ބިޒްނަސް ސްކޫލް ސްޓޫޑެންޓް އެސޯސިއޭޝަން (ބީ.އެ.ސް.އެ.ސް.އޭ) ގެ ފަރާތުން ”ހަވީރީ ކޮއްތު“ގެ ނަމުގައި ފުޑް ސްޓޯލެއް ހުޅުވައިފިއެވެ.
މި ފުޑްސްޓޯލް ކުރިއަށް ގެންދަނީ އެމްއެންޔޫގެ ހުރިހާ ފެކަލްޓީތަކަކަށް ހުޅުވައިލެވިގެންނެވެ. 1 މާރިޗުވީ އަންގާރަ ދުވަހުން ފެށިގެން ކުރިއަށް އޮތް 3 ދުވަހު ހިންގަން ހަމަޖެހިފައިވާ މިއިވެންޓުން ދަރިވަރުންނަށް އެކި ބާވަތްތަކުގެ ރަހަމީރު ހެދިކާއާއި ތަފާތު ބުއިންތައް ލިބެން ހުންނާނެއެވެ. މި ފުޑް ސްޓޯލް ކުރިޔަށް ގެންދަން ހަމަޖެހިފައިވަނީ ކޮންމެ ދުވަހެއްގެވެސް ހަވީރު 4 ން ރޭގަނޑު 8 އާއި ދެމެދު ބިޒްނަސް ސްކޫލް ބެންޗް އޭރިޔާގައެވެ.
ސްޓޯލުން ވިއްކަމުންދާ ހުރިހާ ބާވަތެއްގެ ހެދިކާ ވެސް ތައްޔާރު ކޮށްފައި ވަނީ ބީ.އެސް.އެސް.އޭގެ ލީޑަރުންނެވެ. މީގެ އިތުރުން މި ސްޓޯލް ކުރިޔަށް ގެންދިއުމުގައި އެންމެ އިސް ދައުރެއް އަދާކުރަނީވެސް ބީ.އެސް.އެސް.އޭގެ ހީވާގި ލީޑަރުންނެވެ.
މި ހަރަކާތް ކުރިއަށް ގެންދިއުމަށް ނިންމާފައިވާ އެންމެ ބޮޑު އެއް ސަބަބަކީ ބިޒްނަސް ސްކޫލްގައި މިވަގުތު ކެންޓީނެއް ނެތުމާއެކު ދަރިވަރުންނަށް ކާބޯތަކެތި ފޯރު ކޮށްދޭނެ މަގެއް ފަހި ކޮށްދިނުމަށެވެ. އަދި ބިޒްނަސް ސްކޫލާއި ބީ.އެސް.އެސް.އޭ އާއި ދެމެދު އޮންނަ ގުޅުން އިތުރަށް ބަދަހިކޮށް ފަހިކުރުމަކީވެސް މި ހަރަކާތުގެ މަގުސަދެކެވެ.
