ރިޕޯޓް: އެމް.އެން.ޔޫ އިން ކުޑަކުދިންގެ ދުވަސް ކުޑަކުދިންގެ ބަގީޗާގައި ފާހަގަކުރުން

ދިވެހިރާއްޖޭގެ ޤައުމީ ޔުނިވަރސިޓީ އަކީ އަބަދުވެސް ތަފާތު ދައްކާ ޔުނިވަރސިޓީއެކެވެ. ދިވެހިރާއްޖޭގައި އެންމެ ފުރަތަމަ އުފެދުނު މި ޔުނިވަރސިޓީ އަކީ ދިވެހިރާއްޖޭގެ މަތީ ތަޢުލީމުދޭ މުއައްސަސާތަކުގެ ތެރޭގައި އެންމެ ވަރުގަދަ އެއް މުއައްސަސާއެވެ. މި ޔުނިވަރސިޓީގެ ފަރާތުން މިއަހަރުގެ ކުޑަކުދިންގެ ދުވަސް ފާހަގަކުރުމަށް ބޭއްވުނު ކުޑަކުދިންގެ ހަވީރަކީ މިކަމަށް ބާރުދޭ މިސާލެކެވެ.

ވެރިކަންކުރާ މާލޭގައި އެއްއިރެއްގައި ކުޑަކުދިންނަށް އެންމެ މަޤްބޫލު ތަނަކަށްވެފައި އޮތް ”ކުޑަކުދިންގެ ބަގީޗާ“، 11 މެއި 2018ވީ ހުކުރުދުވަހުގެ ހަވީރު ފަޅުފިލުވައިދިނީ ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ މުވައްޒަފުންނާއި ދަރިވަރުންނެވެ. މޫސުން އެހާ ރަނގަޅު ދުވަހަކަށް ނުވިއެއްކަމަކު ޢާންމުންނަށް ހުޅުވާލައިގެން ބޭއްވުނު މި ކުޑަކުދިންގެ ހަވީރުގައި ޢާންމުންގެ ތެރެއިން އެތައް ޢާއިލާތަކެއް މި ޙަރަކާތުގައި ބައިވެރިވުމަށް އެދުވަހު ކުޑަކުދިންގެ ބަގީޗާއަށް ދުރުވިއެވެ. ތަފާތު ކުޅިވަރު ސްޓޯލްތަކާއި ސްޓޭޖް ޝޯގެ އިތުރުން ކުޑަކުދިން ޝަޢުޤުވެރިވާފަދަ ގޮތަކަށް މުޅި ބަގީޗާ ޒީނަތްތެރިކޮށްފައި އޮތްއިރު، މި ޙަރަކާތް އިންތިޒާމުކޮށްފައިވަނީ އެމް.އެން.ޔޫ މެނޭޖްމަންޓްގެ އިސްނެގުމުގެ މަތިން އެމް.އެން.ޔޫ ފެކަލްޓީ އޮފް އެޑިއުކޭޝަން އާއި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އާއި އެމް.އެން.ޔޫ ސްޓާފް ކްލަބް ގުޅިގެންނެވެ.

މީގެކުރިންވެސް އެމް.އެން.ޔޫގެ ފެކަލްޓީ އޮފް އެޑިއުކޭޝަންގެ ފަރާތުން ދިޔައީ ކުޑަކުދިންގެ ދުވަސް ކުލަގަދަކޮށް ފާހަގަކުރަމުންނެވެ. އެހެންނަމަވެސް މިފަހަރު ޔުނިވަރސިޓީގެ ހުރިހާ ފެކަލްޓީއެއް ގުޅިގެން ބޮޑު ޙަރަކާތެއް ކުރިއަށް ގެންދިއުމަށް އެމް.އެން.ޔޫގެ މެނޭޖްމަންޓުން އޮތީ ނިންމާފައެވެ. އެގޮތުގެ މަތިން އެމް.އެން.ޔޫ.އެސް.ޔޫގެ ފަރާތުން މި ޙަރަކާތުގައި އިސްދައުރެއް އަދާކޮށްފައިވަނީ އެމް.އެން.ޔޫ.އެސް.ޔޫ އިން ފެކަލްޓީ އޮފް އެޑިއުކޭޝަން (އެފް.އީ)ގައި ޤާއިމް ކޮށްފައިވާ ގޮފި ކަމަށްވާ ފެކަލްޓީ އޮފް އެޑިއުކޭޝަން ސްޓޫޑެންޓްސް އެސޯސިއޭޝަސް (ފެސާ)އިންނެވެ.

ތަފާތު  17ސްޓޯލެއްގައި ކުޑަކުދިންނާއި ގުޅޭ ޙަރަކާތްތައް ކުރިއަށްދިޔައިރު، އެމް.އެން.ޔޫ.އެސް.ޔޫގެ ހުރިހާ ގޮތްޕެއްގެ އިތުރުން ފެކަލްޓީ އޮފް އެޑިއުކޭޝަންގެ ހުރިހާ ބެޗުތަކުގެ ދަރިވަރުންވެސް ބައިވެރިވިކަން ފާހަގަކޮށްލެވެއެވެ. މީގެ އިތުރުން މާލޭގެ އެކި ސްކޫލުތަކުގެ ކުޑަކުދިންގެ ހުނަރު ދައްކާލުމަށް ކުޑަކުދިންގެ ޝޯއެއް ވެސް އެދުވަހު ކުރިއަށްދިޔަކަން ފާހަގަކޮށްލެވެއެވެ.

އެމް.އެން.ޔޫ.އެސް.ޔޫ އަށް މަޢުލޫމާތު ދެއްވަމުން ”ފެސާ“ގެ ރައީސާ އަލްފާޟިލާ  މަރިޔަމް ވަޖާޙާ   ވިދާޅުވި ގޮތުގައި މި ޙަރަކާތުގައި ފެކަލްޓީ އޮފް އެޑިއުކޭޝަން ސްޓޫޑެންޓް އެސޯސިއޭޝަން (ފެސާ) އާއިއެކު އެމް.އެން.ޔޫ.އެސް.ޔޫގެ ހުރިހާ ގޮތްޕެއްވެސް ވަނީ ބައިވެރިވެފައެވެ. އަދި މީގެ އިތުރުން، ފެކަލްޓީ އޮފް އެޑިއުކޭޝަންގެ ހުރިހާ ބެޗަކުންވެސް އެކިގޮތްގޮތުން މި ޙަރަކާތުގައި ބައިވެރިވެފައިވާކަން ފާހަގަކުރެއްވިއެވެ.

”މި ޙަރަކާތަށް އެމް.އެން.ޔޫގެ މެނޭޖްމަންޓުން އަދި ފެކަލްޓީ އޮފް އެޑިއުކޭޝަންގެ މެނޭޖްމަންޓުން ވެދެއްވި އެހީތެރިކަމަށް ނިހާޔަތަށް ޝުކުރުވެރިވަން. އަދި އެމް.އެން.ޔޫ.އެސް.ޔޫގެ ހިންގާކޮމިޓީން ވެދެއްވި އެހީވެސް ފާހަގަކުރަން. ޚާއްޞަގޮތެއްގައި އެމް.އެން.ޔޫ ސްޓޫޑެންޓް ސަޕޯޓް ސަރވިސަސްގެ އަލްފާޟިލް ޢަލީ ރަޝީދުގެ ނަން ފާހަގަކޮށްލަން. ދިމާވި ކޮންމެ ކަމެއް ޙައްލުކުރުމުގައިވެސް އެބޭފުޅާގެ އެހީތެރިކަން 100 އިންސައްތައަށް ވަނީ ލިބިފައި.“

އިތުރަށް ވާހަކަދައްކަވަމުން ރައީސާ ވަޖާޙާ ފާހަގަކުރެއްވިއެވެ.

މިފަދަ ބޮޑެތި ޙަރަކާތްތައް އެމް.އެން.ޔޫގެ ފަރާތުން ކާމިޔާބުކަމާއެކު ކުރިއަށްގެންދެވެނީ އެމް.އެން.ޔޫގެ މެނޭޖްމަންޓާއި މުވައްޒަފުންނާއި ދަރިވަރުންގެ އެއްބައިވަންތަކަމުގެ ސަބަބުންކަން ކަށަވަރެވެ. އަދި ގުޅިގެން މަސައްކަތްކޮށް ކާމިޔާބު ހޯދުމުގައި އަބަދުވެސް ތަފާތު ދައްކާތީއެވެ.

އެމް.އެން.ޔޫ.އެސް.ޔޫ އަށް ދެއްވި ބަސްދީގަތުމެއްގައި އެމް.އެން.ޔޫގެ ވައިސް ޗާންސެލަރ ޑރ. ޢަލީ ފަވާޒު ޝަރީފް ވިދާޅުވީ ”އުފަލާ މަޖާ“ މި ނަމުގައި މި ޕްރޮގްރާމް ޢާންމުގޮތެއްގައި ބާއްވަމުން އަންނަނީ ފެކަލްޓީ އޮފް އެޑިއުކޭޝަންގެ ފަރާތުންކަމަށެވެ. އަދި މިއަހަރު އެހެން އަހަރުތަކާއި ޚިލާފަށް އެމް.އެން.ޔޫގެ އެހެން ފެކަލްޓީތަކާއި ހިއުމަން ރިސޯސް ޑިޕާޓްމަންޓުންވެސް މި ޙަރަކާތުގައި ބައިވެރިވާކަމަށް ވިދާޅުވިއެވެ.

”މި ޙަރަކާތުގެ މައިގަނޑުގެ މަޤްޞަދަކީ ދަރިވަރުންނަށް އެ ކުދިންގެ ޓެލެންޓް އަދި އޯގަނައިޒޭޝަނަލް ސްކިލްސް ދައްކާލުމަށް އެހީތެރިވުމާއި އިޖުތިމާޢީ ޙަރަކާތެއްގެ ގޮތުގައި މުޖުތަމަޢަށް ކަމެއްކޮށްދިނުން.“

– ވައިސް ޗާންސެލަރ، ޑރ. ޢަލީ ފަވާޒު ޝަރީފް

އިތުރަށް ވާހަކަ ދައްކަވަމުން ވައިސް ޗާންސެލަރ ވިދާޅުވީ ޙަރަކާތުގެ މަޤްޞަދު ޙާޞިލުވެއްޖެކަމަށް ޤަބޫލުކުރާކަމަށާއި، މޫސުން އެންމެ ރަނގަޅުނުވިއެއްކަމަކު، އުއްމީދު ކުރިވަރަށްވުރެން އިތުރަށް ޢާންމުންނާއި ކުޑަކުދިން ޙަރަކާތުގައި ބައިވެރިވިކަމަށެވެ.

ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)އަކީ ދިވެހިރާއްޖޭގައި އުފެދުނު އެންމެ ފުރަތަމަ ޔުނިވަރސިޓީއެވެ. މި ޔުނިވަރސިޓީއަކީ ކުރާ ކޮންމެ ކަމެއްގައި ތަފާތު ދައްކަމުންދާ ޔުނިވަރސިޓީއެކެވެ. ކާމިޔާބު އެތައް ދަސްވެނިންނެއް އުފައްދާފައިވާ މި ޔުނިވަރސިޓީއަކީ އަބަދުވެސް އިޖްތިމާޢީ ޙަރަކާތްތައް ހިންގުމުގައި އެންމެ ކުރީސަފުގައި އޮންނާނޭ ޔުނިވަރސިޓީއެކެވެ. މިކަމުގައި ޔުނިވަރސިޓީގެ މުވައްޒަފުންނާއި ދަރިވަރުން އަބަދުވެސް އަތުގުޅާލައިގެން ތިބޭނެއެވެ.

– މުޙައްމަދު ޝާން ޢާމިރު
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ