ބިޒްނަސް ސްކޫލް ސްޓޫޑެންޓް އެސޯސިއޭޝަން (ބީ.އެސް.އެސް.އޭ) އިން އިސް ނަގައިގެން ކުރިއަށްގެންދާ ބީ.އެސް.އެސް.އޭ ފެންޓަސީ ޕްރިމިއާ ލީގު 23/24 (ބީ.އެސް.އެސް.އޭ އެފް.ޕީ.އެލް 23/24) ފަށައިފި އެވެ.
ބީ.އެސް.އެސް.އޭ އެފް.ޕީ.އެލް އަކީ ބީ.އެސް.އެސް.އޭ އިން މިއަހަރު މުޅިން އަލަށް ފެށި މުބާރާތެކެވެ. މި މުބާރާތް ކުރިއަށް ގެންދިއުމަށް ހަމަޖެހިފައިވަނީ އެމް.އެން.ޔޫގެ ހުރިހާ ދަރިވަރުންނަށް ހުޅުވާލައިގެންނެވެ.
މި މުބާރާތުގައި ކޮންމެ މަހަކުވެސް އެއްވަނައަށްދާ ފަރާތަކަށް އިނާމެއް ދިނުމަށް ބީ.އެސް.އެސް.އޭ އިން ވަނީ ނިންމާފަ އެވެ. މީގެ އިތުރުން އެފް.ޕީ.އެލް ސީޒަން ނިމުމުން އެއްވަނަ، ދެވަނަ އަދި ތިންވަނައަށް ދާ ފަރާތްތަކަށް ފައިސާގެ އިނާމެއް ދިނުމަށްވެސް ވަނީ ހަމަޖެހިފަ އެވެ. އެގޮތުން އެއްވަނައަށް ދާ ފަރާތަކަށް 1،000 ރުފިޔާ، ދެވަނައަށް ދާ ފަރާތަކަށް 500 ރުފިޔާ އަދި ތިންވަނައަށް ދާ ފަރާތަކަށް 250 ރުފިޔާ ދިނުމަށް ވަނީ ނިންމާފަ އެވެ.
ބީ.އެސް.އެސް.އޭގެ ނައިބު ރައީސް (އިތުރު ހަރަކާތް) އަޙްމަދު ސަމީހު ވަނީ މި މުބާރާތަކީ އެމްއެންޔޫގެ ދަރިވަރުންނަށް އިތުރު ފުރުސަތެއް ހޯދައިދިނުމަށް ކުރިއަށް ގެންދާ މުބާރާތެއްކަމަށް ބުނެފަ އެވެ.
”ވަރަށް ގިނަ ދަރިވަރުން އެފްޕީއެލް ކުޅޭކަން ފާހަގަ ކުރެވިގެން އެ ކުދިންނަށް ޔުނިވާސިޓީ ތެރޭގައި ވާދަކޮށްލަން ފުރުސަތެއް ހުޅުވާލުމުގެ ނިޔަތުގައި އަޅުގަނޑުމެން މި މުބާރާތް މި ކުރިއަށް ގެންދަނީ. ކުރިއަށް އޮތްތާވެސް މިކަހަލަ ތަފާތު މުބާރާތްތަކެއް ބީ.އެސް.އެސް.އޭ އިން ދަރިވަރުންނާ ހަމައަށް ގެނެސްދޭނަން،“ ސަމީހު ބުންޏެވެ.
މި މުބާރާތުގައި ބައިވެރިވާން ބޭނުންވާ އެމް.އެން.ޔޫގެ ހުރިހާ ދަރިވަރުންނަށް އޮގަސްޓް 24 ވަނަ ދުވަހުގެ ނިޔަލަށް އެ ފުރުސަތު ވަނީ ހުޅުވާލާފަ އެވެ. ބީ.އެސް.އެސް.އޭގެ ސޯޝަލް މީޑިއާ ޕޭޖްތަކުން ބައިވެރިވާ ލިންކް ފެންނަން ހުންނާނެ އެވެ.
ބީ.އެސް.އެސް.އޭ އެފް.ޕީ.އެލް އަކީ މިއަހަރު އަލަށް ފެށި މުބާރާތެއް ނަމަވެސް ބީއެސްއެސްއޭގެ އަމާޒަކީ ކޮންމެ އަހަރުވެސް މިމުބާރާތް ކުރިއަށް ގެންދިއުމެވެ.
