ބީ.އެސް.އެސް.އޭ އަށް އަލަށް ގުޅުނު ލީޑަރުންނަށް އަމާޒުކޮށް މިއަހަރުވެސް ”ބީ.އެސް.އެސް.އޭ ލީޑާރސް ކޮންވީން“ ބާއްވައިފިއެވެ.
މި ޙަރަކާތް ބާއްވާފައިވަނީ 18 ސެޕްޓެމްބަރ 2021 ވަނަ ދުވަހުގެ ރޭ، 20:00 ގައެވެ. މި ޙަރަކާތް ހިންގުމުގައި ބީ.އެސް.އެސް.އޭގެ ހިންގާ ކޮމެޓީގެ މެމްބަރުންގެ އިތުރުން، ކުރީގެ ލީޑަރުންވެސް ވަނީ ބައިވެރިވެފައެވެ. މި ޙަރަކާތުގައި ބީ.އެސް.އެސް.އޭއަށް އަލަށް ގުޅުނު ލީޑަރުންނަށް، ބީ.އެސް.އެސް.އޭ ލީޑާރސް ގުރޫޕްގެ ކުޑަ ތަޢާރަފެއް ދެވިގެން ދިޔައެވެ. އަދި ބީ.އެސް.އެސް.އޭއިން މިއަހަރު ހިންގަން ރާވާފައިހުރި ހަރަކާތްތައްވެސް ހިއްސާ ކުރެވިގެންދިޔައެވެ. މީގެ އިތުރުން ކުރީގެ ލީޑަރުންނާ މިހާރުގެ ލީޑަރުންނާ ދެމެދު ހިޔާލު ބަދަލުކުރެވިގެންވެސް ދިޔައެވެ. އަދި މުނިފޫހި ފިލުވުމުގެ ގޮތުން ތަފާތު މަޖާ ކުޅިވަރުތަކެއްވެސް ކުޅެވިގެންދިޔައެވެ. މި ޙަރަކާތް ބާއްވާފައިވަނީ އެމް.އެން.ޔޫ ބިޒްނަސް ސުކޫލްގެ ސެމިނަރ ރޫމްގައެވެ.
މި ޙަރަކާތަކީ ކޮންމެ އަހަރަކުވެސް ބީ.އެސް.އެސް.އޭއަށް އަލަށް ގުޅޭ ލީޑަރުންނަށް އަމާޒުކޮށްގެން ކުރިއަށްގެންދާ ޙަރަކާތެކެވެ. މިގޮތަށް ކޮންމެ އަހަރަކުވެސް އާ ލީޑަރުންތަކެއް ބީ.އެސް.އެސް.އޭއަށް ގުޅުމަކީ ބީ.އެސް.އެސް.އޭގެ ޙަރަކާތްތައް ހިންގުމުގައި އިތުރަށް ފަސޭހަވެގެންދާ ކަމެކެވެ. އަދި ދަރިވަރުންނަށްވެސް ތަފާތު ތަޖުރިބާތަކެއް ކުރުމުގެ ފުރުސަތު ލިބިގެންދާ ކަމެއްވެސްމެއެވެ. މިވަގުތު ބިޒްނަސް ސުކޫލްގައި ތަޢުލީމް ހާސިލްކުރަމުންގެންދާ ކޮންމެ ދަރިވަރަކަށްވެސް މިފުރުސަތު ވަނީ ހުޅުވާލެވިފައެވެ.
