ކޮންމެ ސެމިސްޓަރ އަކުވެސް އެމްއެންޔޫބީއެސް އާ އަލަށް ގުޅޭ ދަރިވަރުންނަށް ހާއްސަކޮށްގެން ފްރެޝާސް ނައިޓް ބާއްވަމުން އާދެއެވެ. ނަމަވެސް އެހެން ފަހަރު ތަކާއި ހިލާފަށް މިއަހަރުގެ އެ ހަރަކާތް ބޭއްވުނީ “ ސްކޮލާސް ގާލާ ނައިޓް“ ގެ ނަމުގައެވެ.
16 މާޗް ވީ ހޮނިހިރު ދުވަހުގެރޭ މި ހަރަކާތް ކުރިޔަށް ދިޔައީ އެމްއެންޔޫބީއެސް އޮޑިޓޯރިއަމްގައެވެ. އަލަށް ވަން ދަރިވަރުންނަށް އަމާޒުކޮށްގެން އެކި ގޭމުތައް ކުރިއަށް ދިޔައިރު އެ ހަރަކާތަށް އިތުރު ފޯރިއެއް ގެނެސްދިނީ އެމްއެންޔޫބީއެސްގެ ބޮޑު ބެރު ގުރޫޕްގެ ލަވަތަކުންނެވެ. އެގޮތުން އެންމެ ފުރަތަމަވެސް ހަރަކާތް ފެށިގެންދިޔައީ ބޮޑުބެރުގެ ލަވަޔަކުންނެވެ. އެއަށްފަހު ”އެކްޝަން ޕާސް“ ގޭމް ގެންދިޔައީ ދަރިވަރުން އެކި ގްރޫޕްތަކަށް ބަހާލައިގެންނެވެ. އަދި މީގެ އިތުރުން ”ޓިކް ޓެކް ޓޯ“ ގޭމްވެސް ކުރިޔަށް ދިޔައެވެ. މި ގޭމުގައި ދަރިވަރުންގެ އިތުރުން އެމްއެންޔޫއެސްޔޫ ގެ މެމްބަރުންނާއި ބީއެސްއެސްއޭ ލީޑަރުންވެސް ބައިވެރި ވިއެވެ. އަދި އެންމެ ފަހު ގޭމަކަށް ”ޓްރެޝާ ހަންޓް“ ގެންދިޔައިރު މިގޭމުން މޮޅުވި ދެ ދަރިވަރުންނަށް ބީއެސްއެސްއޭގެ ފަރާތުން ވަނީ އިނާމެއްވެސް ހަވާލުކޮށްފައެވެ.
ފްރެޝާސް ނައިޓަކީ ބީއެސްއެސްއޭއިން އިންތިޒާމްކޮށްގެން ކޮންމެ އަހަރަކުވެސް ބާއްވާ އެންމެ ފުރަތަމަ ހަރަކާތެވެ. މީގެ އިތުރުންވެސް ބިޒްނަސް ސްކޫލްގެ ދަރިވަރުންނަށް ހާއްސަކޮށްގެން ބީއެސްއެސްއޭ އިން ކޮންމެ އަހަރަކުވެސް އެކި ހަރަކާތްތައް ކުރިއަށް ގެންދެއެވެ. އެގޮތުން ފުޓްސަލް މުބާރާތާއި، ބީއެސް ނައިޓް ފަދަ ހަރަކާތް ތަކަކީ ދަރިވަރުން އިންތިޒާރު ކުރަމުން އަންނަ ހަރަކާތްތަކެވެ.
ލިޔުނީ : ފާތިމަތު ޒަހްރާ
މީޑިއާ ކޯޑިނޭޓަރ، ބީއެސްއެސްއޭ، އެމް.އެން.ޔޫ.އެސް.ޔޫ
