާލަތެއްގައެއް ނޫނެވެ. ރަސޫލާ ޞައްލަﷲ ޢަލައިހި ވަސައްލަމް އެމީހުންނަށް ކެތްތެރިކަން ދެއްވުން އެދި ދުޢާކުރެއްވިއެވެ. އަދި ދެންނެވިއެވެ. ”އޭ ޔާސިރުގެ ޢާއިލާއެވެ. ކެތްކުރާށެވެ. ފަހެ ތިޔަބައިމީހުންގެ ދާއިމާ ގޯއްޗަކީ ސުވަރުގެއެވެ.“
މި އަނިޔާގައި އެއްދުވަހަކު އަބޫ ޖަހުލު ހެރި އެއްޗަކުން އެކަމަނާ ޝަހީދުވެވަޑައިގެންނެވިއެވެ. އަދި މިއުއްމަތުގެ ފުރަތަމަ ޝަހީދަށްވެވަޑައިގަތެވެ. އެއަށްފަހު އެމީހުން އެކަމަނާގެ ފިރިކަލުން ޔާސިރުވެސް ޝަހީދުކޮށްލިއެވެ. ޢައްމާރްގެ މައިންބަފައިން ޝަހީދުކޮށްލެވުނީ އެކަލޭގެފާނުގެ ކުރިފުޅުމަތީގެއެވެ.
އެކަމަނާގެ ވާހަކައަކީ އަޅުގަނޑުމެން މުސްލިމުންނަށް ހިތްވަރު ލިބޭ ވާހަކައެކެވެ. ދުނިޔޭގައި ލިބެންހުރި ވޭނާއި އަނިޔާވެސް އިނގިހުންނަވާ ޙާލުގައިވެސް އެކަމަނާ އިސްލާމްވެ ވަޑައިގަތީ އެއީ ޙައްޤުގޮތް ކަމަށްވާތީއެވެ. އެކަމަނާގެ ޤުރްބަނީވެގެން ދިޔައީ އޭރުގެ އެތައް ނިކަމެތި މުސްލިމުންނަށް އިތުރު ހިތްވަރެއް ލިބިގެންދިޔަ ކަމަކަށެވެ. އަދި އޭގެ އިތުރަށް މިއަދުގެ މުސްލިމުންނަށްވެސް އެއީ އުއްމީދު ގެނުވައިދޭ ވާހަކައެކެވެ. އަޅުގަނޑުމެންނަށް މިއަދު ދުނިޔޭގައި މިދިމާވާ ހުރިހާ ދަތިތަކަކީ ހަމައެކަނި ވަގުތީ އިމްތިހާނެކެވެ. އެއަށް ކެތްތެރިވެ ﷲ އަށް ވަކީލު ކުރާނަމަ އެންމެ ފުރިހަމަ އަޖްރު ލިބިގެން ދާނެއެވެ.
މަޢުލޫމާތު ނެގި ލިންކްތައް:
ލިޔުނީ: ފާޠިމަތު މުޙައްމަދު އަޙްމަދު، މީޑިއާ ކޯރޑިނޭޓަރ، ސިއާ
