ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) ޑީން އޮފް ސްޓޫޑެންޓްގެ މަގާމުން ނާދިޔާ އަހުމަދު، ދަރިވަރުންގެ ނަމުންނަމަ ނާދިޔާ މިސް އެއް ދައުރު ހަމަ ކުރައްވާ ވަޑައިގެންނެވި ކަމަކު، ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އަށާއި ދަރިވަރުންނަށް ކޮށްދިން ކަންތަކަކީ މި ޔޫނިއަނުން އަބަދުވެސް ބަލައިގަންނާނެ ކަންކަކަމެވެ. އަގު ނުކުރެވޭނެ އެތަށް ކަމެއް މިސްގެ ދައުރުގައި މި ޔޫނިއަންއަށް ކޮށްދީފައިވާއިރު، ޔޫނިއަނުން މިއަދު މިއޮތް ހަރުފަތަށް އައުމަށް މަގު ކޮށާދިނީ ނާދިޔާ މިސް އޭ ބުނުމުން ދޮގަކަށް ނުވާނެއެވެ.
ދަރިވަރުންގެ ކަމެއްގައި ޔޫނިއަނުން ކޮންމެ ވަގުތަކު ގުޅާލި ނަމަވެސް އެއްވެސް ވަރުބަލި ކަމެއް ނެތި އެކަމެއް ކޮށްދެވޭތޯ ބަލާ ބެލުމަކީ އަޅުގަނޑުމެންގެ ހަނދާނުން ފިލައިގެން ދާނެ ކަމެއް ނޫނެވެ. ”މިސް އެކަން ކޮށްދެވޭތޯ ބަލާނަން“ މިސް އެކަން ކޮށްދޭނަން“ މި ބަސްތަކަކީ އަޅުގަނޑުމެންނަށް އައު ބަސްތަކެއް ނޫނެވެ. ތިއީ ދަރިވަރުންނަށް ދެވަނަ މަންމަ އެކެވެ. ޔޫނިއަންއަށް ތިޔަ މަންމަގެ އެހީ އަބަދުވެސް ބޭނުންވާނެ ކަމީ ޝައްކެއް ނެތް ކަމެކެވެ.
ނާދިޔާ މިސް ފާހަގަވެގެން ގޮސްފައިވަނީ ދަރިވަރުންނާއި، ރަހުމަތްތެރި، ކަންކަމުގައި ދަރިވަރުންގެ ޚިޔާލު ހޯދި ޑީން އޮފް ސްޓޫޑެންޓް އެއްގެ ގޮތުގައި އެވެ. ދަރިވަރުންގެ ކުރިއެރުމަށް މިސް ކޮށްދިން ކަންކަމަކީ އަގު ނުކުރެވޭނެ ކަންކަމެވެ. ދަރިވަރުންނާއި ބެހެއްޓި ގާތް ގުޅުމަކީ އަޅުގަނޑުމެންގެ ހަނދާނުން ފިލައިގެންދާނެ ކަންކަމެއް ނުމެ ނޫނެވެ.
އެމް.އެން.ޔޫ.އެސް.ޔޫގެ ހަރަކާތްތަކުގައި މިސް ބައިވެރިވި ބައިވެރިވުން މި ޔޫނިއަނުން އަބަދުވެސް ހަނދާން ހުންނާނެއެވެ. ޔޫނިއަންގެ ގޮފިތަކުގެ އިތުރުން ހިންގާ ކޮމެޓީން މިސް އާއި އަބަދުވެސް ބައްދަލުވެ ޚިޔާލާއި، މަޝްވަރާ ހޯދުމަށް އެދިލެއްވި ކޮންމެ އެދިލެއްވުމެއް މިސް ގަބޫލުކުރައްވާފައިވާއިރު، މިއީ ޔޫނިއަނުން އަބަދުވެސް ފާހަގަ ކުރާނެ ކަންކަމެވެ. އަދި މިސް އަމިއްލަ އިސްނެގުމާއެކު ޚިޔާލު މަޝްވަރާދެއްވާފައިވެއެވެ.
ޑީން އޮފް ސްޓޫޑެންޓްގެ މަގާމް ފުރަތަމަ ފަހަރަށް ތައާރަފް ކޮށްފައިވަނީ 2016 ވަނަ އަހަރުގައެވެ. އޭރު ޔޫނިއަންގެ ރައީސް ކަމުގެ މަގާމުގައި ހުންނެވި އަލްއުސްޛް އަލީ ރަޝީދު ވިދާޅުވީ ނާދިޔާ މިސް ޑީން އޮފް ސްޓޫޑެންޓްގެ މަގާމާއި ހަވާލުވީ އެމަނިކުފާނުގެ ދައުރުގައި ކަމަށާއި، އޭރުން ފެށިގެން ޔޫނިއަންގެ ލަނޑުދަނޑި ހާސިލް ކުރުމަށް މިސްގެ އެހީ ވަރަށް ބޮޑަށް ލިބިފައިވާ ކަމަށެވެ. އަލީ ރަޝީދު އިތުރަށް ވިދާޅުވީ މިދިޔަ ހަތަރު އަހަރު ޔޫނިއަންއަށް ކޮންމެ އަރުތަވެރި ކަމެއް ހޯދުމަށް މިސްގެ ދައުރު ވަރަށް ބޮޑަށް ލިބިފައިވާ ކަމަށެވެ.
އެމް.އެން.ޔޫ.އެސް.ޔޫ ގެ ހަވަނަ ދައުރުގެ ރައީސް އަލްފާޟިލް އަރުޝަދު އަޝްރަފް ވިދާޅުވީ ނާދިޔާ މިސް އަކީ ދަރިވަރުންނަށް ދިމާވެފައިވާ ދަތިތައް ހައްލު ކުރުމަށް އެމް.އެން.ޔޫގެ މެނޭޖްމަންޓް އާއި އެކު މަސައްކަތް ކުރުމަށް ލިބުނު ފުރުސަތުގައި މެދުވެރިޔަކަށް ވީ ފަރާތްކަމަށާއި، ނާދިޔާ މިސްއަކީ ދަރިވަރުން ބާރުވެރި ކުރުމަށް ޔޫނިއަނުން ކުރި މަސައްކަތުގައި ދަރިވަރުންނަށް ފުރުސަތުތައް ހޯދައިދިނުމުގައި އެންމެ ބޮޑު ދައުރެއް އަދާކުރި އެއް ފަރާތް ކަމަށެވެ.
އެމް.އެން.ޔޫ.އެސް.ޔޫ ގެ ހަތްވަނަ ދައުރުގެ ރައީސް އަލްފާޟިލް މުހައްމަދު ޝާން އާމިރް ވިދާޅުވީ ދަރިވަރުންގެ ޔޫނިއަންގެ ހިންގާ ކޮމިޓީގައި މަސައްކަތްކުރި 2 އަހަރުގެ ތެރޭގައި އެންމެ ބޮޑަށް އެހީތެރިވި އެއް ފަރާތަކީ ނާދިޔާ މިސް ކަމަށެވެ. ޚާއްޞަގޮތެއްގައި ދަރިވަރުންގެ ޔޫނިއަން އާއި ޤައުމީ ޔުނިވަރސިޓީގެ މެނޭޖްމަންޓާ ދެމެދު ކޯޑިނޭޓަރެއްގެ ޙައިޞިއްޔަތުން ނާދިޔާ މިސް އަދާކުރެއްވި ދައުރަކީ ލާމަސީލު މިސާލެއް ކަމަށް ޝާން ވިދާޅުވިއެވެ. މީގެ އިތުރުން ޝާން ވިދާޅުވީ އަމިއްލަ ޙައިޞިއްޔަތުން ދަރިވަރުންގެ ޔޫނިއަންގެ މަސައްކަތްތައް އިތުރަށް ހަރުދަނާ ކުރުމަށް ދެއްވި ނަސޭހަތްތަކާއި އިރުޝާދުތަކަކީ އަބަދުވެސް ދަރިވަރުންގެ ޔޫނިއަނުން ޝުކުރުވެރިވާނެ ކަމެއް ކަމަށެވެ. އަދި ޚާއްޞަކޮށް އެބޭފުޅާގެ ރައީސްކަމުގެ ދައުރުގައި ނާދިޔާމިސް ދެއްވި ފުރިހަމަ އެއްބާރުލުމަށް ވަރަށް ޚާއްޞަގޮތެއްގައި ޝުކުރު އަދާކުރާ ކަމަށެވެ.
އެމް.އެން.ޔޫ.އެސް.ޔޫގެ ރައީސް އަލްފާޟިލް އަލީ ޝަމްއޫން ވިދާޅުވީ 2017 ވަނަ އަހަރުން ފެށިގެން މިއަދާ ހަމައަށްވެސް ދަރިވަރުންނަށް ދިމާވާ ކޮންމެ ކަމެއްގައި އެހީތެރިވުމަށް މިސް ކުރެއްވި މަސައްކަތްތަކަކީ ޔުނިވަރސިޓީގެ ހުރިހާދަރިވަރުން ޝުކުރުވެރި ހިތަކުން އަގުވަޒަންކުރާނެ ހިދުމަތްތަކެއް ކަމަށާއި، އަބަދުވެސް ދަރިވަރުންގެ ކަންކަމުގައި ޔޫނިއަންއާއި ގާތް ގުޅުމެއް ބާއްވައި، ކުޑަ ދުވަސްކޮޅެއްގެ ތެރޭގައި ގިނަ ކުދިންތަކެއްގެ ލޯބި ހޯއްދަވައި، ހުރިހާ ދަރިވަރުންނާމެދު އެ ބެހެއްޓެވި އޯގާތެރިކަމަކީ އަބަދުވެސް ދަރިވަރުން ހަނދާނުގައި ހުންނާނެ ހަނދާންތަކެއް ކަމަށެވެ. އަދި ވަކިން ހާއްސަގޮތެއްގައި ޔޫނިއަންގެ ހަރަކާތްތަކުގައި މިސްގެ ފަރާތުން ލިބިލެއްވި އެއްބާރުލުން ފާހަގަކޮށް ޝުކުރުދަންނަވާ ކަމަށާއި، ނާދިޔާ މިސް އަކީ ދަރިވަރުންނަށް މަންމައެއްފަދަ ފިސާރި ކަނބަލެއް ކަމަށް ޝަމްއޫން ވިދާޅުވިއެވެ.
އެމް.އެން.ޔޫ.އެސް.ޔޫ އިން ނާދިޔާ މިސްއަށް އަބަދުވެސް އެދެނީ ކާމިޔާބީ އަށެވެ. އަދި ކުރިޔަށް އޮތް ތަނުގައި ވެސް މިސްގެ އެހީ މި ޔޫނިއަންއަށް ލިބޭނެ ކަމަށް އުންމީދު ކުރަމެވެ.
ލިޔުނީ: އަބްދުﷲ އަތޫފް އާތިފް
އެމް.އެން.ޔޫ.އެސް.ޔޫ މީޑިއާ
