2021 ވަނަ އަހަރުގެ އެމް.އެން.ޔޫ ބިޒްނަސް ސުކޫލަށް އަލަށް ގުޅޭ ދަރިވަރުންނަށް އަމާޒުކޮށްގެން ފެކަލްޓީ އިން ބާއްވާ އޮރިއެންޓޭޝަން ބާއްވައިފިއެވެ.
އޮރިއެންޓޭޝަން ބޭއްވިފައިވަނީ އޯގަސްޓް 18 ވަނަ ދުވަހު ބިޒްނަސް ސުކޫލްގެ އޮޑިޓޯރިއަމްގައެވެ.
އެމް.އެން.ޔޫ ބިޒްނަސް ސުކޫލްއަށް އަލަށް ގުޅޭ ދަރިވަރުންނަށް ބާއްވާ އޮރިއެންޓޭޝަން، މިފަހަރުގައި ބާއްވާފައިވަނީ އެއް ދަންފަޅީއެއްގައެވެ.
މި އޮރިއެންޓޭޝަންގައި ދަރިވަރުންނަށް، އެމް.އެން.ޔޫ ބިޒްނަސް ސުކޫލްގެ ކުޑަ ތަޢާރަފްއެއް ދީފައިވާއިރު، ދަރިވަރުންގެ ކިޔެވުމާއި ގުޅޭގޮތުންވެސް ވަނީ މަޢުލޫމާތު ދެވިފައެވެ. އަދި މީގެ އިތުރުން ދަރިވަރުންގެ އިދާރީ ޚިދުމަތްތަކާއި، ކޯސްތަކުގެ މައުލޫމާތާއި، ކޯސްތަކުގެ ފީއާއި، އަދި އެމް.އެން.ޔޫ ބިޒްނަސް ސުކޫލް އަދި ޤައުމީ ޔުނިވަރސިޓީ އިން ފޯރުކޮށްދޭ އެހީތަކުގެ މައުލޫމާތުވެސް ވަނީ ހިއްސާކޮށްދީފައެވެ. ހަމަ މީގެއިތުރުން، ދަރިވަރުންގެ އިމްތިހާންތަކާ ގުޅޭ ގޮތުންނާއި، އެމް.އެން.ޔޫ ބިޒްނަސް ސުކޫލްގެ ލައިބްރަރީ ޚިދުމަތްތަކާ ގުޅޭގޮތުންވެސް ވަނީ މަޢުލޫމާތު ދެވިފައެވެ. އަދި، ދަރިވަރުންގެ ޔޫނިއަންގެ، ބީ.އެސް.އެސް.އޭ ގޮފީއާ ގުޅޭ މައުލޫމާތުވެސް ވަނީ ހިއްސާކުރެވިފައެވެ.
އެންމެ ފަހުން، އަލަށް ގުޅުނު ދަރިވަރުންނަށް އެމް.އެން.ޔޫ ބިޒްނަސް ސުކޫލްގެ ކެމްޕަސް ތެރޭގައި ހުރި މުހިންމު ތަންތަން ދައްކާލާ، މަޢުލޫމާތު ވަނީ ހިއްސާ ކުރެވިފައެވެ. މިކަމުގައި ހަރަކާތްތެރި ވެފައިވަނީ ބީ.އެސް.އެސް.އޭގެ އިސްވާރުންއެވެ. މީގެ ފަހުން އެ ދަރިވަރަކު ކިޔަވާ ކޯހުގެ، ކޯސް ކޯޑިނޭޓަރ ބައްދަލުކޮށް، އެކުއްޖަކު ކިޔަވާ ކޯހުގެ މަޢުލޫމާތުވެސް ވަނީ ދެވިފައެވެ.
އޮރިއެންޓޭޝަންގައި ބީ.އެސް.އެސް.އޭގެ ގިނަ އިސްވާރުން ވަނީ ބައިވެރިވެފައެވެ.
ބީ.އެސް.އެސް.އޭގެ ކޮންމެ ހަރަކާތްތަކެއްވެސް ހިންގުމުގައި ޤައުމީ ޔުނިވަރސިޓީއާއި، ދަރިވަރުންގެ ޔޫނިއަންއާއި، އަދި އެމް.އެން.ޔޫ ބިޒްނަސް ސުކޫލްގެ ފުރިހަމަ އެއްބާރުލުމާއި އެހީތެރިކަން އަބަދުވެސް ފޯރުކޮށްދެމުން ދެއެވެ.
