އެމް.އެންޔޫ ބިޒްނަސް ސްކޫލްގެ އަހަރީ ދުވަހާއި ގުޅިގެން ބީއެސްއެސްއޭ އިން ބާއްވާ ބީއެސް ނައިޓްގެ މި އަހަރުގެ ޝޯ ވަރަށް ތަފާތެވެ.
މިއަހަރުގެ މިޝޯއަށް ގިނަ އަދަދެއްގެ ދަރިވަރުންގެ ތަރުޙީބު ލިބުންއިރު އިތުރު ފުރިހަމަކަމެއް ގެނެސްދިނީ ބިޒްނަސް ސްކޫލްގެ ގިނަ ލެކްޗަރާއިން އަދި ޑީން މި ޝޯގައި ބައިވެރި ވުމުންނެވެ. މީގެ އިތުރުން، އެމް.އެން.ޔޫ.އެސްޔޫގެ ހިންގާ ކޮމިޓީގެ މެމްބަރުންވެސް ވަނީ ބީއެސް ނައިޓްގައި އަމަލީ ގޮތުން ބައިވެރިވެފައެވެ.
ޖުމްލަ 12 އައިޓަމާއެކު ދިޔަ މި ޝޯގައި ބީއެސްގެ އިތުރުން އެމް.އެންޔޫގެ އިތުރު 3 ފެކަލްޓީއަކުން އައިޓަމްތައް ހުށަހެޅިއެވެ. މީގެ އިތުރުން ހާއްސަ އައިޓަމެއް ބީއެސްގެ ލެކްޗަރާއެއް ހުށައެޅިއެވެ.
މިއަހަރުގެ ބީއެސް ނައިޓް ތަފާތުވެގެން ދިޔަ އެއް ސަބަބަކީ ފުރަތަމަ ފަހަރަށް މުނިފޫހި ފިލުމުގެ ހަރަކާތްތަކުގެ އިތުރުން ތަފާތު ވަނަތައް ހޮވާ ހަނދާނީ ލިޔުން ދިނުމުންނެވެ. އޭގެތެރޭގައި ބީއެސްއެސްއޭގެ އެންމެ ހިންގުންތެރި އިސްވާރުންނަށާއި އެކި މުބާރާތްތަކަށް ބީއެސްގެ ޓީމަށް ކޯޗުކަން ކޮއްދެއްވި ފަރާތްތަކަށްވަނީ ހަނދާނީ ލިޔުން ދީފައެވެ. އަދި ބީއެސްއެސްއޭގެ ލީޑަރުންގެ ތެރެއިން ފާހަގަކޮށްލެވޭ ލީޑަރުންނާއި ގުޅޭ މަޖާ އެވޯޑުތަކެއްވެސް މި ޝޯގެ ތެރެއިން ދިނެވެ. އަދި ކުރީއްސުރެ ހޮވަމުން އައި މިސްޓަރ އަދި މިސް ބީއެސްވެސް މިއަހަރު ޝޯގައި ހޮވިއެވެ.
ޝޯގެ ތެރެއިން އެމްއެންޔޫބީއެސް މެނޭޖްމެންޓްގެ ފަރާތުން ބީއެސްއެސްއޭ އިން ހިންގާ ހަރަކާތްތަކަށް ހިއްވަރު ދިނުމުގެ ގޮތުން ވަނީ ހާއްސަ އެވޯޑެއް ދެއްވާފައެވެ. މި އެވޯޑު ދެއްވާފައި ވަނީ އެމްއެންޔޫބީއެސްގެ ޑީންއެވެ. އަދި އެމްއެންޔޫއެސްޔޫގެ ކުރީގެ ރައީސް އަރުޝަދު އަޝްރަފް މިޝޯގައި ވާހަކަދައްކަވަމުން ފުރަތަމަފަހަރަށް ފެކަލްޓީއަކުން ވިންގްއަކަށް ހިތްވަރުދިނުމުގެ ގޮތުން އެވޯޑެއްދިން މީ ފުރަތަމަ ފަހަރުކަމަށް ހާމަކުރެއްވިއެވެ. އަދި ކުރީގެ ބީއެސްއެސްއޭ މިހާރުގެ ހަރަކާތްތަކަށް ބަލައިލުމުން ފެނިގެންދާކަމަށްވެސް ފާހަގަކުރެއްވިއެވެ.
ލިޔުނީ : ފާތިމަތު ޒަހްރާ
މީޑިއާ ކޯޑިނޭޓަރ، ބީއެސްއެސްއޭ، އެމް.އެން.ޔޫ.އެސް.ޔޫ
