ކޮންމެ އަހަރަކުވެސް އެމް.އެން.ޔޫ ބިޒްނަސް ސްކޫލްގެ އަހަރީ ދުވަހާއި ގުޅިގެން ބާއްވަމުން އަންނަ ބީ.އެސް ނައިޓް ތަފާތު ފޯރިގަދަ ގިނަ ހަރަކާތްތަކާއެކު ފާހަގަކޮށްފިއެވެ.
ބީ.އެސް.އެސް.އޭ އިން އިންތިޒާމުކޮށްގެން ބޭއްވި މިއަހަރުގެ ޝޯގައި ބީ.އެސް ދަރިވަރުންގެ އިތުރުން އެހެން ފެކަލްޓީ ތަކުގެ ދަރިވަރުންނަށްވެސް ބައިވެރިވުމުގެ ފުރުޝަތު ހުޅުވާލިއެވެ. އެގޮތުން ސްކޫލް އޮފް ނާރސިން، އެފް.އެސް.އެސްގެ އިތުރުން އެފް.އީގެ ހިތްގައިމު އައިޓަމްތަކެއް ވަނީ ހުށަހަޅައިދީފައެވެ.
މިޝޯއަކީ އެކި ފަންނުތަކުގެ ދަރިވަރުންގެ ހުނަރާއި ތަފާތު އެކި މެސެޖުތައް ފޯރުކޮށްދިނުމަށާއި ދަރިވަރުން އެކުގައި މަޖާ ވަގުތުކޮޅެއް ހޭދަކުރުމުގެ ބޭނުމުގައި ބާއްވަމުން އަންނަ ހަރަކާތެކެވެ. އެގޮތުން މިފަހަރުގެ ޝޯގައި ދަރިވަރުންގެ ޑްރާމާ، ތަފާތު އެކި ނެށުންތަކުގެ އިތުރުން ބީ.އެސް ދަރިވަރުންގެ ހާއްސަ ބޮޑުބެރު އައިޓަމްތަކެއްވެސް ފެނިގެންދިޔައެވެ. މީގެ އިތުރުން އަހަރީދުވަހުގެ ޙާއްސަ ކޭކެއް ދަރިވަރުންގެ ފަރާތުން ބީ.އެސްގެ މެނޭޒްމެންޓަށް ހަދިޔާކުރުން އޮތެވެ.
ބީ.އެސް.އެސް.އޭގެ އުންމީދަކީ ކުރިއަށް އޮތް އަހަރުތަކުގައި މިއަށްވުރެ ކުލަގަދަކޮށް އަދި ފުރިހަމަކޮށް މިހަރަކާތް އިންތިޒާމް ކުރުމެވެ. އަދި ބީ.އެސް ނައިޓްގެ ތެރެއިން ވީހާވެސް ގިނަ ދަރިވަރުންނަށް އެކުދިންގެ ހުނަރު ތަރައްޤީކޮށް ކުރިއެރުވުމުގެ ފުރުޝަތު ފަހިކޮށްދިނުމެވެ.
ލިޔުނީ: ފާތިމަތު ޒަހްރާ ( ބީ.އެސް.އެސް.އޭ، މީޑީއާ ކޯޑިނޭޓަރ)
