ފުރަތަމަ އެޕިސޯޑާ އެއްގޮތަށް މި އެޕިސޯޑުގައިވެސް ތިން ސެޖްމެންޓް ގެނެސްދީފައިވާއިރު ފުރަތަމަ ސެޖްމެންޓުގެ ކުރިން، އެމް.އެން.އެސް.ޔޫ ބޮޑުބެރު ގުރޫޕުގެ ބޮޑުބެރު ލަވައެއްވެސް ވަނީ ގެނެސްދީފައެވެ.
މި ޕްރޮގުރާމުގެ ފުރަތަމަ ސެޖްމެންޓްގައި ގެނެސްދީފައިވަނީ، ފެކަލްޓީ އޮފް އެޑިއުކޭޝަންގެ ސްޓޫޑެންޓް އެސޯސިއޭޝަން (ފެސާ)ގެ 2019 ވަނަ އަހަރުގެ ހިންގާ ކޮމެޓީ މެމްބަރުންނެވެ. އެގޮތުން މި ޕްރޮގުރާމްގައި ބައިވެރިވެފައިވަނީ ފެސާގެ އެއަހަރުގެ ވީ.ޕީ އެކަޑަމިކް އަރުޝަމް މުހައްމަދު، އަދި އެއަހަރުގެ ފެސާގެ އެޑްވައިޒަރީ ބޯޑުގެ ކުރީގެ މެމްބަރު އާދަމް ރުޝްދީ އެވެ.
ފެސާއަކީ 2019 ވަނަ އަހަރު ގައުމީ ޔުނިވާސިޓީގެ ސްޓޫޑެންޓް ޔޫނިއަންގެ ބެސްޓް ވިންގްގެ ގޮތުގައިަ ހޮވުނު އެއްވަނަ ވިންގެވެ. އަރުޝަމް ވިދާޅުވެފައިވަނީ، 2019 ވަނަ އަހަރުގެ ބެސްޓް ވިންގަކަށްވުމަށް ވަރަށް ގިނަގުނަ މަސައްކަތްތަކެއް ކުރެވުނު ކަމަށާއި 2019 ވަނަ އަހަރު ހަރަކާތްތައް ހިންގީ 2018 ވަނަ އަހަރުގައި އުޅުނު ލީޑަރުންނަށްވުރެ ގިނަ ލީޑަރުން ގުޅިގެން ކަމަށް އެނާ ވިދާޅުވިއެވެ.
މީގެ އިތުރުން 2019 ގައި އެމް.އެން.އެސް.ޔޫ އަތުން ނަގާ ބަޖެޓައްވުރެ ބޮޑަށް އަމިއްލައަށް ފަންޑް ރެއިސިން އިވެންޓުތަކެއް ބާއްވައިގެން އަމިއްލަ ބަޖެޓެއް ބޭނުންކޮށްގެން ހަރަކާތްތައް ހިންގުމަށް އިސްކަމެއް ދީފައިވާނެ ކަމަށް ވެސް އަރުޝަމް ވިދާޅުވިއެވެ.
އަރުޝަމް ވިދާޅުވިގޮތުގައި ފެސާއިން ހިންގި ހަރަކާތްތަކުގެ ތެރޭގައި އެންމެ ކާމިޔާބު ކޮށް ގެންދެވިފައިވަނީ ޓީޗަރުންގެ ދުވަހުގެ ހަރަކާތްތަކެވެ. މީގެ ތެރެއިންވެސް ”ފެސާ ރަން“ ހައްސަ ކަމަށް އޭނާ ވިދާޅުވިއެވެ.
ޕްރޮގްރާމުގެ ދެވަނަ ސެޖްމެންޓުގައި ގެނެސްދީފައިވަނީ މިދިޔަ އަހަރުގެ އެމް.އެން.އެސް.ޔޫގެ ހިންގާ ކޮމްޓީއެވެ. އެގޮތުން، އެ ކޮމިޓީގެ ވީ.ޕީ އެކަޑަމިކް، އަރުޝަމް މުހައްމަދު އާއި ގޮފިތަކުގެ ނައިބް ރައީސް އަބްދުﷲ ޝަހުނީޒް އާއި މީޑިއާ ކޯޑިނޭޓަރ މުހައްމަދު އަހުނަފް އަދި ވީ.ޕީ އެކްޓިވިޓީސް ހުސައިން އަލީ ބައިވެރިވެލެއްވިއެވެ.
ޝަހުނީޒް ވިދާޅުވީ ކޯވިޑް-19ގެ ސަބަބުން މިދިޔަ އަހަރު ތާވަލް ކޮށްފައިވާ ގިނަ ހަރަކާތްތަކެއް ނުހިންގި، ވަރަށް ގިނަ ދަތިތަކަކާ ކުރިމަތިލާން ޖެހުނުކަމަށެވެ. އަދި އަރުޝަމް ފާހަގަ ކުރެއްވި ގޮތުގައި މިދިޔަ އަހަރު ހަރަކާތްތައް ހިންގަން ޖެހުނީ އޮންލައިންކޮށެވެ. އަދި ބައެއް ކުދިން ރަށްރަށަށް ދިއުމުގެ ސަބަބުންނާއި ގިނަ ކުދިންތަކެއް ފްރޮންޓްލައިންގައި މަސައްކަތްކުރަން ޖެހުމުން ހަރަކާތްތައް ހިންގުމުގައި ދަތިތައް ދިމާވި ކަމަށްވެސް އޭނާ ވިދާޅުވިއެވެ.
މިދިޔަ އަހަރުގެ ހިންގާ ކޮމެޓީގެ މެމްބަރުން ފާހަގަ ކުރެއްވި ގޮތުގައި ކޯވިޑް 19 ގެ ހާލަތާ ގުޅިގެން ދަރިވަރުންނަށް ދިމާވި އެކިއެކި އުދަގޫތަކާއި ދަތިތަކަށް ހައްލު ހޯދިއިދިނުމަށްޓަކައި ވަރަށް ގިނަ މަސައްކަތްތަކެއް އެ ޔޫނިއަން އިން ވަނީ ކޮށްފައެވެ. އަދި މިފަދަ ދަނޑިވަޅެއްގައި ޔުނިވާސިޓީގެ ގިނަ އަދަދެއްގެ ދަރިވަރުންނާއި މުވައްޒަފުން ފްރޮންޓްލައިންގައި މަސައްކަތް ކުރާތީ ފަހުރުވެރިވާ ކަމަށްވެސް އެ ޔޫނިއަން އިން ވަނީ ބުނެފައެވެ.
މި ޕްރޮގްރާމުގެ ހާއްސަ މެހެމާނެއްގެ ގޮތުގައި ގެނެސްދީފައިވަނީ، ރާއްޖޭގެ ފްރީސްޓައިލިންގެ އެންމެ އުސް ތަރި މުހައްމަދު ސައިފް ޒާހިރު އެވެ. ސައިފް ވިދާޅުވި ގޮތުގައި، އެންމެ ފުރަތަމަ ފްރީސަޓިއިލިން ދަސްކުރާހިތްވީ އުމުރުން 15 އަހަރުގައި ބެލި ވީޑިއޯއަކުންނެވެ. އަދި ފްރީސްޓައިލިން ދަސްކުރަން ފެށީ އަމިއްލައަށް ކަމަށްވެސް އޭނާ ވިދާޅުވިއެވެ.
ސައިފް ފާހަގަކުރެއްވި ގޮތުގައި މި ދާއިރާގައި ދިމާވާ އެންމެ ބޮޑު ގޮންޖެހުމަކީ މި ދާއިރާއަށް ޝައުގުވެރިވާ ގިނަ ކުދިންތަކެއް ނެތުމާއި ފްރީސްޓައިލިން ކުރިއެރުވުމުގައި ގިނަ ބަޔެއްގެ ފަރާތުން އެއްބާރުލުން ނުލިބުމެވެ. އަދި މިހާރު ސައިފްގެ އެންމެ ބޮޑު އަމާޒަކީ، ފްރީސްޓައިލިން ދަސްކުރަން ބޭނުންވާ ކުދިންނަށް އެކަން ދަސްކޮށްދިނުންކަމަށާއި މިހާރު ވެސް ބައެއް ކުދިންނަށް ކްލާސްތައް ނަގަމުން އަންނަ ކަމަށް ވެސް އޭނާ ވިދާޅުވިއެވެ.
ފްރީސްޓައިލިންގެ އިތުރުން ސައިފް އަކީ ބޮޑުބެރުގަޔާއި އެކިއެކި ޕްރޮގުރާމްތައް ޕްރެސެންޓް ކުރުމުގައި ހަރަކާތްތެރިވާ ފަންނާނެކެވެ. އަދި އޭނާ އަކީ ޔޫތް ކައުންސިލް މެމްބަރެއްވެސް މެއެވެ.
