ދަރިވަރުންގެ ފަރާތުން ލިބުނު ބޮޑު ތާއީދަކާއި އެކު ބިޒްނަސް ސްކޫލް ސްޓޫޑެންޓް އެސޯސިއޭޝަނުން މިއަހަރު ބޭއްވި ފުރަތަމަ މޫވީ ނައިޓް ނިންމާލައިފި އެވެ.
ގިނަ އަދަދެއްގެ ދަރިވަރުން ބައިވެރިވި މި އިވެންޓަކީ ކުރިއަށް އޮތް އެމްއެންޔޫއެސްޔޫ އިންޓާރ ފެކަލްޓީ ވޮލީބޯޅަ މުބާރާތުގައި ބީ.އެސް.އެސް.އޭއިން ބައިވެރިވާ އަންހެން އަދި ފިރިހެން ޓީމުގެ ހަރަދުތައް ބެލެހެއްޓުމަށް ފަންޑު ހޯދަން ކުރިއަށްގެންދިޔަ ފަންޑް ރެއިސިންގ އިވެންޓެކެވެ. އަދި ކިޔެވުމާއި ވަޒީފާގެ މާހައުލުން އެކަހެރިވެލާ ދަރިވަރުން ހިތްހަމަ ޖައްސާލަން ވަގުތުކޮޅެއް ހޯދައިދިނުމަކީ ވެސް މި އިވެންޓުގެ އެއް މަގުސަދެވެ.
މިއީ މިއަހަރުގެ ތެރޭގައި ބީ.އެސް.އެސް.އޭއިން ބޭއްވި ފުރަތަމަ މޫވީ ނައިޓެވެ. މި ސެމިސްޓާގެ ކުރިއަށް އޮތް ތަނުގައި ވެސް އިތުރު މޫވީ ނައިޓު ތަކެއް ބޭއްވުމަށް ބީ.އެސް.އެސް.އޭ އިން ވަނީ ނިންމާފަ އެވެ. 2019 ވަނަ އަހަރުން ފެށިގެން ބީ.އެސް.އެސް.އޭއިން އަންނަނީ ކޮންމެ އަހަރަކުވެސް ގިނަ އަދަދެއްގެ މޫވީ ނައިޓު ތަކެއް ބާއްވަމުންނެވެ. އަދި މި އިވެންޓަކީ ގިނަ ބަޔަކު ބައިވެރިވާ ”ހައުސް ފުލް“ އިވެންޓެކެވެ.
މި ހަރަކާތް އިންތިޒާމުކޮށް ހިންގުމުގައި ހަރަކާތްތެރިވެފައި ވަނީ ބީ.އެސް.އެސް.އޭގެ ލީޑާރސް ގްރޫޕުގެ ދަރިވަރުންނެވެ. ބީ.އެސް.އެސް.އޭ އިން ހިންގާ ހުރިހާ ހަރަކާތް ތަކެއްގައި ވެސް ލީޑާރސް ގްރޫޕްގެ ފަރާތުން ލިބޭ އެއްބާރުލުން ފާހަގަ ކުރެވެ އެވެ.
