މިހާރު ކުރިއަށްދާ ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގައި އެމް.އެން.ޔޫ ބިޒްނަސް ސްކޫލްގެ ފިރިހެން އަދި އަންހެން ޓީމުގެ އަމާޒަކީވެސް މުބާރާތުގެ ޗެމްޕިއަން ތަށި އުފުލާލުންކަމަށް ބީ.އެސް.އެސް.އޭގެ ހިންގާ ކޮމިޓީން ބުނެފިއެވެ.
މުބާރާތުގެ އެންމެ ކާމިޔާބު ޓީމުގެ ގޮތުގައި ފާހަގަކުރެވިފައިވާ އެމް.އެން.ޔޫ ބިޒްނަސް ސްކޫލުގެ ފިރިހެން ޓީމު ވަނީ މިހާތަނަށް ތިން ފަހަރެއްގެ މަތީން މުބާރާތް ކާމިޔާބުކޮށްފައެވެ. އަންހެން ޓީމަށް މުބާރާތުގެ ޗެމްޕިއަންކަން މިހާތަނަށް ހާސިލް ކުރެވިފައެއް ނުވެއެވެ.
ޓީމާއި ގުޅޭ ގޮތުން ވާހަކަދައްކަމުން ބީ.އެސް.އެސް.އޭގެ ނައިބު ރައީސް (އިތުރު ހަރަކާތް) މިޝަލް މޫސާ ވިދާޅުވީ ކުރެވުނު ޕްރެކްޓިސްތަކާމެދު ވަރަށް ހިތްހަމަޖެހޭ ކަމަށާއި އަމާޒަކީ ދެޓީމުވެސް މުބާރާތުގެ ރަން މެޑަލް ކާމިޔާބުކުރުން ކަމަށެވެ.
މީގެ އިތުރުން މިޝަލް ވަނީ ބީ.އެސް ދެޓީމަށް އެކި ގޮތްގޮތުން އެހީތެރިކަން ފޯރުކޮށްދިން ސްޕޮންސަރުންނަށް ޚާއްސަ ޝުކުރެއް އަދާކޮށްފައެވެ. ބިޒްނަސް ސްކޫލް އަންހެން އަދި ފިރިހެން ޓީމުގެ ޖާޒީ ސްޕޮންސަރ ކޮށްދިނީ ކެޕްޓަން މޯލްޑިވްސްއެވެ. މީގެ އިތުރުން ޓްރަސްޓް މެކްސް ޕްރައިވެޓް ލިމިޓެޑްގެ ފަރާތުންވެސް ބިޒްނަސް ސްކޫލްގެ ދެޓީމަށް ވަނީ ސްޕޮންސަރ ލިބިފައެވެ.
މުބާރާތުގެ ފުރަތަމަ މެޗުގައި ބިޒްނަސް ސްކޫލްގެ އަންހެން ޓީމު ވާދަކުރަން ޖެހޭނީ އެންމެ ފަހުގެ ޗެމްޕިއަން އެމް.އައި ކޮލެޖާއެވެ. މެޗު އޮންނާނީ ބުދަ ދުވަހުގެރޭ 22:00 ގައެވެ. ފިރިހެން ޓީމުގެ ފުރަތަމަ މެޗުގައި ބުދަ ދުވަހުގެރޭ 23:00 ގައި ނުކުންނާނީ މޯލްޑިވްސް ބިޒްނަސް ސްކޫލާއި ދެކޮޅަށެވެ.
