2019 ވަނަ އަހަރު ފުރަތަމަ ސެމިސްޓަރއިން ފެށިގެން ސްކޮލާރސް ގާލާ ނައިޓްގެ ނަމުގައި ބާއްވަމުން އަންނަ ޙަރަކާތް، މިއަހަރުގައިވެސް ބީ.އެސް.އެސް.އޭ އާއި ތަރަހަ ގުޅިގެން ވަރަށް ކުލަ ގަދަކޮށް ބާއްވައިފިއެވެ.
މި ޙަރަކާތުގައި ބީ.އެސް.އެސް.އޭ އާއި ތަރަހައިގެ 100 އެއްހާ ކުދިން ބައިވެރިވިއެވެ. މި ޙަރަކާތް ކުރިޔަށް ގެންގޮސްފައިވަނީ 27 އޮގަސްޓް ވީ ހުކުރު ދުވަހު ރޭ، އެމް.އެން.ޔޫ ބިޒްނަސް ސުކޫލްގެ އޮޑިޓޯރިއަމްގައެވެ. މިޙަރަކާތުގައި ބީ.އެސް.އެސް.އޭ އާއި ތަރަހައިގެ ގިނަ ލީޑަރުންތަކެއް ބައިވެރިވެފައި ވީއިރު، އެމް.އެން.ޔޫ.އެސް.ޔޫގެ ހިންގާ ކޮމެޓީގެ މެމްބަރުންނާއި އަދި ކުރީގެ ރައީސްވެސް ވަނީ ބައިވެރިވެފައެވެ.
ސީ.އެފް.އެސްގެ ޑީންގެ ވާހަކަފުޅަށް ފަހު، ތަފާތު އެކި ގޭމްތަކާއި، އެމް.އެން.ޔޫ.އެސް.ޔޫގެ ބޮޑުބެރު ގުރޫޕްގެ ފޯރިގަދަ އައިޓަމްތަކެއްވެސް ފެނިގެންދިޔައެވެ. މީގެ އިތުރުން، އެމް.އެން.ޔޫ.އެސް.ޔޫ ޑާންސް ގުރޫޕްގެ ފަރި ހަރަކާތްތަކެއްވެސް ފެނިގެންދިޔައެވެ. އަދި ބީ.އެސް.އެސް.އޭއާއި ތަރަހައިގެ ރައީސުން ދަރިވަރުންނާ ވާހަކަދެއްކެވި އިރުގައި، ބީ.އެސް.އެސް.އޭގެ ކުރީގެ ރައީސް އާއި، އެމް.އެން.ޔޫ.އެސް.ޔޫ ރައީސް އަދި ކުރީގެ މެމްބަރުން ވަނީ ދަރިވަރުންނާ މުޙާތަބު ކޮށް ވާހަކަ ދައްކާފައެވެ.
”ދަރިވަރުންގެ ކުރިއެރުމާއި، އިސްނެގުމާއި، ތަޖުރިބާތައް ހޯދުމަށް މިއަށްވުރެ ރަނގަޅު ޕްލެޓްފޯރމް/މާހައުލެއް ނޯންނާނެ. އިސްނެގުމަށް ހުރިހާ ކުދިންވެސް އިސްކަން ދިނުން އެއީ ވަރަށް އެދޭ ކަމެއް. ލީޑަރސް ނައިޓްގަ ފެނުނު ކުދިން ފެންނަ ކަމީ ވަރަށް އުފާ ކުރާ ކަމެއް.“
- އެން.އެން.ޔޫ.އެސް.ޔޫގެ ކުރީގެ ރައީސް އަރުޝަދު އަޝްރަފް
ސްކޮލާރސް ގާލާ ނައިޓަކީ އެމް.އެން.ޔޫ ބިޒްނަސް ސުކޫލް އަދި ސީ.އެފް.އެސް އާއި އަލަށް ގުޅުނު ދަރިވަރުންނާއެކު މަޖާ އުފާވެރި ވަގުތުކޮޅެއް ހޭދަކުރުމުގެ ބޭނުމުގައި ބީ.އެސް.އެސް.އޭ އަދި ތަރަހައިން އިންތިޒާމްކޮށްގެން ކުރިޔަށް ގެންދިޔަ ޙަރަކާތެކެވެ. ސްކޮލާރސް ގާލާ ނައިޓްއަކީ ބީ.އެސް.އެސް.އޭ އާއި ތަރަހައާ ގުޅިގެން މިއަހަރު ބޭއްވި ފުރަތަމަ ޙަރަކާތެވެ.
