ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ލ.ގަމު ކެމްޕަހުގެ ގޮފި އަހުރައިގެ ފަރާތުން ބޭއްވި ”އަހުރަ ޤުރުއާން އަދި މަދަހަ މުބާރާތް 1445″ ގެ އެންމެ ކާމިޔާބު ދަރިވަރަކަށް އައިޝާ ބިންތި ޢަބްދުލް ރައުފް ހޮވިއްޖެ އެވެ.
މިއަހަރުގެ މުބާރާތް ބަހާލެވިފައިވަނީ ޖުމްލަ ދެ ކެޓެގަރީ އަކަށެވެ. އެއީ ޤުރްއާން ކިޔެވުމުގެ ބަޔާއި މަދަހަ ކިޔުމުގެ ބައެވެ. އެޑްވާންސްޑް ސެޓިފިކެޓް އިން އެންވަޔަރަމެންޓަލް މެނޭޖްމަންޓްގެ ދަރިވަރު، އައިޝާ ވަނީ މި ދެ ކެޓެގަރީންވެސް އެއްވަނަ ހޯދާފަ އެވެ.
ޤުރްއާން ކިޔެވުމުގެ ބައިން ދެވަނަ ހޯދާފައިވަނީ ބެޗެލާ އޮފް ޓީޗިން ޕްރައިމަރީގެ ދަރިވަރު ހައްސާނާ ޢަބްދުﷲ އެވެ. އަދި މި ބައިން ތިންވަނަ ހޯދާފައިވަނީ ބެޗެލާ އޮފް ޓީޗިން ޕްރައިމަރީގެ ދަރިވަރު، ޢާއިޝަތު އިނާޔާ އެވެ.
މަދަހަ ކިޔުމުގެ ބައިން ދެވަނަ ހޯދާފައިވަނީ ބެޗެލާ އޮފް ޓީޗިން ޕްރައިމަރީގެ ދަރިވަރު އާމިނަތު ފިރާޝާ އެވެ. އަދި ތިންވަނަ ހޯދާފައިވަނީ އެޑްވާންސްޑް ސެޓިފިކެޓް އިން ނާސިންގެ ދަރިވަރު ފާތިމަތު މުޒްނާ އާދަމް އެވެ.
އެމްއެންޔޫ ގަމު ކެމްޕަހުގައި ތަޢުލީމު ހާސިލް ކުރަމުންދާ ދަރިވަރުންނަށް ހުޅުވާލެވިގެން ބޭއްވުނު މި މުބާރާތުގެ މަދަހަ ކިޔުމުގެ ބައިގައި 14 ދަރިވަރުން ވަނީ ބައިވެރިވެފަ އެވެ. އަދި ޤުރްއާން ކިޔެވުމުގެ ބައިގައި 11 ދަރިވަރަކު ވަނީ ބައިވެރިވަފަ އެވެ.
