ތުރުކީ އަދި ސީރިއާގައި ހާލުގައި ޖެހުނު މީހުންނަށް އެހީވުމަށް ބީ.އެސް.އެސް.އޭ އިން ހަރަކާތެއް ފަށައިފި

ތުރުކީ އާއި ސީރިއާގެ ބޯޑަރު ސަރަހައްދަށް އައި ބިންހެލުމުގައި ހާލުގައި ޖެހުނު މީހުންނަށް އެހީވުމުގެ ގޮތުން އެމް.އެން.ޔޫ ބިޒްނަސް ސްކޫލް ސްޓޫޑެންޓް އެސޯސިއޭޝަން (ބީ.އެސް.އެސް.އޭ) ގެ ފަރާތުން ހަރަކާތެއް ފަށައިފި އެވެ.

ބީ.އެސް.އެސް.އޭގެ ފަރާތުން ވަނީ އެމް.އެން.ޔޫގެ މެއިން ކެމްޕަހާއި ބިޒްނަސް ސްކޫލުގައި ދެ ފަންޑު ފޮއްޓެއް ބަހައްޓާފަ އެވެ.

މީގެ އިތުރުން އެމް.އެން.ޔޫ ސްޓޫޑެންޓް ޔޫނިއަން (އެމް.އެން.ޔޫ.އެސް.ޔޫ) ގެ ބޭންކް އެކައުންޓަށް ފައިސާ ޖަމާކޮށްގެން އެހީތެރިކަން ފޯރުކޮށްދިނުމުގެ ފުރުސަތުވެސް ބީ.އެސް.އެސް.އޭ އިން ވަނީ ހުޅުވާލާފަ އެވެ.

ބީ.އެސް.އެސް.އޭ އިން މި ހަރަކާތް ހިންގުމުގެ މަގުސަދަކީ ހާލުގައި ޖެހުނު ފަރާތްތަކަށް އެހީތެރިން ފޯރުކޮށްދިނުމެވެ. މި ހަރަކާތް އަންނަ މަހުގެ ފަސްވަނަ ދުވަހާ ހަމައަށް ކުރިއަށް ދާނެ އެވެ.

ތުރުކީ އަދި ސީރިއާގައި ހާލުގައި ޖެހިފައިވާ މީހުންނަށް އެހީވުމަށް ހިންގާ މި ހަރަކާތުން ލިބޭ ފައިސާ އެ މީހުންނަށް ދިނުމަށް ހަމަޖެހިފައިވަނީ މޯލްޑިވްސް ރެޑް ކްރެސެންޓް މެދުވެރިކޮށެވެ. މި ފައިސާ މި ހަރަކާތް ނިމުމާއެކު ރެޑް ކްރެސެންޓާ ހަވާލު ކުރާނެ އެވެ.

ކުރިއަށް އޮތްތަނުގައިވެސް މުސްލިމުންނަށް ދިމާވާ މިފަދަ ކާރިސާތަކުގައި އެހީތެރިކަން ފޯރުކޮށްދިނުމަށް ބީ.އެސް.އެސް.އޭއިން އޮތީ ތައްޔާރަށެވެ.