އިންޖިނިއަރިންގް ސައިންސް އެންޑް ޓެކްނޮލޮޖީ އެސޯސިއޭޝަން (އެސްޓާ)، ބިޒްނަސް ސްކޫލް ސްޓޫޑެންޓްސް އެސޯސިއޭޝަން (ބީއެސް.އެސް.އޭ) އަދި ސޮސައިޓީ އޮފް ޝަރީއާ އެންޑް ލޯ (އެސް.އެސް.އެލް) ގުޅިގެން، އެ ފެކަލްޓީތަކާއި އަލަށް ގުޅޭ ދަރިވަރުންނަށް ޙާއްސަކޮށް ”ގާލާ ނައިޓް“ ބާއްވައިފިއެވެ.
މި ހަރަކާތް ކުރިއަށް ގެންގޮސްފައިވަނީ 26 ފެބްރުއަރީ 2022 ދުވަހުގެރޭ ދިވެހިރާއްޖޭގެ ގައުމީ ޔުނިވަރސިޓީގެ އެފްއީ ޕީއީ ހޯލުގައެވެ.
އެކުވެރި މާހައުލެއްގައި ކުރިއަށް ގެންދިޔަ ގާލާ ނައިޓުގައި ތަފާތު ގިނަ ކުޅިވަރުތަކާއެކު މުނިފޫހިފިލުވުމުގެ ހަރަކާތްތައް ކުރިއަށް ގެންގޮސްފައިވެއެވެ. މިގޮތުން އެކި ގޭމްތަކާއި، އެމް.އެން.ޔޫ.އެސް.ޔޫގެ ބޮޑުބެރު އަދި އަންހެން ދަރިވަރުންގެ ނެށުމުގެ ފަރި ހަރަކާތްތަކެއް މި ހަރަކާތުގައި ފެނިގެން ދިޔައެވެ. މި އިވެންޓުގައި 3 ފެކަލްޓީއެއްގެ ދަރިވަރުންނާއެކު ދަރިވަރުންގެ ޔޫނިއަންގެ މިހާރުގެ ހިންގާ ކޮމިޓީއާއި، ހިންގާ ކޮމިޓީގެ ކުރީގެ މެންބަރުންނާއި އެޑްވައިޒަރީ ބޯޑް މެމްބަރުން އަދި ގޮފިތަކުގެ މިހާރުގެ އަދި ކުރީގެ ހިންގާ ކޮމިޓީތަކުގެ މެންބަރުން ބައިވެރިވެފައިވެއެވެ.
ގާލާ ނައިޓާ ބެހޭގޮތުން މި އިވެންޓުގެ ހިންގާ ކޮމެޓީގެ މެމްބަރެއްކަމުގައިވާ ބީ.އެސް.އެސް.އޭގެ ރައީސް އަޙްމަދު ޝާހީ ވިދާޅުވި ގޮތުގައި ގާލާ ނައިޓާކީ ވަރަށްވެސް ކާމިޔާބު އިވެންޓެކެވެ. އަދި ގާލާ ނައިޓް އެހާ ފުރިހަމަކޮށް ކުރިއަށް ގެންދިޔުމުގައި އެހީތެރިވިދެއްވި އެންމެހާ ފަރާތްތަކަށް މި އިވެންޓްގެ އިންތިޒާމީ ކޮމެޓީއިން ވަނީ ޝުކުރު އަދާކޮށްފައިއެވެ. މި އިވެންޓު ކުރިއަށް ގެންދިޔުމުގެ ބޭނުމަކީ 3 ފެކަލްޓީގެ ދަރިވަރުންގެ މެދުގައި އެކުވެރިކަން އާލާކުރުމާއެކު އެކަކު އަނެކަކަށް ތަޢާރަފުވެ އެކުގައި އުފާވެރި ވަގުތުކޮޅެއް ހޭދަކޮށް، ކިޔެވުމުގެ އިތުރުން ”ސޮފްޓް ސްކިލްސް“ ފަދަ ހުނަރުތައް ކުދިންގެ ކިބައިގައި އަށަގެންނެވުންކަމަށް މި އިވެންޓު އިންތިޒާމީ ކޮމެޓީއިން ވަނީ ފަހަގަކޮށްފައިއެވެ.
ގާލާ ނައިޓަކީ ކޮންމެ އަހަރަކުވެސް ކުލަގަދަކޮށް ބާއްވަމުން އަންނަ އިވެންޓެކެވެ. މި އަހަރު މިއިވެންޓް ބޭއްވިގެން ދިޔައީ 3 ފެކަލްޓީއެއްގެ ދަރިވަރުންގެ ގޮފިތަކެއް އެކުވެގެންނެވެ.
