ބީއެސްއެސްއޭ ފުޓްސަލް ފިއެސްޓާ 2019ގެ ދެތަށިވެސް ބެޗްލާސް ޔުނައިޓެޑް އިން ކާމިޔާބުކޮށްފިއެވެ.
މިމުބާރާތުގައި ފޯރިގަދަ ކުޅުމެއް ކޮންމެ އަހަރަކުވެސް ޓީމްތަކުން ދައްކާއިރު، މިއީ ދެ ޑިވިޝަންގެ ތަށި އެއްޓީމަކުން އުފުލާލި ފުރަތަމަ ފަހަރެވެ. އެއްވެސް މެޗަކުން ބަލި ނުވެ ބެޗްލާސް ޔުނައިޓެޑްގެ ފިރިހެން ޓީމް ސެމީ ފައިނަލްއަށް ދަތުރުކުރިއިރު، ބޮޑު ތަފާތަކުން ސެމީ ފައިނަލްވެސް ވަނީ ކާމިޔާބުކޮށްފައެވެ. އަދި ބެޗްލާސް ޔުނައިޓެޑްގެ އަންހެން ޓީމު ފައިނަލް މެޗް ނިންމާލީ ރަންމެޑަލް ކަށަވަރުކޮށްފައެވެ.
31 އޯގަސްޓްވީ ހޮނިހިރު ދުވަހުގެ ރޭ ފައިނަލްގެ މެޗްތައް ކުޅުނުއިރު ފައިނަލްގައި ފިރިހެން ޑިވިޝަންއިން ބެޗްލާސް ޔުނައިޓެޑް މެޗް ކާމިޔާބުކުރީ 4-1 ގެ ނަތީޖާއިން ނުރޯދަރި ބަލިކޮށްފައެވެ. އަދި އަންހެން ޑިވިޝަންއިން ބެޗްލާސް ޔުނައިޓެޑް ކުރިހޯދީ މިދިޔަ އަހަރުގެ ޗެމްޕިއަން ޓީމް އެވަގްރީން އާ ވާދަކޮށް 2-1 ގެ ނަތީޖާއިންނެވެ.
ފައިނަލް މެޗުގައި ބެޗްލާސް ޔުނައިޓެޑްގެ ފިރިހެން ޓީމުގެ 2 ގޯލް އަހުމަދު ރިޔުޝާން ޖެހި އިރު އެމެޗުގެ އެންމެ މޮޅު ކުޅުންތެރިޔާއަށް ހޮވުނު މުހައްމަދު ސާދު ނިޒާރު ވަނީ އިތުރު 2 ގޯލްޖަހާ ލަނޑު ތަފާތު ބޮޑުކޮށްދީފައެވެ. އަދި އަންހެން ޓީމްއަށް މެޗްގެ 2 ގޯލްވެސް ޖަހައިދީފައިވަނީ އެޓީމުގެ ޖާރޒީ ނަމްބަރު 7، ނަދާ ނައީމްއެވެ.
މުޅި މުބާރާތުގައިވެސް މިދެ ޓީމްއިން ވަނީ މޮޅު ކުޅުމެއް ދައްކާފައެވެ. އެގޮތުން މުބާރާތުގެ އެންމެ މޮޅު ކުޅުންތެރިޔާ އަދި އެންމެ ގިނަ ގޯލްޖެހި ކުޅުންތެރިޔާ ފިރިހެން ޑިވިޝަން އިން ހޮވިފައިވަނީ އެޓީމުގެ ޖާރޒީ ނަމްބަރު 8 އަހުމަދު ރިޔުޝާންއެވެ. އަދި އަންހެން ޑިވިޝަންއިން އެންމެ ގިނަ ގޯލްޖެހި ކުޅުންތެރިޔާއަށް ހޮވިފައިވަނީ އެޓީމުގެ ކެޕްޓަން ނަދާ ނައީމްއެވެ. އަދި އަންހެން ޑިވިޝަންއިން މުބާރާތުގެ އެންމެ މޮޅު ކުޅުންތެރިޔާއަށް ހޮވުނީ އެވަގްރީން ގެ ޖާރޒީ ނަމްބަރު 17 ފާތިމަތު ލަމްހާއެވެ.
ދެޑިވިޝަންއިންވެސް މުބާރާތުގެ އެންމެ މޮޅު ފަސް ކުޅުންތެރިން ފާހަގަކޮށްވަނީ މެޑަލް އާއި ޓްރޮފީ ހަވާލްކޮށްފައެވެ. މި މުބާރާތުގެ އަންހެން ޑިވިޝަންއިން ފެޔާރ ޕްލޭ ޓީމް އަކަށް ހޮވުނީ ލެސް ޑަމެސް އެވެ. އަދި ފިރިހެން ޑިވިޝަންއިން ވިންޑޯސް އެކްސްޕީއެވެ. އަންހެން ޑިވިޝަންއިން ރަނަރއަޕް ޓީމަކީ އެވަގްރީންއެވެ. އަދި ފިރިހެން ޑިވިޝަންއިން ނުރޯދަރިއެވެ.
ލިޔުނީ : ފާތިމަތު ޒަހްރާ
މީޑިއާ ކޯޑިނޭޓަރ، ބީއެސްއެސްއޭ، އެމް.އެން.ޔޫ.އެސް.ޔޫ
