އެމްއެންޔޫ ބިޒްނަސް ސްކޫލް ސްޓޫޑެންޓް އެސޯސިއޭޝަންގެ ފަރާތުން ރަމަޞާން މަހަށް ހާއްސަ ކޮއްގެން މުޅިން އާ ޕްރޮގްރާމެއް ފަށައިފިއެވެ.
ވޭތުވެ ދިޔަ ރަމަޞާން މަހު ބީއެސްއެސްއޭ ސްޓޫޑިއޯ ނަމުގައި ގެންދިޔަ ޝޯ އަކީ ދަރިވަރުން އަދި ބެލުންތެރިން ގެ މެދުގައި ބޮޑު ތަރުހީބެއް ލިބިގެން ދިޔަ ޝޯ އެކެވެ. ތިން ސެގްމެންޓަކަށް ބަހާލައިގެން ގެނެސްދީފައިވާ މި އެޕިސޯޑުވެސް ފެށިގެން ދިޔައީ އެމްއެންޔޫ އެސްޔޫ ގެ ވަރަށް ފޯރިގަދަ ބޮޑުބެރު ލަވަޔަކުންނެވެ. އެގޮތުން މި ހަފްތާގެ މެހެމާނުންގެ ގޮނޑިން ބައްދަލު ކޮށްލީ 2019 ވަނަ އަހަރުގެ ދެވަނަ އަށް އެންމެ ކާމިޔާބު ގޮފި ސޮސައިޓީ ފޯ ހޮސްޕިޓަލިޓީ އެންޑް ޓޫރިޒަމް ސްޓަޑީސް (ޝެޓްސް) ގެ ހިންގާ ކޮމިޓީ ގެ މެމްބަރުންނެވެ. އެގޮތުން 2019 ވަނަ އަހަރުގަ ރައީސް ގެ މަގާމް އަދާކުރެއްވި މީކާއިލް، ހަޒާންދާރު ސުއައިދު، އޭރުގެ މީޑިއާ ކޯޑިނޭޓަރު ޝަމްލާ، ވީޕީ އެކަޑެމިކް ޝިއުރާ އަދި ވީޕީ އެކްޓިވިޓީސް ޒައިދް ގެ އިތުރުން އޭރުގެ ސެކްރެޓަރީ ރިފްގާ ވެސް ވަނީ ބައިވެރިވެވަޑައިގަނެފައެވެ. ކާމިޔާބު ގޮތްޕަކަށް ވުމުގެ އިތުރުން ތަފާތު ގިނަ ހަރަކާތްތަކެއް ކުރިއަށް ގެންގޮސް ކާމިޔާބަށް ވާސިލްވުމުގެ މައިގަނޑު ސަބަބަކީ ދަރިވަރުންގެ ބައިވެރިވުމާއި އެއްބާރުލުން ލިބުން ކަމަށް ޝެޓްސް ގެ މެމްބަރުން ވަނީ ހާމަކޮށްފައެވެ. އެންމެ ދަތިކަމަކަށް ވެގެން ދިޔައީ ޝައުގުވެރިކަން ހުރި ކުދިން ހޯދާ ވަރުގަދަ ޓީމް އެއް އުފެއްދުން ކަމަށްވެސް ޝެޓްސް ގެ މެމްބަރުން ފާހަގަކޮށްލެއްވިއެވެ. އެހެން ނަމަވެސް އެ އަހަރުގެ ފުރަތަމަ ސެމިސްޓަރ ނިމި ދެވަނަ ސެމިސްޓަރ ފެޝުން އިރު ބޮޑު ލަޝްކަރެއް އޮތް ކަމަށް ފާހަގަކުރިއެވެ.
މި ޝޯގެ ދެވަނަ ސެގްމެންޓް އާއެކު ބައްދަލު ކޮށްލީ 2021 ވަނަ އަހަރުގެ ހިންގާ ކޮމިޓީ ގެ މެމްބަރުން ކަމަށްވާ މިހާރުގެ ރައީސް ޝަހުނީޒް އާއި ވީޕީ ވިންގްސް ގެ މަގާމުގައި ހުރި ޒައިދް އަދި ވީޕީ އެކްޓިވިޓީސް މަގާމުގައި ހުރި ހުސެއިން އަލީ، އާންމު ނަމުން ނަމަ ކޭޑީ ވެސް ވަނީ ބައިވެރިވެލައްވާފައެވެ. މި އަހަރުވެސް ތަފާތު ގިނަ ހަރަކާތްތަކެއް ކުރިޔަށް ގެންދަން ރާވާފައި ވާކަމުގެ އުފާވެރި ޙަބަރު ޔޫނިޔަން ގެ މެމްބަރުން ވަނީ ދެއްވާފައެވެ. އޭގެ އިތުރުން ދަރިވަރުން ގެ މެދުގައި ތަފާތު އެކި ކަހަލަ ހުނަރުތައް އުގަންނައިދޭނެ ފޯރަމް އެއްވެސް ބޭއްވުމަށް ވަނީ ރާވާފައެވެ. އެހެން އަހަރުތަކާ ހިލާފަށް މުޅިން އަލަށް ކުލަބްތަކެއް އުފައްދާ ދެމެހެއްޓެނިވި ގޮތެއްގައި ކުޅިވަރު އަދި އިލްމީ ހަރަކާތްތައް ހިންގުމަށް ވަނީ ރާވާފައެވެ. އަދި އެއާއެކު މެނޭޖްމެންޓްގެ ފަރާތުން ބޮޑު އެއްބާލުމެއް ލިބި ޔޫނިޔަން މިހާ ކުރިއަރައިގެން ދިޔުމުގެ ސަބަބަކީ ވިންގުތަކުން ކުރާ މަސައްކަތް ކަމަށްވެސް ޔޫނިޔަން ގެ މެމްބަރުން ވަނީ ހާމަކޮއްފައެވެ. ކޮވިޑް ގެ އުނދަގޫ ހާލަތާ އެކުވެސް ތަފާތު ހަރަކާތްތަކެއް ތަންދޭ ވަރަކުން ބާއްވާނެ ކަމަށް ވަނީ ބުނެފައެވެ.
ތިންވަނަ ސެގްމެންޓް އިން ބައްދަލް ކޮއްލީ މި ހަފްތާގެ ހާއްސަ މެހެމާން ކަމަށްވާ ވާންޗޯ އެންޓަޓެއިންމެންޓް ގެ ނާޒިރް ޝިހާމް އެވެ. މަޝްހޫރު ނަމުން ނަމަ ކާއްޓެއެވެ. މީ ހަމަގައިމުވެސް ބެލުންތެރިންނަށް އާ ނަމަކަށް ނުވާނެއެވެ. ސްނެޕް ފިލްޓަރ އެއްގެ ޒަރިއްޔާއިން ކޮމެޑީ ގެ ދާއިރާގައި ކާއްޓެ ގެ ހުނަރު ގިނަ ބަޔަކަށް މިވަނީ ފެނިފައެވެ. ކާއްޓެ ވިދާޅުވި ގޮތުގައި ސޯޝިއަލް މީޑިއާ ޕްލެޓްފޯމް އެއްގައި ކުރިއަރަން ދިމާވި އެންމެ ބޮޑު ގޮންޖެހުމަކީ މީހުންގެ ފާޑުކިޔުންތަކެވެ. އެހެން ނަމަވެސް ފާޑުކިޔުމާ ކުރިމަތިލައިގެން މެނުވީ ކުރިއެރުން ނުލިބޭނެ ކަމަށް ކާއްޓެ ވަނީ މި ޕްރޮގްރާމުގައި ހިއްސާކޮށްފައެވެ. ފިލްމީ ދާއިރާއަށް ވަންނަން ޝައުގުވެރިކަން ހުރި ނަމަވެސް މިހާރު އެ ހިޔާލު މުޅިން ބަދަލް ވެފައިވާކަމަށް ކާއްޓެ ވަނީ ބުނެފައެވެ. އެހެން ނަމަވެސް ކޮމެޑީ ކުރިއަރުވާ ޕްލެޓްފޯމް އެއް ފެނުމަކީ ކާއްޓެ ދެކޭ ވަރަށް ފޮނި ހުވަފެނެކެވެ.
ކޮންމެ ސެގްމެންޓް އެއްގައި ވެސް މެހެމާނުންގެ އިންޓަވިއު ކުރުމުގެ އިތުރުން މެހެމާނުންނާއިއެކު ތަފާތު ގޭމުތަކެއްވެސް ޕްރެސެންޓަރުން ވަނީ ކުރިއަށް ގެންގޮސްފައެވެ.
