ދިވެހިރާއްޖޭގެ ގައުމީ ޔުނިވަރސިޓީގެ ލ.ގަން ކެމްޕަހުގެ ނަރސިންގް ސްކޫލުގެ 5 ވަނަ ބެޗް އަދި 6 ވަން ބެޗްގެ ދަރިވަރުން ހުވާ ކޮށްފިއެވެ. ހުވާ ކުރުމުގެ ރަސްމިއްޔާތު ކުރިޔަށް ގެންގޮސްފައިވާނީ މިއަދު (22 މާރޗް 2018، ބުރާސްފަތި ދުވަހުގެ) ހަވީރު 16:15ގައި ގަން ކެމްޕަސްގައެވެ.
އެމް.އެން.ޔޫ ގަން ކެމްޕަހުގައި މިއަދު ބޭއްވުނު ހުވާ ކުރުމުގެ ރަސްމިއްޔާތުގައި އެމް.އެން.ޔޫ ގަން ކެމްޕަހުގެ މެނޭޖަރ އަލްފާޟިލާ ފާތިމަތު ޝަހިދާ އާއި ސީނިއަރ އެޑްމިނިސްޓްރޭޓިވް އޮފިސަރ އަލްފާޟިލް އަބްދުލް ރަޝީދުގެ އިތުރުން ސްކޫލް އޮފް ނަރސިންގެ ދަރިވަރުންގެ ހިތްތަކުގައި ލޯބި އުފެދިފައިވާ އެކުދިންގެ މުދައްރިސް އަލްފާޟިލާ ސައުޝަން ރަޝީދު ވެސް ބައިވެރިވެވަޑައިގެންނިވިއެވެ. މި ރަސްމިއްޔާތުގައި ސްކޫލް އޮފް ނަރސިންގެ ދަރިވަރުންނަށް ހުވާލައި ދެއްވާފައިވަނީ ރަސްމިއްޔާތުގެ ޝަރަފްވެރި މެޙްމާން އެމް.އެން.ޑީ.އެފް ސެންޓްރަލް އޭރިއާގެ ކޮމާންޑަރ ކާނަލް މުހައްމަދު އިބްރާހިމެވެ.
މި ރަސްމއްޔާތުގައި ސްކޫލް އޮފް ނަރސިންގެ މުދައްރިސް އަލްފާޟިލާ ސައުޝަން ރަޝީދާއި ޝަރަފްވެރި މެޙްމާން އެމް.އެން.ޑީ.އެފް ސެންޓްރަލް އޭރިއާގެ ކޮމާންޑަރ ކާނަލް މުހައްމަދު އިބްރާހިމް ވާހަކަފުޅު ދައްކަވާފައިވެއެވެ. މީގެ އިތުރުން ސްކޫލް އޮފް ނަރސިންގެ ދަރިވަރެއް ކަމުގައިވާ ފާތިމަތު ނަޝާތު ވަހީދު ވަނީ އެކުދިންނަށް ބުރަ މަސައްކަތް ކޮށްދެއްވާ މުދައްރިސުންނަށާއި އެމް.އެން.ޔޫ އިން އެކުދިންނަށް ދެއްވާ އެހީތެރިކަމަށް ވަރަށް ހާއްސަ ޝުކުރެއް އަދާކޮށްފައެވެ.
އަހުރަ އާއި ނަރސިންގެ ދަރިވަރުންގެ އިތުރުން އެމް.އެން.ޔޫ މުވައްޒަފުން ގުޅިގެން އިންތިޒާމު ކުރެވުނު މި ހުވާ ކުރުމުގެ ރަސްމިއްޔާތު ގެންދުވުނީ ވަރަށް ފުރުހަމަ ކަމާ އެކުގައެވެ.
