ގިނަ އަހަރުތަކެއްގެ އިންތިޒާރަށް ނިމުމެއް – އެމް.އެން.ޔޫ.އެސް.ޔޫ – ބީ.އެސް.އެސް.އޭ ބިޒްނަސް ފޯރަމް މިއަންނަ ހުކުރު ދުވަހު

އެތައް އަހަރުތަކެއްގެ ދިގު އިންތިޒާރަކަށްފަހު މިއަހަރުގެ 29 އަދި 30 އޮކްޓޯބަރ ވާ ހުކުރު ދުވަހާއި އަދި ހޮނިހިރު ދުވަހުގައި، އެމް.އެން.ޔޫ.އެސް.ޔޫ – ބީ.އެސް.އެސް.އޭ ބިޒްނަސް ފޯރަމް ބާއްވަން ހަމަޖެހިއްޖެއެވެ.

މި ފޯރަމްއަކީ ރާއްޖޭގެ ބިޒްނަސްތަކަށް ޙާއްސަކޮށްގެން ކުރިޔަށްގެންދާ ފޯރަމްއެކެވެ.

މިއަހަރު މުޅިން އަލަށް ކުރިޔަށް ގެންދާ މި ފޯރަމްގައި މުޅިއަކު 7 ބިޒްނަސް އަކުން ބައިވެރިވެއެވެ. އެއީ، ނެކްސްޓް ސޮލިއުސަން، ވަންޝޮޓް އިވެންޓްސް، ބޭކްސް ބައި ފިރާ، އެމް ކިޗަން، ސޫޓީ، ޔުނިކް ލައިފްސްޓައިލް، އަދި ކަސަބު ބައި ހިދާއެވެ. މި ޙަރަކާތް ކުރިޔަށް ގެންދާނީ އެމް.އެން.ޔޫ ބިޒްނަސް ސުކޫލްގެ އޮޑިޓޯރިއަމް ގައެވެ.

މި ފޯރަމްގައި، ބައިވެރިވި ބިޒްނަސް ތަކަށް، އެ ބިޒްނަސްތަކާއި ބެހޭ ގޮތުން ސުވާލު ކުރެވިގެންދާނެއެވެ. އެގޮތުން ބިޒްނަސްގެ ކުޑަ ތަޢާރަފާއި، ބިޒްނަސް އުފެދިގެން އައި ގޮތާއި، ދިމާވި ދަތިތަކާއި، ކުރިއެރުވުމަށް ކުރި އަދި ކުރެވެމުންދާ މަސައްކަތާ، އަދިވެސް މިކަހަލަ މުހިންމު ކަންކަމާ ބެހޭގޮތުންވެސް ވާހަކަ ދެކެވިގެންދާނެއެވެ.

މި ފޯރަމް ކުރިޔަށް ގެންދާނީ މުޅިޔަކު 2 ސެޝަން އަކަށް ބަހައިލައިގެންނެވެ. އެއީ ހަވީރު ކުރިޔަށް ގެންދާ ސެޝަން އަކާއި އަދި ރޭގަނޑު ކުރިޔަށް ގެންދާ ސެޝަންއެކެވެ. މި ފޯރަމްގައި ބައިވެރިވި ބިޒްނަސްތައް، މި ސެޝަން ތަކަށް ބަހާލެވެއެވެ. އެގޮތުން ހަވީރު 16:00 ގައި ކުރިޔަށްދާ ސެޝަންގައި ހިމެނެނީ ސޫޓީ، ޔުނިކް ލައިފްސްޓައިލް، އަދި ކަސަބު ބައި ހިދާއެވެ. ރޭގަނޑު 20:00ގެ ސެޝަންގައި ހިމެނެނީ ނެކްސްޓް ސޮލިއުސަން، ވަންޝޮޓް އިވެންޓްސް، ބޭކްސް ބައި ފިރާ، އަދި އެމް ކިޗަންއެވެ.

29 އޮކްޓޯބަރ 2021 ވަނަ ދުވަހުގެ ސެޝަންއަށްފަހު، 30 އޮކްޓޯބަރ 2021 ވަނަ ވާ، ހޮނިހިރު ދުވަހުގައި، ފޯރަމްގައި ބައިވެރިވި ބިޒްނަސް ތަކުގެ ސްޓޯލްތައްވެސް ހުޅުވިފައި ހުންނާނެއެވެ. ސްޓޯލްތައް ބެހެއްޓިފައި ހުންނާނީ އެމް.އެން.ޔޫ ބިޒްނަސް ސުކޫލްގައެވެ. އަދި މީގެ އިތުރުން ބިޒްނަސް ފޯރަމްއާއި ގުޅޭ ބެނާރތަކެއްވެސް ހަރުކުރެވިގެންދާނެއެވެ. މި ބެނާރތައް ހަރުކުރެވިފައި ހުންނާނީ އެމް.އެން.ޔޫ ބިޒްނަސް ސުކޫލްއާއި އަދި އެމް.އެން.ޔޫ ސެންޓްރަލް ގައެވެ.

މި ބިޒްނަސް ފޯރަމް އަކީ ބީ.އެސް.އެސް.އޭއިން އެމް.އެން.ޔޫ.އެސް.ޔޫ އާއި ގުޅިގެން ކުރިޔަށް ގެންދާ ޙަރަކާތެވެ. މި ބިޒްނަސް ފޯރަމްގެ މަޤުސަދަކީ ރާއްޖޭގައި ކުރިއަރައިފައިވާ ބިޒްނަސްތަކާ ވާހަކަ ދައްކާ، ކުރިއަރައިގެން ދިޔުމުގައި ކުރަން ޖެހުނު މަސައްކަތްތަކާއި، ދިމާވި ދަތިތައް ފާހަގަކޮށް، މަޢުލޫމާތު ހިއްސާކުރުމެވެ. އަދި ކުރިމަގުގައި އަމިއްލަ ވިޔަފާރި ފައްޓަން ބޭނުންވާ ކުދިންނަށް ކުރަން ޖެހޭ މަސައްކަތްތައް ހިއްސާކޮށް، އެކުދިން މިކަމަށް އަޙުލުވެރިކުރުވާ އަދި ހިތްވަރުދިނުންވެސްމެއެވެ.