އިންޖިނިއަރިންގް ސައިންސް އެންޑް ޓެކްނޮލޮޖީ އެސޯސިއޭޝަން (އެސްޓާ)، ބިޒްނަސް ސްކޫލް ސްޓޫޑެންޓްސް އެސޯސިއޭޝަން (ބީއެސް.އެސް.އޭ) އަދި ސޮސައިޓީ އޮފް ޝަރީއާ އެންޑް ލޯ (އެސް.އެސް.އެލް) ގުޅިގެން، އެފެކަލްޓީތަކާއި އަލަށް ގުޅޭ ދަރިވަރުންނަށް ”ގާލާ ނައިޓް“ ބާއްވަން ނިންމައިފިއެވެ.
ގައުމީ ޔުނިވާރސިޓީގެ ޕީއީ ހޯލްގައި ބޭއްވުމަށް ހަމަޖެހިފައިވާ ”ގާލާ ނައިޓާއި“ ގުޅިގެން މި އިވެންޓުގެ އިންތިޒާމީ ކޮމެޓީގެ މެމްބަރެއް ކަމުގައިވާ އެސް.އެސް.އެލްގެ ރައީސް، އަޙްމަދު ސަދޫފް ވިދާޅުވި ގޮތުގައި ”ގާލާ ނައިޓް“އަކީ ބީ.އެސް.އެސް.އޭގެ އެދުމުގެ މަތިން ތިން ވިންގުން ގުޅިގެން ހިންގޭ ހަރަކާތެއް ކަމަށާއި، މި ހަރަކާތުގެ އެންމެ ބޮޑު މަގްސަދަކީ ތިން ފެކަލްޓީގައި ކިޔަވާ ދަރިވަރުން އުފާވެރި މާހައުލަކުން ބައްދަލުވެ، ވިންގްތަކުން ހިންގޭ ހަރަކާތްތަކާއި މެދު ހޭލުންތެރިކޮށް ކުދިންގެ ބައިވެރިވުން އިތުރުކުރުން ކަމަށެވެ. އަދި ހަމައެހެންމެ ސަދޫފް ވިދާޅުވި ގޮތުގައި މި އިވެންޓްއަކީ ވަރަށްވެސް ކާމިޔާބު އިވެންޓްއަކަށް ހެދުމަށްޓަކައި ތިން ގޮފި ގުޅިގެން އެކި ކަހަލަ ގޭމްތަކާއި ހަރަކާތްތައް މި އިވެންޓްގައި ކުރިއަށްގެންދިޔުމަށް ނިންމާފައިވާ ކަމަށެވެ.
”ގާލާ ނައިޓް“ އަކީ ކޮންމެ އަހަރަކުވެސް ބީއެސް.އެސް.އޭ އިން އިންތިޒާމްކޮށްގެން ބާއްވަމުންއަންނަ ކުލަގަދަ އިވެންޓްއެކެވެ. މިއިވެންޓްއާއި ގުޅޭ ގޮތުން ބީ.އެސް.އެސް.އޭގެ ނިމިދިޔަ ދައުރުގެ ރައީސް އަދި މި އިވެންޓްގެ އިންތިޒާމީ ކޮމެޓީގެ މެމްބަރު މަޖުނާ އަޙްމަދު ވިދާޅުވި ގޮތުގައި މި އަހަރުގެ ގާލާ ނައިޓަށް އެސް.އެސް.އެލް އަދި އެސް.ޓާއަށް ދައުވަތު ދިނުމުގެ އެންމެ ބޮޑު މަގްސަދަކީވެސް ފާއިތުވި އަހަރުތަކުގެ ގާލާ ނައިޓްތަކެކޭ އެއްފަދައިން ނުވަތަ އެއަށްވުރެ ވެސް ކާމިޔާބު އިވެންޓްއަކަށް މި އިވެންޓް ހެދުމަށްކަމަށާއި، އަމާޒަކީ މިކަން މިހާރުގެ ބީއެސް.އެސް.އޭގެ ހިންގާ ކޮމެޓީއާއި އެހެން ގޮފިތަކުގެ ހިންގާ ކޮމެޓީތަކާއި އެއްކޮށް ބުރަކޮށް މަސައްކަތްކޮށް އެކަން ޙާސިލްކުރުން ކަމަށެވެ. މަޖުނާގެ އެދުމަކީ ވީހާވެސް ގިނަ ދަރިވަރުން މި އިވެންޓްގައި ބައިވެރިވެދިނުމެވެ.
އެސް.ޓާ، ބީއެސް.އެސް.އޭ އަދި އެސް.އެސް.އެލް ގުޅިގެން ބޭއްވޭ ”ގާލާ ނައިޓް 2022“ ބޭއްވުމަށް ހަމަ ޖެހިފައިވަނީ 26 ފެބްރުއަރީ 2022 ވަނަ ދުވަހުގެ ރޭ 7:45 ގައިއެވެ.
