ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އާއި ފެކަލްޓީ އޮފް ޝަރީޢާ އެންޑް ލޯގައި ޤާއިމްކުރެވިފައިވާ ދަރިވަރުންގެ ޔޫނިއަންގެ ގޮފި ސޮސައިޓީ އޮފް ޝަރިޢާ އެންޑް ލޯ(އެސް.އެސް.އެލް)އާ ގުޅިގެން ބާއްވާ ޤުރުއާން މުބާރާތް 1442 ގައި ބައިވެރިވުމުގެ ފުރުސަތު ހުޅުވާލައިފިއެވެ.
މި މުބާރާތަކީ 1442 ވަނަ އަހަރުގެ ރަމަޟާން މަހަށް ޚާއްސަކޮށްގެން ކުރިޔަށް ގެންދާ މުބާރާތެކެވެ. މި މުބާރާތް ބޭއްވުމުގެ އެންމެ ބޮޑު މަޤްސަދަކީ ކީރިތި ޤުރްއާނާއި މެދު ދަރިވަރުންގެ މެދުގައި ލޯބި އިތުރުކޮށް އާލާކުރުމާއިއެކު، އެކުދިންނަށް ލިބިފައިވާ ހުނަރުތައް ދައްކާލުމުގެ ފުރުސަތު ހޯދައިދިނުމެވެ. މި މުބާރާތުގައި ޤައުމީ ޔުނިވަރސިޓީގެ ކޮންމެ ދަރިވަރަކަށްވެސް ބައިވެރިވެވޭނެއެވެ.
ކޮވިޑް-19ގެ މިޙާލަތާ ގުޅިގެން މި މުބާރާތް ކުރިޔަށް ދާނީ ވަރަށް ތަފާތު ގޮތަކަށެވެ. އެގޮތުން މުބާރާތުގެ ބައިވެރިން ވަކި އިންތިޒާމެއްގެ ދަށުން ޤައުމީ ޔުނިވަރސިޓީގެ އޮޑިޓޯރިއަމްއަށް ހާޒިރުކުރެވި، ކިޔެވުން ރިކޯޑު ކުރެވޭނެއެވެ. އަދި ހަމަ އެހެންމެ މިހާލަތުގެ ސަބަބުން ރަށްރަށުގައި މިވަގުތު ތިބި ޤައުމީ ޔުނިވަރސިޓީގެ މާލޭ ކެމްޕަހުގެ ދަރިވަރުންނަށް ވެސް މި މުބާރާތުގައި ބައިވެރިވުމުގެ އިންތިޒާމް ވަނީ ހަމަޖެހިފައެވެ. މުބާރާތުގެ ބައިވެރިން ޤުރުއާން ކިޔެވުން ހަމަޖެހިފައިވަނީ ފަނޑިޔާރުންގެ ހާޒިރުގައި ވަކި އުސޫލެއްގެ ތެރެއިންނެވެ. އަދި ކިޔަވާ ނިމުމުން ބައިވެރިންގެ ކިޔެވުމަށް ފަނޑިޔާރުން އިންސާފު ކުރައްވާނެއެވެ.
މި މުބާރާތުގައި މުޅި މުބާރާތުން ބަލައިގެން ކިޔެވުމުގެ ބައިންނާއި ނުބަލައި ކިޔެވުމުގެ ބައިން، އެއްވަނަ، ދެވަނަ އަދި ތިންވަނަ ހޮވުމަށް ނިންމާފައިވާއިރު، މުޅި މުބާރާތުން އެންމެ މޮޅު ފަސް ދަރިވަރުން ވެސް ހޮވިގެންދާނެއެވެ. އަދި މުޅި މުބަރާތުން އެންމެ މޮޅު ދަރިވަރާއި، އެންމެ މޮޅު ތިން ފެކަލްޓީވެސް ހޮވުމަށްވަނީ ހަމަޖެހިފައެވެ. މުބާރާތުގައި ބައިވެރިވާ ކޮންމެ ދަރިވަރަކަށްވެސް ހަނދާނީ ލިޔުމަކާއި މުސްޙަފެއް ދިނުމަށްވެސް އެސް.އެސް.އެލްއިން ވަނީ ނިންމާފައެވެ.
މި މުބާރާތުގައި ވީހާވެސް ގިނަ ދަރިވަރުން ބައިވެރިވުމަކީ އެސް.އެސް.އެލްގެ ވަރަށް ބޮޑު އެދުމެކެވެ. އަދި މިފަދަ ކަންކަމުގައި ޤައުމީ ޔުނިވާރސިޓީގެ ދަރިވަރުންގެ ޔޫނިއަން ފަރާތުން ލިބެމުންދާ އެއްބާރުލުމާއި ތަރުޙީބަށް ޝުކުރު ދަންނަވަމެވެ.
މި މުބާރާތާއި ގުޅޭ އިތުރު މަޢުލޫމާތު ހޯދުމަށް އެސް.އެސް.އެލްގެ ނައިބު ރައީސް (ޢަމަލީ) އަޙުމަދު ސަދޫފް މޫސާ (9501086) މީޑިއާ ކޯޑިނޭޓަރ ސާއިފް ޢަލީ(9185335)އާ ގުޅުއްވައިގެން ކުރިޔަށް ގެންދިޔުން އެދެއެވެ. ނުވަތަ އެސް.އެސް.އެލްގެ އީމެއިލް މެދުވެރިކޮށްވެސް އިތުރު މަޢުލޫމާތު ހޯއްދެވޭނެއެވެ.
ssl.mnu.studentunion@gmail.com
