ރިޕޯޓް: އެމް.އެން.ޔޫ.އެސް.ޔޫ އިޖްތިމާޢީ ދަތުރު – ކ. ތުލުސްދޫ

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އަކީ ހަމައެކަނި މި ޖަމިއްޔާގެ މެންބަރުންނަށް އަމާޒުކޮށް ޙަރަކާތްތައް ހިންގާ ޖަމިއްޔާއެއް ނޫނެވެ. އެއަށްވުރެ ޖަމިއްޔާގެ ޙަރަކާތްތައް ފުޅާކޮށް، ޤައުމީ އަދި ބައިނަލްއަޤްވާމީ ފެންވަރުގެ ޙަރަކާތްތަކުގައި ބައިވެރިވުމަކީ ޖަމިއްޔާގެ އަބަދުވެސް އަމާޒެކެވެ. މީގެ އިތުރުން މުޖުތަމަޢުގެ ފައިދާއަށް އިޖްތިމާޢީ ޚިދުމަތްތަކެއް ކުރުމީ މި ޖަމިއްޔާއިން ދަމަހައްޓަމުން އަންނަ ސިޔާސަތެކެވެ. މިގޮތުގެ މަތިން އިޖްތިމާޢީ އެތައް ޙަރަކާތްތަކެއްގައި މިއަހަރު (2018) ވެސް އެމް.އެން.ޔޫ.އެސް.ޔޫގެ ފަރާތުން ބައިވެރިވެފައިވާއިރު، އެމް.އެން.ޔޫ.އެސް.ޔޫގެ ލީޑަރސް ގްރޫޕް އަދި މާލޭ ކެމްޕަހުގެ ގޮފިތަކުގެ މެންބަރުންނަށް މާލެއިން ބޭރުން އިޖްތިމާޢީ ޙަރަކާތެއް ރޭވުމަށް ނިންމުނެވެ. އަދި މި ޙަރަކާތުގައި ބައިވެރިވުމަށް ހުޅުވާލި ހުޅުވާލުމުގައި ލީޑާރސް ގްރޫޕް އަދި ގޮފިތަކުގެ މެންބަރުންގެ ތެރެއިން ޖުމްލަ 70 އެއްހައި ކުދިން ޝަޢުޤުވެރިކަން ފާޅުކުރިއެވެ.

މާލެއިން ބޭރުން ދާނެ ރަށެއްގެ ގޮތުގައި ކަނޑައެޅުނީ ކ. ތުލުސްދޫ ކަމަށްވާއިރު،  ޙަރަކާތެއްގެ ގޮތުގައި ހަމަޖެހުނީ އެ ރަށުގެ ތުނޑި ސާފުކުރުމުގެ ޕްރޮގްރާމެކެވެ. 12 މެއި 2018ވީ ހޮނިހިރުދުވަހު މި ޕްރޮގްރާމް ކުރިއަށްގެންދިއުމަށް ތުލުސްދޫ އަށް ދިއުމަށް ފުރީ އެދުވަހުގެ ފަތިހު 06:00ގައެވެ. ޖުމްލަ 75 ދަރިވަރުންނާއިއެކު މި ދަތުރު ކުރިއަށްގެންދެވުނުއިރު، ތުލުސްދޫގައި ސާފުކުރުމުގެ ޕްރޮގްރާމް ކުރިއަށްގެންދިޔައީ އެދުވަހުގެ ހެނދުނު 10:30ން 12:00 އަށެވެ. ޕްރޮގްރާމަށްފަހު މުނިފޫހިފިލުވުމުގެ ޙަރަކާތްތަކާއި ރަށުތެރެ ބަލާލުމުގެ ޙަރަކާތްތަކަށްފަހު އެ ރަށުން މާލެއަށް ފުރީ އެދުވަހުގެ ހަވީރު 04:00ގައެވެ.

މި ދަތުރަކީ އެމް.އެން.ޔޫ.އެސް.ޔޫގެ އިޖްތިމާޢީ މަސައްކަތްތަކުގެ ތެރެއިން މާލޭ ކެމްޕަހުން މާލެއިން ބޭރުގައި މިއަހަރު ކުރިއަށް ގެންދެވުނު ފުރަތަމަ ޙަރަކާތެވެ. މި ދަތުރުގެ ޚަރަދުތައް ހަމަޖެހުނީ ދަތުރުގައި ބައިވެރިވި ބައިވެރިންގެ ފަރާތުން އަދި އެމް.އެން.ޔޫ.އެސް.ޔޫގެ ފަރާތުންކަން ފާހަގަކޮށްލެވެއެވެ. މި ޕްރޮގްރާމް ކުރިއަށްގެންދިއުމަށް ތުލުސްދޫގެ ކައުންސިލް މެންބަރުންގެ ފަރާތުން ލިބުނު އެއްބާރުލުން މި ފުރުޞަތުގައި ފާހަގަކޮށްލަމެވެ. ޚާއްޞަގޮތެއްގައި ދަތުރުގެ ހުރިހާކަމެއްގައި ތުލުސްދޫ ކައުންސިލްގެ ރައީސް އަލްފާޟިލް އަޙްމަދު އަނީސް އަދި ނައިބު ރައީސް އަލްފާޟިލް ޒުލްކިފްލި އަލީ ވެދެއްވި އެހީތެރިކަމަށް ނިހާޔަތަށް ޝުކުރު ދަންނަވަމެވެ.

އެމް.އެން.ޔޫ.އެސް.ޔޫގެ އަމާޒަކީ މިފަދަ އިޖްތިމާޢީ ޙަރަކާތްތައް ފުޅާ ދާއިރާއެއްގައި ކުރިއަށްގެންދިއުމެވެ. އަދި މިފަދަ ޙަރަކާތްތަކަށް އެމް.އެން.ޔޫ.އެސް.ޔޫގެ މެންބަރުން އަހުލުވެރިކުރުމެވެ. މިފަދަ ޙަރަކާތްތަކުގެ ބޭނުންތެރިކަން އެ މެންބަރުންނަށް ވިސްނައިދިނުމެވެ. އަލަށް ވަންނަ ދަރިވަރުން ހިމެނޭ ގްރޫޕް (ލީޑަރސް ގްރޫޕް) އާއި އެކު މިފަދަ ޙަރަކާތްތައް ކުރިއަށްގެންދިއުމުގެ މަޤްޞަދަކީވެސް އެއީ އެވެ. ޔުނިވަރސިޓީ ޙަޔާތުގައި ދަސްކުރަންވީ ހަމައެކަނި ކްލާހުގައި ކިޔަވައިދޭ ދަރެސްތައް (ލެކްޗަރތައް) އެކަންޏެއް ނޫނެވެ. ދިރިއުޅުމުގެ މައިދާނަށް ނުކުތުމުގެ ކުރިން އެކަމަށް ތައްޔާރުވުމުގެ ގޮތުން ކަންކަމަށް އިސްނެގުމާއި، އިޖްތިމާޢީ ޙަރަކާތްތަކުގައި ބައިވެރިވުމާއި ފަރުދީ ޒިންމާ އަދާކުރުމާއި ފަރުދީ ވިސްނުމަށްވުރެ އިޖްތިމާޢީ ވިސްނުން އިސްކުރަންވީ ކީއްވެގެންކަންވެސް ދަސްކުރަންޖެހެއެވެ. ޔުނިވަރސިޓީގައި ކިޔަވާ ކޯސް ނިމި، ދަސްވެނިވެގެން ވަޒީފާގެ މާޙައުލަށް ނުކުންނައިރު ކޮންމެ ދަރިވަރަކީވެސް ޒިންމާދާރު އިސްވާރަކަށް (ލީޑަރަކަށް)ވެ، އަމިއްލަ ފައިމައްޗަށް ތެދުވެފައިވާ މީހަކަށް އެބަ ވާންޖެހެއެވެ.

– މުޙައްމަދު ޝާން ޢާމިރު
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ