ބިޒްނަސް ސްކޫލް ސްޓޫޑެންޓް އެސޯސިއޭޝަން (ބީ.އެސް.އެސް.އޭ) އާއި ހީލާރސް ގުޅިގެން 2022 ވަނަ އަހަރުގެ ދެވަނަ ސެމިސްޓަރގައި އެ ފެކަލްޓީތަކާ އަލަށް ގުޅޭ ދަރިވަރުންނަށް ޚާއްސަކޮށް ”ވެލްކަމް ނައިޓް“ ބާއްވައިފިއެވެ.
މި ހަރަކާތް ކުރިއަށް ގެންގޮސްފައިވަނީ 20 އޮގަސްޓް 2022 ދުވަހުގެރޭ ފެކަލްޓީ އޮފް ހެލްތް ސައިންސަސްގެ ކޮންފަރެންސް ހޯލްގައެވެ.
މި ހަރަކާތުގައި ދަރިވަރުންނާއެކު ދަރިވަރުންގެ ޔޫނިއަންގެ މިހާރުގެ ހިންގާ ކޮމިޓީއާއި، ހިންގާ ކޮމިޓީގެ ކުރީގެ މެންބަރުންނާއި އެޑްވައިޒަރީ ބޯޑް މެމްބަރުން ވަނީ ބައިވެރިވެފައެވެ. އަދި އެމް.އެން.ޔޫ.އެސް.ޔޫގެ ހިންގާ ކޮމިޓީގެ މެމްބަރުން ވަނީ އެމް.އެން.ޔޫ އަށް އަލަށް ގުޅުނު ދަރިވަރުންނަށް ތައާރަފްވެ ވާހަކަ ދައްކާފައެވެ.
އެކުވެރި މާހައުލެއްގައި ކުރިއަށް ގެންދިޔަ ވެލްކަމް ނައިޓުގައި ތަފާތު ގިނަ ކުޅިވަރުތަކާއެކު މުނިފޫހިފިލުވުމުގެ ހަރަކާތްތައް ކުރިއަށް ގެންގޮސްފައިވެއެވެ. މިގޮތުން އެކި ގޭމްތަކާއި، އެމް.އެން.ޔޫ.އެސް.ޔޫގެ ބޮޑުބެރު އަދި ޑާންސް ގްރޫޕްގެ ޘަޤާފީ ހުށަހެޅުންތައްވެސް މި ހަރަކާތުގައި ފެނިގެން ދިޔައެވެ.
ވެލްކަމް ނައިޓް ފުރިހަމަ ކަމާއެކު ނިންމާލުމުގައި ބިޒްނަސް ސްކޫލް ސްޓޫޑެންޓް އެސޯސިއޭޝަން އަދި ހީލާރސް މި ދެ ގޮފީގެ އިސްވާރުންގެ އެއްބާރުލުން ވަނީ ލިބިގެންގޮސްފައެވެ.
މި ހަރަކާތް ކުރިއަށް ގެންދިޔުމުގެ ބޭނުމަކީ 2 ފެކަލްޓީގެ ދަރިވަރުންގެ މެދުގައި އެކުވެރިކަން އާލާކުރުމާއެކު އެކަކު އަނެކަކަށް ތަޢާރަފުވެ ކިޔެވުމުގެ އިތުރުން އެހެނިހެން އެކި ހުނަރުތައް ކުދިންގެ ކިބައިގައި އަށަގެންނެވުމެވެ.
މި ވެލްކަމް ނައިޓަކީ ބީ.އެސް.އެސް.އޭ އަދި ހީލާރސް ގުޅިގެން މިއަހަރު ބޭއްވި ފުރަތަމަ ހަރަކާތެވެ.
