ރިޕޯޓް: ”ބްރިޖަށް“ އެޅި ފުރަތަމަ ފިޔަވަޅާއެކު ހަނދާނުން ފޮހެވިގެން ނުދާނެ އިޙްސާސެއް!

25 އޭޕްރީލް 2018ވީ ބުދަ ދުވަހަކީ ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ ބައެއް ދަރިވަރުންނަށް ވަރަށް ޚާއްޞަ ދުވަހެކެވެ. ދިވެހިރާއްޖޭގައި މިހާރު ހިނގަމުންދާ އެންމެ ބޮޑު ޢުމްރާނީ މަސައްކަތްކަމަށްވާ، ”ޗައިނާ-މޯލްޑިވްސް ފްރެންޑްޝިޕް ބްރިޖް“ގެ މަސައްކަތް ޢަމަލީގޮތުން ބަލާލުމުގެ ފުރުޞަތު ފަހިވެގެންދިޔަ ދުވަހެވެ. މި ފުރުޞަތު އެމް.އެން.ޔޫގެ ޖުމްލަ 54 ދަރިވަރަކަށް ލިބުނުއިރު، މިއީ މޯލްޑިވްސް ޗައިނާ ޓްރޭޑް އެންޑް ކަލްޗަރ އޯގަނައިޒޭޝަން (އެމް.ސީ.ޓީ.ސީ.އޯ)ގެ ހެޔޮ އެދުންތަކާއިއެކު ލިބުނު ފުރުޞަތެއްކަން ފާހަގަކޮށްލެވެއެވެ. ރާއްޖޭގެ މަތީ ތަޢުލީމު ކިޔަވަމުންދާ ދަރިވަރުންނަށް އަމާޒުކޮށް އެމް.ސީ.ޓީ.ސީ.އޯ އިން އިންތިޒާމުކުރި ”ޗައިނާ ބެލްޓް އެންޑް ރޯޑް ސިމްޕޯސިއަމް-2“ އަށް ހާޒިރުވި ދަރިވަރުންނަށް މި ފުރުޞަތު ފަހިކޮށްދޭނެކަމަށް އެ ސިމްޕޯސިއަމްގެ ތެރެއިން އެމް.ސީ.ޓީ.ސީ.އޯގެ މެންބަރުންވަނީ ވިދާޅުވެފައެވެ. މިއީ އެ ވަޢުދު ފުއްދުމުގެ ތެރެއިން ދަރިވަރުންނަށް ފަހިކޮށްދެވުނު ފުރުޞަތެކެވެ.

ދިވެހިރާއްޖޭގެ އެންމެ މުޙިއްމު ރަށްތަކުގެ ތެރެއިން 2 ރަށް ކަމަށްވާ މާލެ އާއި ހުޅުލެ-ހުޅުމާލެ ގުޅުވާލުމަށް އަޅަމުންދާ ބްރިޖުގެ މައްޗަށް އަރާލުމުން ހިތަށް ކުރެވިގެންދިޔައީ ވަރަށް ތަފާތު އިޙްސާސެކެވެ. މި ޕްރޮޖެކްޓުގެ ޙަޤީޤީ ސައިޒު އެނގިގެންދަނީ އެ ޕްރޮޖެކްޓުގައި ކުރަމުންދާ މަސައްކަތްތައް ހަމަ ލޮލުން ބަލާލެވުނީމައެވެ. މި ކުޑަކުޑަ ރާއްޖޭގައި މިހާ ބޮޑު ޕްރޮޖެކްޓެއް (މެގަ-ޕްރޮޖެކްޓެއް) ހިނގަމުންދާކަމީ، ތަރައްޤީގެ ރޮނގުންނާއި ކޮންސްޓްރަކްޝަން ދާއިރާއިން ދިވެހިރާއްޖެ ކުރިއަރަމުންދާކަމުގެ އަލިގަދަ ނިޝާނެކެވެ. މިފަދަ ބޮޑު ޚިދުމަތެއް ދިވެހި ރައްޔިތުންނަށް ކޮށްދެއްވާކަމަށްޓަކައި ދިވެހިރާއްޖޭގެ ރައީސުލްޖުމްހޫރިއްޔާ އަލްފާޟިލް ޢަބްދުﷲ ޔާމީން އަދި މިނިސްޓަރ އޮފް ހައުސިންގ އެންޑް އިންފްރާސްޓްރަކްޗަރ ޑރ. މުޙައްމަދު މުޢިއްޒަށް ރާއްޖޭގައި މަތީ ތަޢުލީމު ޙާޞިލުކުރަމުންދާ ދަރިވަރުންގެ ނަމުގައި ވަރަށް ޚާއްޞަ ޝުކުރެއް އަދާކުރަމެވެ. އަދި ދިވެހިރާއްޖޭގައި މުޅީން އަލަށް ޢިމާރާތްކުރެވެމުންދާ ”ބްރިޖް“ގެ މަތީގައި ހިނގާލުމުގެ ފުރުޞަތު އެމް.އެން.ޔޫ.އެސް.ޔޫގެ މެންބަރުންނަށް ދެއްވިކަމަށްޓަކައި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ފަރާތުން އެމް.ސީ.ޓީ.ސީ.އޯ އަށް ނިހާޔަތަށް ޝުކުރު އަދާކުރަމެވެ.

އެމް.އެން.ޔޫގެ 54 ދަރިވަރުންނާއި އެހެނިހެން ކޮލެޖުތަކުގެ ދަރިވަރުންނާއިއެކު ޖުމްލަ 120 ދަރިވަރުން ”ބްރިޖަށް“ ޒިޔާރަތްކުރީ ބުދަ ދުވަހުގެ މެންދުރުފަހު 03:00ގައެވެ. 2 ގްރޫޕަކަށް ބަހާލައިގެން ބްރިޖުގެ މަސައްކަތްތަކާއި ޢަމަލީގޮތުން ބްރިޖު މައްޗަށް އަރާލުމުގެ ފުރުޞަތުދިންއިރު، ބްރިޖުގެ މަސައްކަތްތައް ކުރަމުންދާ ކުންފުނީގެ ފަރާތުން ދަރިވަރުންނަށް ދިނީ ވަރަށްވެސް ހޫނު މަރުޙަބާއަކާއި މެހެމާންދާރީއެކެވެ. ބްރިޖުގެ މަސައްކަތްތައް ކުރިއަށް ގޮސްފައިވާ މިންވަރަށް ބަލާލާއިރު، ބްރިޖުގެ މަތިން މިހާރު ގުޅުވާނުލައި ވަނީ ހަމައެކަނި މެދު 2 ތަނބުގެ ދެމެދެވެ. ކުރިއަށް އޮތް ހަފްތާއެއްތެރޭގައި އެ ހިސާބުވެސް ގުޅުވާލައި، މުޅި ބްރިޖު އެއްކޮށް ގުޅިގެންދާނެކަމަށް ބްރިޖުގެ މަސައްކަތްތައް ކުރަމުންދާ ކުންފުނިން މަޢުލޫމާތުދެއްވިއެވެ. އެހެންކަމަށްވާނަމަ، ބްރިޖުގެ ”ފިނިޝިންގ“ މަސައްކަތް ވަރަށް އަވަހަށް ފަށާނެކަމަށް ބެލެވެއެވެ. އަދި ދުވަސްކޮޅަކުން ދިވެހިންނަށް ދިވެހީންގެ އަމިއްލަ ބްރިޖު ބޭނުންކުރުމުގެ ފުރުޞަތު ލިބިގެންދާނެއެވެ.

މިފަދަ ރަނުގެ ފުރުޞަތެއް މަތީ ތަޢުލީމުކިޔަވަމުންދާ ދަރިވަރުންނަށް ދެއްވިކަމަށްޓަކައި، މިކަމުގައި އެންމެ އިސް ރޯލެއް އަދާކުރި 2 ބޭފުޅުން ކަމަށްވާ އެމް.ސީ.ޓީ.ސީ.އޯގެ ނައިބު ރައީސް އަލްފާޟިލް މިދުއާމް ސައުދު އަދި ރައްޔިތުންގެ މަޖިލީހުގެ މާފަންނު ދެކުނު ދާއިރާގެ މެންބަރ އޮނަރަބަލް ޢަބްދުﷲ ރިފާޢު އަށް ނުހަނު އިޚްލާޞްތެރިކަމާއެކު ޝުކުރު އަދާކުރަމެވެ. އަދި މަތީ ތަޢުލީމު ކިޔަވަމުންދާ ޒުވާނުންނާއި އަބަދުވެސް ތިޔަ ބަހައްޓަވާ ގާތްކަމަށް އެމް.އެން.ޔޫ.އެސް.ޔޫގެ ފަރާތުން ފަށްފަށުން ޝުކުރު އަދާކުރަމެވެ.